4 May By MPA 001
တနင်္သာရီတိုင်း၊ ပုလောမြို့နယ်တွင် သွေးသောက်အဖွဲ့ ဖွဲ့စည်းပြီဟုဆိုကာ NLD ပါတီဝင်များနှင့် PDF မိသားစုဝင်များကို သတ်တော့မည်ဖြစ်ကြောင်း ယနေ့ မေလ ၄ ရက်နေ့တွင် ပုလောမြို့အတွင်း စာကပ်ကြေညာထားသည်ဟု ပုလောမြို့နေ ပြည်သူများက ပြောသည်။
အထက်ပါ ခြိမ်းခြောက်စာကို ပုလောမြို့နယ်အတွင်းရှိ လူမြင်ကွင်းများဖြစ်သော ဓာတ်တိုင်၊ အုတ်နံရံနှင့် လမ်းမီးတိုင်များတွင် ကပ်ထားခြင်းဖြစ်ပြီး ယနေ့နံနက် ၄နာရီခန့်က ပျူစောထီးများ ဆိုင်ကယ်ဖြင့် လိုက်လံကပ်ခဲ့ခြင်းဖြစ်ကြောင်း ပုလောမြို့နေ ပြည်သူတစ်ဦးက ပြောသည်။
“မနက် ၄ နာရီမထိုးခင်လောက်က ပြည်သူ့စစ်တွေ သေနတ်တွေလွယ်ပြီး လိုက်ကပ်နေတာ။ အစက ဗုံးထောင်တယ်ထင်နေတာ။ နောက်မှ စာကပ်သွားမှန်းသိတယ်”ဟု ပုလောမြို့နေပြည်သူတစ်ဦးက ဆက်လက်ရှင်းပြသည်။
ယနေ့ မေလ ၄ရက်နေ့မှ စတင်ပြီး ပုလောမြို့နယ်အတွင်း အကြမ်းဖက်စစ်ကောင်စီတပ် လက်ဝေခံ ပြည်သူ့စစ် ဒေသအခေါ် ပျူစောထီးအဖွဲ့များသည် သွေးသောက်အဖွဲ့ (ပုလော) ဟု အမည်ပြောင်းကာ အနီရောင်စစ်ဆင်ရေးအဖြစ် ကြေညာခဲ့ခြင်းဖြစ်ကြောင်း ပုလောမြို့နယ် ပုလောကုန်းရွာနေ အမည်မဖော်လိုသူ ပျူစောထီးအဖွဲ့နှင့် နီးစပ်သူတစ်ဦးက ပြောသည်။
“အခုမှ သူတို့ကို တပ်ကစဖို့ပြောတာ။ အရင်ကလည်း သေနတ်ကိုင်ခိုင်းထားပေမယ့် အခုဟာက အနီတွေမှန်သမျှ သတ်ခွင့်ပြု ပေးလိုက်တဲ့ သဘောပေါ့။ ပျူတွေကြိုက်တာလုပ် တပ်ကရှင်းပေးမယ်ဆိုတာမျိူး။ မစ်ရှင်ကြီးတွေကျရင် တပ်ကလူတွေပါ ထည့်ပေးမယ်လို့ ပြောထားတာမျိုးရှိတယ်။ သွေးချောင်းစီးမယ့်သဘောပဲ”ဟု ၎င်းက ပြောသည်။
ယနေ့စတင်ဖွဲ့စည်းလိုက်သည့် ပျူစောထီးအသွင်ပြောင်း သွေးသောက်အဖွဲ့၏ အနီရောင်စစ်ဆင်ရေးအပေါ် ပုလော ပြည်သူ့ကာကွယ်ရေးတပ်ဖွဲ့ (PDF)၊ ပုလောဒေသကာကွယ်ရေးတပ်ဖွဲ့(PRDF)နှင့် ဒေသခံပြည်သူ့ကာကွယ်ရေး (ပကတ) များက စောင့်ကြည့် အကဲခတ်နေကြောင်းနှင့် လက်နက်မရှိသောပြည်သူအား အနိုင်မကျင့်ဘဲ မိမိတို့အား လက်နက်ကိုင်ချင်းပီပီ လာရောက်တိုက်ခိုက်ရန် စိန်ခေါ်ကြောင်း PRDF အဖွဲ့၏ တာဝန်ရှိသူတစ်ဦးက ပြောသည်။
“သွေးသောက်အဖွဲ့အကြောင်း ကြားနေတာတော့ကြာပြီ။ အခုမြို့မှာ သူတို့ရှိလာပြီဆိုတော့ အပြစ်မဲ့ပြည်သူတွေမသေအောင် ကျွန်တော်တို့ကာကွယ်ရမယ်။ သူတို့က Media ကိုလည်း အသုံးပြုလာတဲ့သဘောရှိတယ်။ ရက်ရက်စက်စက်သတ်ပြီး ဆွဲပြားချိတ်တဲ့သဘောကိုကြည့်ရင် နောက်ကွယ်က စစ်ခွေးတွေကြိုးကိုင်ပြီး မစ်ရှင်နဲ့ သွားပုံရတယ်။ ကျွန်တော်တို့ တိုက်ရိုက်စိန်ခေါ်ပါတယ်။ ဇရှိရင် လာတိုက်ပါ”ဟု PRDF အဖွဲ့၏ တာဝန်ရှိသူတစ်ဦးက ပြောသည်။
ပုလောမြို့နယ်က ပျုစောထီးများအနေဖြင့် သွေးသောက်အဖွဲ့အဖြစ် တရားဝင်မကြေညာမီကတည်းက NLD ပါတီဝင် နှင့် နီးစပ်ရာအသိုင်းအဝိုင်းများကို လိုက်လံသတ်ဖြတ်ခဲ့ကြောင်းနှင့် ပြီးခဲ့သည့် ဧပြီလ ၂၃ ရက်နေ့က ပုလောမြို့နယ်၊ အမှတ် ၂ ရပ်ကွက်ရှိ NLD ပါတီဝင် ဦးအေးလွင်အိမ်ကို ဗုံးခွဲခဲ့ပြီး ယင်း အိမ်နေ NLD ပါတီ အမာခံထောက်ခံသူ ဒေါ်ချစ်သူ ဒဏ်ရာရရှိကာ ဆေးရုံသို့ ပို့ဆောင်ခဲ့ရကြောင်း စုံစမ်းသိရသည်။
Photo – MPA
ပုံစာ-ယနေ့ဓာတ်မီးတိုင်များတွင် သွေးသောက်အဖွဲ့မှ ကပ်ထားသည့် အနီရောင်စစ်ဆင်ရေးကြေညာချက်
