By MPA
ကရင်ပြည်နယ်၊ မြဝတီမြို့နယ် ရွှေကုက္ကိုလ်ကျေးရွာအတွင်း အကြမ်းဖက်စစ်ကောင်စီလက်ခံဖြစ်သော BGF တပ်ဖွဲ့ဝင်များအား ကြိုဆိုရန်အတွက် ယနေ့ မေလ ၁၁ရက်နေ့တွင် ရွှေကုက္ကိုလ် စာသင်ကျောင်းတွင် လာရောက်စုဝေးရမည်ဟု ဒေသခံများက ပြောသည်။
ရွှေကုက္ကိုလ်ကျေးရွာရှိအထကကျောင်းကြီးတွင် ၆ တန်းမှ ၁၀ တန်းထိကျောင်းသားများလာရောက်စုဝေးပြီး ကြိုဆိုပွဲများ ပြုလုပ်ကြရမည်ဖြစ်ကြောင်းသိရသည်။
“သွားမကြိုချင်ဘူး။ ရွာမှာရှိတဲ့ရွာသားတစ်ချို့လည်း စိတ်ညစ်နေကြတယ်။ သူတို့ကိုကြိုဆိုဖို့ Facebook ပေါ်မှာတောင် တင်ထားတယ်”ဟု ရွှေကုက္ကိုလ်ရှိဒေသခံတစ်ဦးက ပြောသည်။
ထိုကြိုဆိုပွဲနှင့်ပတ်သက်ပြီး ကျေးရွာရှိပြည်သူများအား မဖြစ်မနေ သွားရောက်ကြိုဆိုရမည်ဖြစ်ကြောင်းနှင့် သွားရောက် ကြိုဆိုခြင်း မရှိပါက ဒဏ်ငွေများပေးဆောင်ရမည်ဖြစ်ကြောင်းလည်း သိရသည်။
“ကျွန်တော်တို့ကြားတာ ဒုကာကွယ်ရေးချုပ်စိုးဝင်း ရွှေကုက္ကိုလ်မှာရောက်နေတယ်။ သူနဲ့ရှေ့တန်းကပြန်လာတဲ့ ရဲဘော်တွေကို ကြိုရမယ်ကြားတယ်။ သွားမကြိုတဲ့အိမ်တွေဆို တစ်အိမ်ကို ဘတ် ၂ ထောင်ဆီပေးရမယ်လို့ ပြောတယ်”ဟု ဒေသခံတစ်ဦးက ပြောသည်။
အကြမ်းဖက်စစ်ကောင်စီလက်အောက်ခံတပ်ဖွဲ့ BGF တပ်ဖွဲ့များသည် အာဏာသိမ်းပြီးသည့်နောက် ပြည်သူများနှင့်တစ်သားတည်း မရပ်တည်ဘဲ အကြမ်းဖက်စစ်ကောင်စီ၏စေခိုင်းမှုများကိုသာ ဆက်လက်လုပ်ကိုင်နေကြပြီး ယင်းအဖွဲ့ကို ဗိုလ်ချစ်သူက ဦးဆောင်နေခြင်းဖြစ်သည်။
