မကွေးတိုင်း၊ ပေါက်မြို့နယ်၊ ဇီးပြားပျူစောထီးရွာ ဝင်ရောက်တိုက်ခိုက်မှုတွင် ကျဆုံးသွားသော PDF ရဲဘော်များထဲ၌ အမျိုးသမီးရဲမေတစ်ဦး ပါဝင်ကြောင်းသိရသည်။
အဆိုပါတိုက်ပွဲတွင် PDF ရဲဘော် ၂၁ဦးကျဆုံးခဲ့ပြီး ရုပ်အလောင်း ၃ခုသာပြန်လည်ရရှိခဲ့ကာ သင်္ဂြိုလ်ပြီးစီးပြီဖြစ်ကြောင်း၊ ကျဆုံးသွားသော ရဲဘော်များ၏ မိခင်အဖွဲ့အစည်းအမည်ကိုမူ စာရင်းမပြုလုပ်ရသေးကြောင်း မြိုင်မြောက်ပိုင်းဇုန်ပကဖတာဝန်ခံ ဗိုလ်ခရောစ့်က MPA သို့ပြောသည်။
” ကျသွားတဲ့အထဲမှာ အမျိုးသမီးရဲမေ ၁ဦးလည်းပါတယ်။ သူကတော့ေဆးဆရာမပေါ့။ ဇီးပြားသူပဲ။ ကျနော်တို့ရဲ့ တပ်စိတ်တွေထဲမှာလည်း ပါတယ်။ လက်နက်ကိုင်ပြီးလည်း တိုက်နေတာပေါ့” ဟု ၎င်းကပြောသည်။
နိုဝင်ဘာ ၁၅ရက်၊ နံနက် ၅နာရီခန့်က ဇီးပြားရဲစခန်းနှင့် ကျေးရွာအတွင်းသို့ PDFတပ်ဖွဲ့များ ဝင်ရောက်တိုက်ခိုက်ခဲ့ရာ ကျေးရွာအတွင်းရှိ ဘန်ကာနှင့် ဇီးပြားဘူတာရုံရှိဘန်ကာများအားလုံးကိုသိမ်းဆည်းနိုင်သည့်အပြင် ပျူစောထီးများစခန်းချထားသော အဆောက်အအုံများပါ မီးရှို့ဖျက်ဆီးနိုင်ခဲ့ကြောင်း မြိုင်ပကဖက သတင်းထုတ်ပြန်သည်။
ယင်းသို့ ဇီးပြားပျူရွာကို စီးနင်းနေသည့် မွန်းတည့် ၁၂နာရီဝန်းကျင်တွင် စစ်ကောင်စီတပ်သားများ၏ ပြန်လည် အဝိုင်းခံလိုက်ရသဖြင့် PDF ရဲဘော် ၂၁ဦးကျဆုံးသွားခြင်းဖြစ်ကြောင်း ဗိုလ်ခရောစ့်ကပြောသည်။
“ အဝိုင်းခံလိုက်ရတာပေါ့။ ကင်းပွိုင့်ယူတဲ့ ကိုယ့်ရဲ့တပ်စိတ်ကအဝိုင်းခံလိုက်ရတာ။ သူတို့က အင်အားအလုံးအရင်းနဲ့ ပစ်တက်တက်လာတာ။ သူတို့ကလုံးဝကျတော့မှာ။ ဘုန်းကြီးကျောင်းနဲ့ စခန်း ၂နေရာပဲကျန်တော့တာ။ အဲ့မှာ သူတို့က အသေခံတိုက်မယ်ဆိုပြီး အမျိုးသမီးတွေကပါ ဓားတွေနဲ့တက်ခုတ်တာ” ဟု ၎င်းကပြောသည်။
တိုက်ပွဲဖြစ်ပွားနေသည့် နိုဝင်ဘာ ၁၅ရက်၊ နံနက် ၉နာရီခန့်တွင် စစ်ကောင်စီတပ်က Mi-35 ရဟတ်ယာဉ်ဖြင့် ၃ကြိမ်ပစ်ခတ်ခဲ့သည့်အပြင် ပေါက် ကပစ -၂၄ မှ ၁၂၀(မမ)လက်နက်ကြီးဖြင့် အကြိမ်ရေ ရာဂဏန်းအထိပစ်ကူပေးခဲ့ကြောင်း ယင်း တိုက်ပွဲ၌ ပါဝင်သည့် ရဲဘော်တစ်ဦးကပြောသည်။
