By MPA 001
ကျောင်းမအပ်သည့် မိဘများကို အကြမ်းဖက်စစ်ကောင်စီမှ အရေးယူမည်ဆိုသည့် သတင်းထွက်ပေါ်မှုကြောင့် ကျောင်းအပ်သူ များပြား နေကြောင်း ရန်ကုန်မြို့နေ ကျောင်းသားမိဘများကပြောသည်။
“ကျောင်းမတက်တဲ့ ကျောင်းသား၊ ကျောင်းသူတွေစာရင်းကို ရပ်ကွက်အုပ်ချုပ်မှုးရုံးကနေ စာရင်းကောက်ပေးဖို့ စစ်ခွေးတွေ လာပြောသွားတယ်။ ဒီကာလကြီးထဲ မနည်းရုန်းကန်နေရတာဆိုတော့ လက်နက်ရှိတဲ့သူတို့ကို ကြောက်ရတာပေါ့ ” ဟု ရန်ကုန်မြို့နေ ကျောင်းသားမိဘတစ်ဦးကပြောသည်။
ပြီးခဲ့သည့် မေလ ၂၆ရက်နေ့သည် ၂၀၂၂-၂၀၂၃ ပညာသင်နှစ်၏ ပထမဆုံးစတင်ကျောင်းအပ်နှံသည့်နေ့ဖြစ်ပြီး ယမန်နေ့က ကျောင်းအပ်နှံသူ ၁,၆၁၁,၀၅၁ ဦးရှိခဲ့ကြောင်း အကြမ်းဖက်စစ်ကောင်စီခန့် ပညာရေးဝန်ကြီးဌာန၏ ထုတ်ပြန်ချက်အရသိရသည်။
ယင်းကျောင်းလာရောက်အပ်နှံသူများကို အကြမ်းဖက်စစ်ကောင်စီခန့် ပညာရေးဝန်ကြီးဌာနမှ အခမဲ့ထောက်ပံ့သည့် စာရေး ကိရိယာများ နှင့် ကျောင်းသုံးစာအုပ်များကို ပေးအပ်ခဲ့ကြောင်းနှင့် အကြမ်းဖက်စစ်ကောင်စီခန့် တိုင်းနှင့်ပြည်နယ်ဝန်ကြီးချုပ်များ၊ တိုင်းစစ်ဌာနချုပ်တိုင်းမှူးများနှင့် ဌာနဆိုင်ရာတာဝန်ရှိသူများမှလည်း လိုအပ်သည်များအား ညှိနှိုင်းဆောင်ရွက်ပေးခဲ့ကြောင်း ပညာရေး ဝန်ကြီးဌာနကပြောသည်။
ယခုကဲ့သို့ ကျောင်းသား၊ ကျောင်းသူများအား ကျောင်းမအပ်နှံသည့် မိဘများကို အရေးယူမည်ဆိုသည့် သတင်းကို အကြမ်းဖက် စစ်ကောင်စီမှ အတိအလင်း မကြေညာသော်လည်း သက်ဆိုင်ရာ ရပ်ကွက်၊ မြို့နယ်အုပ်ချုပ်ရေးမှူးများ၊ Non-CDMဆရာ၊ ဆရာမများထံ အကြောင်းအကြားသတိပေး ခြိမ်းခြောက်ထားပြီးဖြစ်ကြောင်း ခိုင်လုံသည့် သတင်းရပ်ကွက်မှ MPA သို့ သတင်းပေး ပြောကြားခဲ့သည်။
“သတင်းကသေချာတယ်။ အလုံမြို့မရဲစခန်းကို ဗိုလ်ကြီးအဆင့်ရှိတဲ့ကောင်ကိုယ်တိုင် ကျောင်းမအပ်တဲ့ ကလေးတွေ စာရင်း ယူခိုင်းထားတာ။ သတင်းက ရန်ကုန်တစ်မြို့လုံးပျံ့နေတာ။ တချို့ကလဲ ကြောက်တော့ ကျောင်းအပ်တယ်။ မအပ်တဲ့ မိဘတွေလည်း ရှိတယ်။ ပြေလည်တဲ့သူတွေကတော့ ကျောင်းထုတ်ပြီး ပုဂ္ဂိလကကျောင်းထားတာမျိုးရှိတယ် ”ဟု ကျောင်းသားမိဘတစ်ဦးမှ ရှင်းပြသည်။
အထက်ပါ အကြမ်းဖက်စစ်ကောင်စီ၏ မတရားဖမ်းဆီးမည်ဟု သတင်းများထွက်ပေါ်နေသည့်ကြားက ကျောင်းမအပ်သည့် မိဘများ နှင့် ကျောင်းထုတ်ကာ ပုဂ္ဂလိကကျောင်းထားသည့် မိဘများလည်းရှိကြောင်း အမည်မဖော်လိုသူ ကျောင်းအုပ်ဆရာမတစ်ဦးက ပြောသည်။
“တစ်နိုင်ငံလုံးနဲ့ယှဉ်ရင်တော့ ကိန်းဂဏန်းများတာပေါ့။ တချို့မြို့နယ်တွေမှာတော့ အရင်လိုပဲ အပ်တဲ့သူတောင်သိပ်မရှိဘူး။ ဒီနှစ်မှာ ထူးခြားတာဆိုလို့ ကျောင်းထုတ်တဲ့ မိဘတွေသိသိသာသာများလာတာပဲ ” ဟု အမည်မဖော်လိုသူ ကျောင်းအုပ်ဆရာမတစ်ဦးက ပြောသည်။
လက်ရှိမှာ စစ်ကျွန်ပညာရေးမသင်ကြားလိုသည့်မိဘများအနေနှင့် မိမိရင်သွေးငယ်များကို ကျောင်းထုတ်ပြီး ပုဂ္ဂလိကကျောင်းများတွင် အပ်နှံလာခဲ့ပြီး အကြမ်းဖက်စစ်ကောင်စီ၏ မတရားရန်ရှာမှုကို ကြောက်လန့်နေရသည့် မိဘများအနေနှင့် ဝင်ငွေအပေါ်တွက်ချက်ကာ အကြမ်းဖက်စစ်ကောင်စီလက်အောက်ခံ စာသင်ကျောင်းများသို့ အပ်နှံနေကြောင်းနှင့် စစ်ကျွန်ပညာရေးအလိုမရှိဆိုကာ ကျောင်းမအပ်သည့် မိဘများလည်းရှိကြောင်း စုံစမ်းသိရသည်။
#စစ်ကျွန်ပညာရေး#ကျောင်းအပ်နှံ#စစ်ကောင်စီခြိမ်းခြောက်#MPA
