By MPA/007
မြောက်ဒဂုံ၊ ရွှေပြည်သာနှင့်ဆင်ခြေဖုံးမြို့နယ်များတွင် ဂရန်မြေထက် စလစ်မြေက ပိုပြီးအဝယ်လိုက်နေကြောင်း အိမ်ခြံမြေ အကျိုးဆောင်များက ပြောသည်။
“အရင်ကလောက် အိမ်ခြံမြေဈေးကွက်က အရောင်းမသွက်ပေမယ့် အခုလက်ရှိမှာတော့ ပုံမှန်လည်ပတ်နိုင်တယ်လို့ ဆိုရပါမယ်။ အိမ်ခြံမြေ အရောင်းအဝယ်တွေ ဈေးပေါ်မူတည်ကာ အရောင်းအဝယ်လုပ်ကြပါတယ်။ ဈေးတန်တာထက် သိန်းတစ်ထောင် လောက်ခွာပြီး ဈေးခေါ်ထားတာမျိုးတွေလည်း ရှိကြတယ်။ အိမ်ခြံမြေဈေးကွက်မှာ အရောင်းအဝယ် ဖြစ်တာကတော့ တိုက်ခန်း အရောင်းအဝယ် အများစုဖြစ်ပါတယ်။ ကျပ်သိန်း ၁၀၀ ကျော်ကနေ သိန်းထောင်ဂဏန်းထိ အရောင်းအဝယ်ဖြစ်နေပါတယ်”ဟု အိမ်ခြံမြေအကျိုးဆောင်တစ်ဦးက ပြောသည်။
အကြမ်းဖက်စစ်ကောင်စီ အာဏာသိမ်း ကာလအတွင်း အိမ်ခြံမြေအရောင်းအဝယ် ဈေးကွက်များ ဆက်လက်တည်ငြိမ်နေသည်။
“အခုလက်ရှိက စီးပွားရေးကကျပ်တည်းလာတော့ အရင်က ငွေပိုလို့ဝယ်ထားတဲ့ အိမ်တွေတိုက်ခန်းတွေကို ဈေးသင့်သလောက်နဲ့ ရောင်းပြီး ထက်ဝက်လောက်နဲ့ရတဲ့ အိမ် လေးတွေ ပြန်ဝယ်ထားရတယ်။ ဘဏ်တွေကနေလည်း ငွေထုတ်ရတာ အဆင်မပြေတော့ အခုအခြေအနေကလည်း လက်ထဲမှာ ငွေတွေဆောင်ထားရတာလည်း အဆင်မပြေတော့ ဝယ်ရောင်းပဲလုပ်နေရတယ်။ အခု အခြေအနေမှာက အိမ်တစ်လုံးရောင်းရင် အုပ်ချုပ်ရေးမှူးရုံးမှာ စာချုပ်ချုပ်ရပြီးတော့ ရောင်းရငွေရဲ့၁၀ရာခိုင်နှုန်း လောက်ကို ပေးနေရတယ်။ စီးပွားရေးက ကျပ်တည်းလို့ လက်ထဲငွေမရှိလို့ အိမ်ရောင်းပါတယ်ဆိုမှ ရတဲ့အမြတ်ထဲက ပေးလိုက်ရသလို ဖြစ်နေတာပေါ့”ဟု အိမ်ပိုင်ရှင်တစ်ဉီးက ပြောသည်။
“အခုဆို စီးပွားရေးကလည်း အဆင်မပြေ၊ အလုပ်အကိုင်တွေကလည်း ရှားပါးနေတော့ ကျွန်တော်တို့မှာ အိမ်ပိုင်လေးကိုရောင်းချပြီး ပြန်ဝယ်ဖို့လည်း ငွေအားကမနိုင်တော့ အိမ်ငှားဘဝကို ရောက်နေရတယ်။ အခုလက်ရှိအခြေအနေကလည်း စီးပွားရေးလုပ်ငန်း လုပ်ဖို့ ဘယ်လိုမှအဆင်မပြေနိုင်တဲ့ အခြေအနေဖြစ်နေပါတယ်”ဟု အိမ်ရောင်းလိုက်သူတစ်ဦးက ပြောပါသည်။
တိုက်ခန်းဈေးကွက်တွင် ယခင်ကဲ့သို့ ကြိုပွိုင့်ဝယ်ယူမှုများ အဆင်မပြေရှိလာပြီး နားလည်သဘောတူညီမှုနှင့် စာချုပ် ချုပ်ဆိုကာ အရစ်ကျပေးချေမှု ပြုလုပ်လာကြတာမျိုးများလည်း ရှိနေသည်။ တိုက်ခန်းအရောင်းအဝယ်ဈေး မြင့်တက်နေပြီး လုံးချင်းအိမ်များ ရောင်းဝယ်မှုများသည်လည်း အုပ်ချုပ်ရေးမှူးရုံးကို ပေးနေရခြင်းနှင့် အဆင်မပြေမှုများ ဖြစ်နေသည်ဟု စုံစမ်းသိရှိရည်။