” လေယာဉ် ၃ခါလာတယ်။ ၉ကြိမ်ပစ်သွားတယ်။ မနက် ၉နာရီလောက်ကနေ လာပစ်တော့တာ ညနေအထိပဲ။ ကျနော်တို့ ရွာတစ်ဝက်ကျော်ထိ ဝင်နိုင်တယ်။ စခန်းနဲ့ ဘုန်းကြီးကျောင်းပဲကျန်ခဲ့တာ” ဟု ၎င်းကပြောသည်။
ယင်းတိုက်ခိုက်မှုတွင် စစ်သား၊ ရဲနှင့် ပျူစောထီး စုစုပေါင်း ၃၀ကျော်သေဆုံးပြီး ရှေ့ထွက်မိုင်း ၅လုံးနှင့် လက်ပစ်ဗုံး ၈လုံးတို့ကိုသိမ်းဆည်ရမိကြောင်း မြိုင်ပကဖက သတင်းထုတ်ပြန်ထားသည်။
” ပျူတွေနေတဲ့အဆောက်အအုံတွေကို မီးရှို့ဖျက်ဆီးနိုင်ခဲ့တယ်။ စစ်သားတွေ ရဲတွေ ပျူတွေရဲ့ အလောင်းတွေကိုလည်း မီးထဲထည့်ရှို့ခဲ့လိုက်တယ်” ဟု မြိုင်ပကဖ သတင်းပြန်ကြားတာဝန်ခံက ပြောသည်။
ဇီးပြားပျူရွာကို နိုဝင်ဘာ ၁၀ရက်၊ညနေ ၃နရီခွဲခန့်က စတင်ချဉ်းကပ်ခဲ့ပြီး ညနေ ၅နာရီ မိနစ် ၅၀ခန့်တွင် စစ်ကောင်စီတပ်ဘက်က ကင်းထောက် ဒရုန်းကိုပစ်ချခဲ့ကြောင်း ၎င်း ဒရုန်းကို လာကောက်သော စစ်သား ၂ဦးကိုလည်း ပစ်ခတ်ခဲ့ရာ ၂ဦးစလုံးသေဆုံးသွားကြောင်း သိရသည်။
နိုဝင်ဘာ ၁၀ရက်မှ ၁၄ရက်နေ့အထိ ဒရုန်းဖြင့် ၅ရက်ဆက်တိုက် ဗုံးသီး အလုံး ၁၀၀၀ခန့် ဆက်တိုက်ကြဲချတိုက်ခိုက်ခဲ့ပြီး နိုဝင်ဘာ ၁၅ရက်နေ့မှ ရွာထဲသို့ဝင်ရောက်တိုက်ခိုက်ခဲ့ခြင်းဖြစ်ကြောင်း ၎င်းကပြောသည်။
ဇီးပြားပျူရွာတွင် စစ်သားနှင့် ရဲ ၂၀ဝန်းကျင်ရှိပြီး ပျူစောထီး ၄၀ဝန်းကျင်ရှိကြောင်း သိရသည်။
နိုဝင်ဘာ ၁၅ရက်၊ ဇီးပြားပျူရွာကို ဝင်ရောက်တိုက်ခိုက်နေစဉ် မဟာမိတ်တပ်ဖွဲ့များက မြိုင်မြို့ပေါ်ရှိ စစ်တပ်အထိုင်ချနေရာများ၊ ကန်နီပျူရွာ၊ ကိုင်းတောမရဲစခန်း၊ တွင်းမပျူစခန်း၊ သရက်ကန်ပျူစခန်းနှင့် ပခုက္ကူတပ်မ- ၁၀၁တို့ကို လက်နက်ကြီးနှင့် ဒရုန်းတို့ဖြင့် တိုက်ခိုက်ခဲ့ကြောင်း သိရသည်။
ယင်းတိုက်ခိုက်မှုများကို မြိုင်ပကဖတပ်ရင်း ၁၊ တပ်ရင်း ၂နှင့် ပေါက်ကျေးရွာပကဖတပ်ဖွဲ့များ၊ YRF (ပေါက်)၊ Earthquake People Defense Force၊ တောင်ညိုနဂါးတပ်ဖွဲ့နှင့် Royal 7 တပ်ဖွဲ့တို့ ပူးပေါင်းဆင်နွှဲခဲ့ခြင်းဖြစ်သည်။
