မကွေးတိုင်း၊ ပေါက်မြို့နယ်၊ ကျားပစ်ကန်ကျေးရွာကို အကြမ်းဖက်စစ်ကောင်စီတပ်ဖွဲ့ဝင်များက လက်နက်ကြီးဖြင့် ပစ်ခတ်ခဲ့သောကြောင့် အသက် ၄ နှစ်အရွယ်မိန်းကလေးငယ်တစ်ဦး ထိမှန်သေဆုံးသွားသည်ဟု ဒေသခံများထံမှ သိရသည်။
ယနေ့ နံနက် ၈ နာရီအချိန်တွင် အကြမ်းဖက်စစ်ကောင်စီတပ်ဖွဲ့ဝင်များ နှင့် ပျူစောထီးများ ပူးပေါင်းပြီး အင်အား ၇၀ ကျော်ဖြင့် ကျားပစ်ကန်ကျေးရွာအတွင်း ဝင်ရောက်လာချိန် လက်နက်ကြီးများပစ်ခတ်ခဲ့သောကြောင့် ကျေးရွာရှိ အပြစ်မဲ့ကလေးငယ်တစ်ဦး သေဆုံးသွားပြီး ထိခိုက်ဒဏ်ရာရရှိသူများလည်းရှိကြောင်း သိရသည်။
“ ဒီမနက် လက်နက်ကြီးထိပြီးဆုံးသွားတဲ့ကလေးမက အိမ်မှာ သူ့အဖိုးနဲ့ကျန်ခဲ့တာ။ သူ့အမေ၊ သူ့အဖေ၊ သူ့အစ်ကိုတို့က တောထဲသွားတယ်။ သူ့ကို တောထဲခေါ်သွားဖို့ စိတ်မချလို့ဆိုပြီး အိမ်မှာသူ့အဖိုးနဲ့ကျန်ခဲ့တာ။ အခု သူ့အဖိုးလည်း လက်နက်ကြီးထိထားတယ်။ သူတို့အိမ်ဘေးကအဖွားတစ်ယောက်လည်း လက်နက်ကြီးအစ ထိမှန်ထားတယ် ” ဟု ကျားပစ်ကန်ဒေသခံတစ်ဦးကပြောသည်။
လက်နက်ကြီးထိမှန်ပြီး သေဆုံးသွားသူမှာ အသက် (၄) နှစ်သာရှိသေးသော မသိမ့်သိမ့်ဖြူ ဖြစ်ပြီး သူမနှင့်အတူ အသက် (၆၀) အရွယ် အဘိုးဖြစ်သူမှာလည်း လက်နက်ကြီးထိမှန်ကာ ထိခိုက်ဒဏ်ရာရရှိခဲ့ကြောင်း သိရသည်။
ကျားပစ်ကန်ကျေးရွာကို အကြမ်းဖက်စစ်ကောင်စီတပ်ဖွဲ့ဝင်များနှင့် ပျူစောထီးများက ယခုလိုဝင်ရောက်ခဲ့သည်မှာ ၄ ကြိမ်မြောက်ရှိပြီဖြစ်ကြောင်း ကျေးရွာသို့ ဝင်လာသည့်အကြိမ်တိုင်း ရွာသားများ၏နေအိမ်များကို ဝင်ရောက်မွှေနှောက်သွားပြီး ရွာသားများကို ဖမ်းဆီးရိုက်နှက်မှုများပြုလုပ်ကာ ကျားပစ်ကန်ကျေးရွာကို မကြာခင်မီးရှို့ပစ်မည်ဖြစ်ကြောင်း ခြိမ်းခြောက်ပြောဆိုမှုများလည်း ပြုလုပ်ခဲ့သည်။
“ ရွာထဲကို စစ်ခွေးဝင်လိုက်၊ ပျူစောထီးတွေဝင်လိုက်၊ ပြီးရင်သူတို့နှစ်ဖွဲ့ပေါင်းပြီးဝင်တယ်။ အခုလို ရွာထဲကိုဝင်တာ ဒလန်သတင်းပေးလို့ဝင်တာလည်းရှိတယ်။ ပြီးရင် အရင်က ကျားပစ်ကန်ရွာကဘုန်းကြီးက တစ်ရွာလုံးကို ပျူစောထီးလုပ်ဖို့ကြံစည်နေတာ မိသွားတော့ အသတ်ခံလိုက်ရတယ်။ အဲဒါတွေနဲ့ပတ်သက်ပြီး သူတို့ကမကျေနပ် လို့ ရွာကိုဝင်တာမျိုးလည်းဖြစ်တယ်။ ဒီမနက် ရွာထဲကိုဝင်လာတာ PDF တွေလက်ထဲကလွတ်သွားတဲ့ ဒလန် ဒေါ်သန်းအေးက ဦးဆောင်ပြီးခေါ်လာတာ။ သူက ရွာထဲက သတင်းမှန်သမျှကို ပျူစောထီးတွေကိုပို့ပေးတာ ” ဟု ကျားပစ်ကန်ကျေးရွာရှိ ထွက်ပြေးတိမ်းရှောင်နေရသူ ဒေသခံတစ်ဦးကပြောသည်။
ကျားပစ်ကန်ကျေးရွာတွင် အိမ်ခြေ ၂၀၀ ကျော်ရှိပြီး ယခုတွင်လည်း အကြမ်းဖက်စစ်ကောင်စီတပ်ဖွဲ့ဝင်များနှင့် ပျူစောထီးများက ကျေးရွာအတွင်း တပ်စွဲထားသောကြောင့် ကျေးရွာရှိပြည်သူများမှာ နီးစပ်ရာတောထဲသို့ ထွက်ပြေးတိမ်းရှောင်နေကြရပြီး အကြမ်းဖက်စစ်တပ်က အပြစ်မဲ့ပြည်သူ၅ဦးကို ဖမ်းဆီးထားကာ ရိုက်နှက်မှုများပြုလုပ်နေကြောင်းဒေသခံသတင်းအရင်းမြစ်ထံမှ သိရသည်။