By MPA
စစ်ကိုင်းတိုင်းဒေသကြီးအတွင်းရှိ ကျေးရွာ ၁၁ ရွာမှ ဖုန်းလိုင်းများအား အကြမ်းဖက်စစ်ကောင်စီက မေလ ၂၄ ရက် နံနက်ပိုင်းတွင် စတင်ဖြတ်တောက်ခဲ့သည်ဟု ဒေသခံများထံမှသိရသည်။
ယနေ့ နံနက်အစောပိုင်းတွင် အကြမ်းဖက်စစ်ကောင်စီဝင်များက မြင်းမူ ကျေးရွာအပါအဝင် ရွာပေါင်း ၁၁ ရွာကို ဖုန်းလိုင်းများ ဖြတ်တောက်ခဲ့ပြီး အင်အားအလုံးအရင်းဖြင့် စစ်ကြောင်းထိုး ချီတက်လာသည်ဟု သိရသည်။
“ မြင်းမူမြို့နယ်မှာ ဖုန်းလိုင်းနဲ့ အင်တာနက်လိုင်းများ ပြတ်တောက်သွားပါပြီ ၊ မြင်းမူမြို့နယ် မူးမြစ် အရှေ့၊အနောက်ဘက်မှာ စစ်တပ်က စစ်ကြောင်းနှစ်ခုနဲ့ ကျေးရွာများကို ဝင်ရောက်စီးနင်း ထိုးစစ်ဆင်နေပါတယ် ” ဟု မြင်းမူကျေးရွာအနီးရှိ ဒေသခံတစ်ဦးက ပြောသည်။
ယခင်က အကြမ်းဖက်စစ်ကောင်စီတပ်ဖွဲ့ဝင်များ ကျေးရွာအတွင်းဝင်ရောက်လာပါက အင်အား ၃၀ ၊ ၄၀ ဖြင့်သာ ဝင်ရောက်ခဲ့ပြီး ယခုနောက်ပိုင်းတွင် အဖွဲ့ပေါင်းစုံမှ လူအင်အား၂၀၀နီးပါးဖြင့် ကျေးရွာအတွင်းဝင်ရောက်လာကြောင်းသိရသည်။
“ အရင်ကဆို သူတို့စစ်ကြောင်းထိုးလာရင် လူအင်အားဆယ်ကျော်လောက်နဲ့ပဲလာတယ်။ အခုနောက်ပိုင်းတော့စစ်တပ်၊ ရဲ ၊ပျူစောထီး တပ်ဖွဲ့တွေပေါင်းပြီး ရွာတွေထဲကို အင်အားရာကျော်တွေနဲ့ဝင်တယ် ” ဟု ပြည်သူ့ကာကွယ်ရေးတပ်ဖွဲ့ဝင်တစ်ဦးကပြောသည်။
အကြမ်းဖက်စစ်ကောင်စီများက MPT ၊ Telenor၊ Mytel စသည့်လိုင်းများကိုပိတ်ထားပြီး ဖုန်းကြိုးဖြင့်ဆက်သွယ်ရသောလိုင်းများပင် အကုန်ဖျက်ထားကြောင်းသိရသည်။
“ အခုလောလောဆယ်တော့ လိုင်းတွေအကုန်ပိတ်ထားတယ် ။ 2Gတောင်မရတော့ဘူး။ နေ့လည် ၁နာရီလောက်မှ ပြန်ဖွင့် ပေးမယ် ပြောတယ် ” ဟု ၎င်းကဆက်လက်ပြောကြားသည်။
လတ်တလော ဖုန်းလိုင်းအားလုံးနှင့် အင်တာနက်လိုင်း (2G ပါမရ) ဖြတ်တောက်ခံထားရသည့်မြို့နယ်များမှာ ခင်ဦး၊ မင်းကင်း၊ မုံရွာ၊ရေဦး၊ ကျွန်းလှ၊ ယင်းမာပင်၊ ပုလဲ၊ ကနီ၊ ကန့်ဘလူ၊ ကောလင်း၊ မြင်းမူ မြို့နယ်များဖြစ်ပြီး ဖုန်းလိုင်းနှင့် အင်တာနက်လိုင်း ဖြတ်တောက်ခံရသည့် မြို့နယ်များ ထပ်တိုးလာနိုင်ကြောင်း မြေပြင် ဆက်သွယ်ရေး PDFကွန်ရက်များထံမှ သိရှိရသည်။
#စစ်ကိုင်း#မြင်းမူ#၁၁ရွာ#ဖုန်း#အင်တာနက်#ဖြတ်#
