By MPA 001
အကြမ်းဖက်စစ်ကောင်စီသည် ဆန္ဒပြ လူငယ်တချို့ကို တောင်ဥက္ကလာပတွင် ကားနှင့်တိုက်ဖမ်းကာ ခေါ်သွားခဲ့ကြောင်း တောင်ဥက္ကလာပ မြို့နယ် ၁၂ ရပ်ကွက်နေသူတစ်ဦးက ပြောသည်။
ယနေ့ နေ့လယ် ၂ နာရီခန့်က သင်္ဃန်းကျွန်းမြို့နယ်တစ်နေရာတွင် ဗကသများအဖွဲ့ချုပ်အဖွဲ့ဝင် မြို့နယ်သမဂ္ဂများနှင့် မဟာမိတ် အဖွဲ့အစည်းများ စုပေါင်းပြီး စစ်အာဏာရှင်ဆန့်ကျင်ရေး ပြောက်ကျားသပိတ်ကို ပြုလုပ်ခဲ့ခြင်းဖြစ်သည်။
ယင်းဆန္ဒပြပွဲအတွင်းသို့ အကြမ်းဖက်စစ်ကောင်စီတပ်ဘက်မှ အကြမ်းဖက်အင်အားသုံးဖြိုခွင်းကာ ကားဖြင့် ဝင်တိုက်ခဲ့ကြောင်းနှင့် ဝင်တိုက်စဉ် ဒဏ်ရာရရှိသူမရှိကြောင်း မျက်မြင်တွေ့ရှိခဲ့သူတစ်ဦးက ပြောသည်။
“ကလေးတွေကို ကားနဲ့ဝင်ဖမ်းတာ။ ၁၄ ၁၅ လမ်းဆုံ လမ်းကနေ လိုက်ဖမ်းတာ။ ဆန္ဒပြပွဲမှာတော့ မိတဲ့သူမရှိပါဘူး။ နောက်လိုက် ဖမ်းရင်း မိတယ်လို့တော့ကြားတယ်”ဟု မျက်မြင်တွေ့ရှိခဲ့သူတစ်ဦးက ပြောသည်။
ယင်းနောက် သင်္ဃန်းကျွန်းဘုရားလမ်းဘက်မှ တောင်ဥက္ကလာပမြို့နယ် ၁၂ ရပ်ကွက်ဘက် ထွက်ပြေးသွားသည့် လူငယ်တချို့ကို အကြမ်းဖက်စစ်ကောင်စီနှင့် ရဲတပ်ဖွဲ့မှ ကြားညှပ်ဖမ်းဆီးခဲ့ကြောင်း တောင်ဥက္ကလာပမြို့နယ် ၁၂ ရပ်ကွက်နေသူတစ်ဦးက ပြောသည်။
“လမ်းထိပ်မှာဖမ်းတာ။ ကလေးတွေကားကို ရဲတစ်ယောက်မောင်းသွားတယ်။ ကောင်မလေးတစ်ယောက် ကောင်လေး လေးယောက် လား။ ငါးယောက်လားသေချာမသိဘူး ပါသွားတယ်”ဟု တောင်ဥက္ကလာပမြို့နယ် ၁၂ ရပ်ကွက်နေသူတစ်ဦးက ပြောသည်။
ယင်းဖမ်းဆီးမှုနှင့်ပတ်သက်ပြီး တောင်ဥက္ကလာပမြို့နယ် ရဲစခန်းသို့ ဆက်သွယ်မေးမြန်းရာ ကားနှင့်တိုက် ဖမ်းဆီးခြင်းမှာ မဟုတ်မှန်ကြောင်း နှင့် ဖမ်းဆီးခံရသူများရှိကြောင်း အမည်မဖော်လိုသူရဲတစ်ဦးက ပြောသည်။
“ဖမ်းခံရသူတွေရှိတယ်။ တပ်ကကိုင်တာဆိုတော့ သိချင်ရင်သူတို့မေးမှပဲရမယ်”ဟု အမည်မဖော်လိုသူရဲတစ်ဦးက ပြောသည်။
ယခင်ကလည်း တောင်ဥက္ကလာပမြို့နယ်အတွင်း ဆန္ဒပြသူများကို အကြမ်းဖက်စစ်ကောင်စီသတင်းပေး ကွန်ရက်အဖွဲ့များဖြင့် ဖမ်းဆီးခဲ့သည့် ဖြစ်စဉ်များ ရှိခဲ့သည်။
