စစ်ကိုင်းတိုင်း၊ ပုလဲမြို့နယ်အတွင်း စစ်ကြောင်းထိုးပြီး ပြန်လာသည့် စစ်တပ် ပျူစောထီးရွာသို့ ရောက်ရှိစဉ် တာဝေးပစ်ရော့ကက်ဖြင့် ပစ်ခတ်ခဲ့ရာ ပစ်မှတ်ထိမှန်ခဲ့ကြောင်း ယင်းမာပင်ခရိုင်တပ်ရင်း-၁၉ (Pale Jokers PDF) က ယနေ့ ထုတ်ပြန်သည်။
ဖေဖော်ဝါရီ ၁၅ ရက် ည ၇ နာရီခန့်တွင် အင်ကြင်းစုရွာမှ ထွက်လာသော အင်အား ၇၀ ခန့်ပါသည့် စစ်ကောင်စီစစ်ကြောင်းသည် အင်းမထီးရွာစာသင်ကျောင်းသို့ ရောက်ရှိနေကြောင်း သတင်းသိရှိရ၍ တာဝေးပစ် Rocket ၄ လုံးဖြင့် ပစ်ခတ် တိုက်ခိုက်ခဲ့ခြင်းဖြစ်ကြောင်း သိရသည်။
“အင်ကြင်းစုရွာမှာ နေအိမ်တွေကို လုယက်ဖျက်ဆီးနေတဲ့ စစ်ကြောင်းက ပျူတွေနဲ့ပေါင်းပြီး အင်းမထီးရွာကို ရောက်ရှိနေတယ်လို့ သတင်းရတာနဲ့ တာဝေးပစ် ၄ လုံးနဲ့ ပစ်တာ ပစ်မှတ်ကို တည့်တည့်ကြတယ်။ စာသင်ကျောင်းမှာ ပျူတွေလည်းနေတယ်။ သူတို့က အဲ့ဒီမှာ စခန်းဝင်ချတာ။ ဒီကောင်တွေက နာရီဝက်လောက် ၄၀ မမ နဲ့ ၆၀ မမ တွေနဲ့ အဆက်မပြတ် ပြန်ပစ်နေတာ။ ကျနော်တို့လည်း ပစ်မှတ်ထိတာနဲ့ ပြန်ဆုတ်လာခဲ့တယ်”ဟု Pale Jokers PDF ခေါင်းဆောင် ဗိုလ်ပုလဲက ပြောသည်။
စစ်ကောင်စီတပ်နှင့် ပျူစောထီးများသည် အင်ကြင်းစုကျေးရွာမှ နေအိမ်များကို ဖောက်ထွင်း လုယက်ဖျက်ဆီးပြီး လှည်း အစီး ၂၀ ဝန်းကျင်ဖြင့် အင်းမထီးရွာ စာသင်ကျောင်းသို့ ပစ္စည်းများသယ်ဆောင်ခဲ့ကြောင်း သိရသည်။
ယင်းစစ်ကြောင်းသည် ဖေဖေါ်ဝါရီ ၁၅ ရက်နေ့ နံနက်က ပုလဲမြို့နယ်အတွင်း စစ်ကြောင်းထိုးခဲ့ရာ ရွာသာ၊ လိန်ကုန်း၊ရွာထင်၊ ကြိုးကြားဥ၊ ကံကြီး၊ ဖိုကုန်း၊ ညောင်ကုန်း၊ မွေ့တုံ၊ ကံပေါက်၊ လှော်ကား၊ နွယ်ရှောက်၊ ကုက္ကိုကုန်း၊ လက်ပုကန်နှင့် အင်ကြင်းစုရွာတို့က ပြည်သူတစ်သောင်းကျော် စစ်ဘေးရှောင်ခဲ့ရကြောင်း Pale Entertainment ကဖော်ပြသည်။
အဆိုပါ စစ်ကြောင်းသည် ဖေဖေါ်ဝါရီ ၁၅ ရက်နေ့ ညနေပိုင်း၌ အင်မထီးရွာ ပျူစောထီးစခန်းသို့ ပြန်လည် ရောက်ရှိခဲ့ခြင်းဖြစ်သည်။
