By MPA
နိုင်ငံတကာအလုပ်သမားအဖွဲ့ချုပ် (ILO) ၏ ဦးဆောင်မှုဖြင့် ကလေးအလုပ်သမားဆိုင်ရာ မြန်မာအီလက်ထရောနစ် သင်ကြားရေး အစီအစဉ်တစ်ရပ်ကို ဇွန်လအတွင်း စတင်မိတ်ဆက်သွားမည်ဖြစ်ကြောင်း သိရရှိသည်။
ILO မြန်မာသည် ကလေးအလုပ်သမားပပျောက်ရေးဆိုင်ရာ (၅) ကြိမ်မြောက် ကမ္ဘာလုံးဆိုင်ရာညီလာခံအပြီး ကလေး အလုပ်သမား အရေးနှင့် ဆက်စပ်တာဝန်ရှိသူများ တက်တက်ကြွကြွပါဝင်ပူးပေါင်း လုပ်ဆောင်နိုင်ရန် ရည်ရွယ်ပြီး ယင်းအစီအစဉ်ကို မိတ်ဆက်ခြင်း ဖြစ်သည်။
အစီအစဉ်ကို ဇွန်လ ၁၂ ရက်နေ့တွင်ကျရောက်သည့် ကမ္ဘာ့ကလေးအလုပ်သမား ဆန့်ကျင်တိုက်ဖျက်ရေးနေ့တွင် အိုင်အယ်လ်အို၏ ဒီဂျစ်တယ်သင်ကြားရေးပလက်ဖောင်းဖြစ်သော https://ecampus.iloyangon.org မှတဆင့် လေ့လာနိုင်မည်ဖြစ်သည်။
ယင်းအစီအစဉ်အတွက် မြန်မာဘာသာ၊ အင်္ဂလိပ်ဘာသာ (၂) မျိုးဖြင့် ရေးဆွဲတည်ဆောက်ထားပြီး ခေါင်းစဉ် (၉) ခု ပါဝင်မည် ဖြစ်ကြောင်းလည်း ILO မြန်မာက အသိပေးထားသည်။ ကလေးအလုပ်သမား ပပျောက်ရေးဆိုင်ရာ (၅) ကြိမ်မြောက် ကမ္ဘာလုံးဆိုင်ရာ ညီလာခံတွင် ဖြန့်ချိခဲ့သော အိုင်အယ်လ်အိုနှင့် UNICEF ဌာနချုပ်တို့၏ အစီရင်ခံစာအရ ၂၀၂၀ ခုနှစ်အစတွင် ကမ္ဘာပေါ်ရှိ ကလေး အလုပ်သမားဦးရေ သန်း ၆၀ ခန့်၊ ကလေး (၁၀) ဦးတွင် (၁) ဦးနီးပါးသည် ကလေးအလုပ်သမားအဖြစ် လုပ်ကိုင်နေရသည်ဟု သိရှိရသည်။
ထိုကြောင့် ILO မြန်မာသည် လူမှုအသိုင်းအဝိုင်းအတွင်း လုပ်ဆောင်မှု ပိုမိုအားကောင်းလာစေရန် ကလေးအလုပ်သမားဆိုင်ရာ မြန်မာ အီလက်ထရောနစ် လေ့လာသင်ကြားရေး အစီအစဉ်အတွက် ယခုကဲ့သို့ ထုတ်ပြန်အသိပေးခဲ့ခြင်းဖြစ်သည်။
သင်ခန်းစာများတွင် အရပ်ဖက်မိတ်ဖက်အဖွဲ့အစည်းများ၊ လူမှုဝန်ထမ်းများ၊ အလုပ်ရှင်များနှင့် အလုပ်သမားအဖွဲ့အစည်းများအနေဖြင့် ၎င်းတို့၏ လူမှုအသိုင်းအဝန်းများတွင် ကလေးအလုပ်သမားများဆိုင်ရာ ကိစ္စရပ်များကို ထိထိရောက်ရောက် လေ့လာဆန်းစစ်ပြီး ဝိုင်းဝန်းထုတ်ဖော်ပြောဆိုပေးနိုင်ရန် ရည်ရွယ်ချက်များပါဝင်သည်။
“မြန်မာနိုင်ငံမှာ ကိုဗစ်-၁၉ ကမ္ဘာ့ကပ်ရောဂါ၊ နိုင်ငံရေးနဲ့ လုံခြုံရေး အကျပ်အတည်းတွေကြောင့် စီးပွားရေးဆိုင်ရာ စိန်ခေါ်မှု တွေနဲ့ ကျောင်းတွေ ပိတ်ထားရလို့ ကလေးအလုပ်သမားအခြေအနေတွေက ပိုမိုဆိုးရွားလာပါတယ်။ သန်းပေါင်း များစွာသော ကလေးတွေဟာ အန္တရာယ်ရှိနေတဲ့ အခြေအနေကိုရောက်ရှိနေပြီး စွမ်းဆောင်ရည်မြှင့်တင်ဖို့နဲ့ အချိန်နဲ့တပြေးညီ စုပေါင်း တုံ့ပြန် ဆောင်ရွက်ဖို့က အရင်ကထက်ပိုပြီး အရေးပါလာပါပြီ”ဟု ILO ၏ မြန်မာနိုင်ငံဆိုင်ရာ ဌာနေကိုယ်စား လှယ်/ဆက်သွယ် ညှိနှိုင်းရေး အရာရှိ Mr Donglin Li က ပြောကြားထားသည်။
ILO သည် လုပ်ငန်းခွင်တွင် အခွင့်အရေးများကို မြှင့်တင်ပေးရန်၊ သင့်တင်လျောက်ပတ်သော အလုပ်အကိုင် အခွင့်အလမ်းများကို အားပေးရန်၊ လူမှုကာကွယ်စောင့်ရှောက်ရေးနှင့် အလုပ်အကိုင်နှင့်သက်ဆိုင်သော ကိစ္စရပ်များတွင် စကားဝိုင်းများကို ပိုမို အားကောင်း စေရန် အလေးအနက်ထားလုပ်ဆောင်နေသော အဖွဲ့ဖြစ်ပြီး ကမ္ဘာ့ကုလသမဂ္ဂ၏ တစ်ခုတည်းသော သုံးပွင့်ဆိုင် အေဂျင်စီလည်း ဖြစ်သည်။
အိုင်အယ်အို၏ မြန်မာနိုင်ငံတွင် လုပ်ဆောင်နေသော အကြောင်းအရာများကို သိရှိလိုပါက www.ilo.org/yangon တွင် ဖတ်ရှုနိုင်နိုင်လည်း အသိပေးချက်တွင် ဖော်ပြထားသည်။
