မကွေးတိုင်း၊ မြိုင်မြို့နယ်တွင် Well-2 ရေနံမြေက စစ်ကောင်စီစခန်း ကို ဒေသကာကွယ်ရေးတပ်ဖွဲ့ ၃၀ ကျော်က ဝင်ရောက်တိုက်ခိုက်ခဲ့ရာ လေယာဥ်ပစ်ကူ ၃ ကြိမ်ခေါ် ခဲ့ရကြောင်း သိရသည်။
မတ်လ ၁၇ ရက် နံနက် ၇နာရီ ၁၅ မိနစ်ခန့်တွင် လက်နက်ကြီး၊လက်နက်ငယ်များဖြင့် တော်လှန်ရေးရဲဘော်များက တပ်ဖြန့်တိုက်ခိုက်ခဲ့ရာ စစ်သား ၇ ဦးသေဆုံးခဲ့ကြောင်း သိရသည်။
“အရင်ဆုံး Well-2 စခန်းကို ၇နာရီ ၁၅ မှာ လက်နက်ကြီးနဲ့ ၄၅ မိနစ်လောက် စပစ်တယ်။ သူတို့ကလည်း လက်နက်ကြီး လက်နက်ငယ်တွေနဲ့ ကောင်တာ ပြန်ပစ်တယ်။ ၈နာရီမှာ ငါတို့က တပ်ဖြန့်ပြီး လက်နက်ငယ်တွေပစ်တယ်။ ဒရုန်းနဲ့လည်းဗုံးသီးချတယ်။ ဘန်ကာတွေကို တည်ပြီးပစ်တာ။ စခန်းကို စီးတော့မယ့်အချိန် ၉ နာရီလောက်မှာ လေယာဥ်နဲ့လာပစ်တော့ ငါတို့ ရဲဘော် တစ်ယောက်ကျတယ်။ဒဏ်ရာရတဲ့သူတွေလည်းရှိတယ်။ ငါတို့ ပြန်ဆုတ်တယ်။ဒုတိယ အကြိမ် ထပ်တိုက်တယ်။ လေယာဥ်ပစ်ကူထပ်လာတာပဲ။ လေယာဥ်ပေါ်က စက်ကလေးနဲ့လည်းပစ်တယ်. ဗုံးသီးနဲ့လည်းချတယ်”ဟု မြေလတ်ဒေသပြောက်ကျားတပ်ဖွဲ့-MRG မှတာဝန်ရှိသူ တစ်ဦး ကပြောသည်။
မြိုင်(ပကဖ)တပ်ရင်း-၁ တာဝန်ခံ ဗိုလ်လက်ယာ ကလည်း လေကြောင်းပစ်ကူသာမရှိလျှင် စခန်းစီးနိုင်မည့်အခြေအနေရှိကြောင်း ပြောသည်။
“တိုက်ပွဲက မနက်ပိုင်းပေါ့။အနီးကပ်တွယ်ကြတာ။သူတို့က ဘန်ကာ၊ ကတုတ်ကျင်းတွေ ကောင်းကြတာရယ်၊ နယ်မြေကျွမ်းကျင်တာရယ် တိုက်ရတဲ့နေရာ ကျယ်ပြန့်တာရယ်ကြောင့် ထင်သလောက်တော့ ထိရောက်မှုနည်းတယ်။ ဒါပေမဲ့ လေကြောင်းမရှိရင် ကျနော်တို့ စခန်းစီးနိုင်တဲ့အခြေနေမှာ ရှိတယ်။ ကျနော့်တပ်ဖွဲ့က ရဲဘော်လေးကျသွားတယ်။ ၄ ယောက်ဒဏ်ရာရတယ် ။တစ်ဦးက စိုးရိမ်ရတယ်ဗျာ”ဟု ဗိုလ်လက်ယာ ကပြောသည်။
စစ်ကောင်စီတပ်၏ လေယာဥ်ပေါ်မှပစ်လိုက်သည့် ကျည်ထိမှန်၍ ရဲဘော် ၁ ဦးကျဆုံးပြီး ၇ ဦး ဒဏ်ရာရရှိခဲ့ကာ ၁ ဦးသည် လည်ပင်းထိမှန်ခဲ့သောကြောင့် စိုးရိမ်ရကြောင်းသိရသည်။
စစ်ကောင်စီတပ်၏ ထိခိုက်သေဆုံးမှုကို MPA အနေဖြင့်သီးခြားအတည်မပြုနိုင်ပေ။
