By MPA
အကြမ်းဖက်စစ်အာဏာရှင်ကို အမြစ်ဖြုတ်တိုက်ထုတ်ရန်နှင့် နွေဦးတော်လှန်ရေးအတွက် လိုအပ်သည့်နေရာများကို ထောက်ပံ့နိုင်ရန် ရည်ရွယ်တင်ဆက်သည့် “နိုင်ငံပျောက်သူ”ဇာတ်လမ်းတိုရုပ်ရှင်သည် Pa Day Thar Pin ယူကျူ့ချန်နယ်တွင် တင်ပြီး ကိုးနာရီကျော် အတွင်း ကြည့်ရှုသူ ၆ သိန်းကျော်သွားပြီဖြစ်ကြောင်း စုံစမ်းသိရှိရသည်။
“တင်တဲ့အချိန်က မနက် ၈ နာရီဗျ၊ အခု ၅ နာရီမှာ ၆ သိန်းကျော်ပေါ့နော်”ဟု ပဒေသာပင် Page ၏ အက်ဒမင်တစ်ဦးက MPA သတင်းဌာနသို့ ရှင်းပြသည်။
“နိုင်ငံပျောက်သူ” ဇာတ်လမ်းတိုရုပ်ရှင်ကို ယနေ့ မေလ ၃၀ ရက်နေ့တွင် ပြည်သူ့လူထုထံ ချပြခဲ့ပြီး ရုပ်ရှင်တွင် သရုပ်ဆောင်ဒေါင်းနှင့် ပိုင်ဖြိုးသုတို့က သရုပ်ဆောင်ခဲ့သလို ဒါရိုက်တာအဖြစ် ဏကြီးက ပုံဖော်ရိုက်ကူးခဲ့ခြင်းဖြစ်သည်။
“အနုပညာရှင်အစစ်တွေရဲ့ အနုပညာဖန်တီးမှုကို အခုလိုအားပေးကြတာကျေးဇူးတင်ပါတယ်။ ဒီကရတဲ့ငွေကြေးတွေက နွေဦး တော်လှန်ရေး အတွက် အသုံးပြုသွားမှာဖြစ်လို့ ဒေါင်းလုတ်ဆွဲပြီး ပြန်မတင်ကြဖို့ပေါ့နော်။ ပြီးရင် စည်းကမ်းချက်တွေ၊ update သတင်းတွေ သိရဖို့ ပဒေသာပင် Facebook Page ကို like လုပ်ထားပြီး စောင့်ကြည့်ဖို့ပါပဲ”ဟု ပဒေသာပင် Page ၏ အက်ဒမင် တစ်ဦးက MPA သတင်းဌာနသို့ ဆက်လက်ရှင်းပြသည်။
ယင်း ဇာတ်လမ်းတိုရုပ်ရှင်တွင် အနုပညာဖြင့် ပါဝင်ကူညီထားသည့် ဒါရိုက်တာ ဏကြီး၊ ဒေါင်း နှင့် ပိုင်ဖြိုးသုတို့အပါအဝင် ဇာတ်ကားကို ဖန်တီးထားသူများသည် နွေဦးတော်လှန်ရေး၌ ပြည်သူနှင့် အတူရပ်တည်ခဲ့၍ အာဏာသိမ်းစစ်ကောင်စီက မတရား ပုဒ်မတပ်ခဲ့သောကြောင့် မြန်မာပြည်အတွင်းမှ ထွက်ပြေးတိမ်းရှောင်နေရသည်။
