By MPA
မန္တလေးတိုင်းဒေသကြီး ကျောက်ဆည်မြို့မှ NLD အမာခံနှစ်ဦးဖြစ်သော ဦးညိုထွန်းဇော်နှင့် ဦးတင်သိန်းတို့နှစ်ဦးသည် ယမန်နေ့ မေလ ၅ ရက်နေ့ညက ကျောက်ဆည် စဉ့်ကိုင်-ပလိပ်လမ်းဆုံတွင် အသတ်ခံရကြောင်း ဒေသခံများထံမှသိရသည်။
ကျောက်ဆည်မြို့ကြက်မင်းတွန်ရပ်ကွက်နှင့် တံတားလည်ရပ်ကွက်တွင်နေထိုင်သော ဦးညိုထွန်းဇော်နှင့် ဦးတင်သိန်းအား မေလ ၅ ရက်နေ့ နံနက်ပိုင်းတွင် အကြမ်းဖက်စစ်ကောင်စီနောက်ခံ သွေးသောက်တပ်ဖွဲ့က အရပ်ဝတ်များဖြင့် လာရောက် ဖမ်းဆီး ခေါ်ဆောင်သွားပြီး ညပိုင်းတွင် ၎င်းတို့၏အလောင်းနှစ်လောင်းအား တစ်နေရာထဲတွင်တွေ့ရှိခဲ့ရသည်။
“သူတို့နှစ်ယောက်က အရင်က NLD အမာခံတွေပါ အခုတော့ သူတို့က အေးအေးဆေးဆေးဘဲနေတယ်။။ နိုင်ငံရေးတွေလည်း ရင်ကလိုလည်းမလုပ်တော့ဘူး။ သူတို့ကိုလာဖမ်းတဲ့နေ့ကလည်း အရပ်ဝတ်တွေနဲ့လာတယ်။ မေးစရာရှိလို့ဆိုပြီးခေါ်သွားတယ်။ ပြီးတော့သူတို့ကိုသတ်လိုက်တယ်’’ ဟု ၎င်းတို့နှင့်နီးစပ်သူတစ်ဦးက ပြောသည်။
အသတ်ခံရသည့် ဦးညိုထွန်းဇော်နှင့် ဦးတင်သိန်းတို့၏ လည်ပင်းတွင်လည်း သွေးသောက်အဖွဲ့၏ လည်ဆွဲကဒ် ချိတ်ဆွဲထားကြောင်းလည်း ဒေသခံများထံမှသိရသည်။
“သေသွားတဲ့ဦးလေးနှစ်ယောက်ရဲ့အလောင်းက ကြည့်လို့တောင်မရဲဘူး။ တော်တော်ဆိုးဆိုးဝါးဝါးကိုသတ်ထားတယ်။ သူတို့ကို သတ်တဲ့သူတွေက စစ်ဘောမအဖွဲ့ သွေးသောက်အဖွဲ့တွေပေါ့။ သူတို့ကအငြိုးတွေနဲ့ ရက်ရက်စက်စက်ကိုသတ်သွားတာ’’ဟု ကြက်မင်းတွန် ရပ်ကွက်သားတစ်ဦးက ပြောသည်။
မန္တလေးမြို့အကြမ်းဖက်စစ်အုပ်စုနောက်ခံ သွေးသောက်အဖွဲ့များသည် ၎င်းတို့၏ထုတ်ပြန်ချက်တွင် တပ်မတော်သားတစ်ဦးသေလျှင် NLD ၅ ဦး ပြန်ပေးရမည်ဖြစ်ကြောင်းနှင့် ပြည်သူတစ်ဦးသေလျှင်လည်း NLD ၅ဦး ပြန်ယူမည်။ လဲနိုင်ရင်လဲကြဟု အသိပေး ထားသည်။
လက်ရှိတွင် မန္တလေးတိုင်းအတွင်း သွေးသောက်အဖွဲ့အနီရောင်စစ်ဆင်ရေး (MDY) စာသားပါ အနီရောင်လည်ဆွဲကဒ် ချိတ်ဆွဲကာ စွန့်ပစ်ထားခဲ့သည့် အလောင်းများကို ရက်ဆက်တိုက်ဆိုသလို တွေ့နေရပြီး အသတ်ခံရသူများသည် အမျိုးသားဒီမိုကရေစီအဖွဲ့ချုပ် (NLD) ပါတီနှင့် နှီးနွယ်ပတ်သက်နေသူများဖြစ်ကြောင်း စုံစမ်းသိရှိရသည်။
