မွန်ပြည်နယ် သထုံမြို့ရှိ စစ်ဘေးရှောင် ၇၀၀၀ ကျော် သောက်သုံးရေနှင့် စားဝတ်နေရေး အခက်ကြုံ

4 May 2022 By MPA

မွန်ပြည်နယ်၊ သထုံမြို့ KNU တပ်မဟာ (၁) နယ်မြေထဲတွင် စစ်ဘေးရှောင်နေသည့် စစ်ရှောင် ရွာသား ၇၀၀၀ ကျော်သည် သောက်သုံးရေ နှင့် စားဝတ်နေရေးအတွက် အခက်ခဲကြုံတေ့ွနေရသည်ဟု ဒေသခံများထံမှသိရသည်။

သထုံခရိုင်၊ ဘီးလင်းမြို့နယ်အတွင်း KNU တပ်မဟာ (၁) ထိန်းချုပ်နယ်မြေဖြစ်သော ဝင်းတာပန်ကျေးရွာ၊ မြစ်ကျိုးကျေးရွာမှ ကျေးရွာစုစုပေါင်း ၉ ရွာတွင်ရှိသည့် ပြည်သူများ စစ်ဘေးရှောင်နေကြရပြီး ယခုလို အခက်ခဲများ ကြုံတွေ့နေရခြင်းဖြစ်သည်။

သောက်သုံးရေလုံလောက်မှုမရှိသောကြောင့် စစ်ဘေးရှောင်နေရသူများမှာ ချောင်းရေကိုသာ သောက်သုံးရသဖြင့် ဝမ်းပျက်ဝမ်းလျှောရောဂါများလည်း ကြုံတွေ့နေကြရသည်။

“ကျွန်တော်တို့ချောင်းရေကိုဘဲ သောက်နေရတယ်။ ကလေးတွေရော အသက်ကြီးသူတွေရောသူတို့က ကိုယ်ခံအားသိပ်မရှိတော့ ဝမ်းပိုပြီးပျက်တာပေါ့။ ကျွန်တော်တို့လိုအပ်တာအများကြီးပေါ့။ ဒါပေမဲ့ လောလောဆယ်မှာ သောက်ရေတွေ အဓိကလိုအပ်တယ်။ ဒီမှာကတစ်ခုခုဖြစ်ရင် ကျွန်တော်တို့ကို ဆေးကုပေးမဲ့ ဆရာတွေလည်းမရှိဘူးလေ’’ဟု ဘီလင်း စစ်ရှောင်များအား ကူညီနေသူတစ်ဦးက ပြောသည်။

ဘီးလင်းမြို့အတွင်းတွင် ပစ်ခတ်မှုများဖြစ်ပွားပြီးနောက် ယခင်ကထက် အစစ်အဆေးများ ပိုမိုပြုလုပ်လာသည့်အတွက် စစ်ဘေးရှောင်များအား သွားရောက်ကူညီရန် များစွာအခက်ခဲဖြစ်ကြောင်းကိုလည်း ၎င်းက ဆက်ပြောသည်။

“ကျွန်တော်တို့စစ်ဘေးရှောင်တွေကို ပစ္စည်းတွေသွားလှူဖို့က တော်တော်ခက်ခဲတယ်။ သွားမဲ့လမ်းမှာ စစ်တပ်ဂိတ်တွေရှိတယ်။ အသေစစ်တာ။ အခုလောလောဆယ်ဆယ်တော့ စစ်ဘေးရှောင်နေရတဲ့သူတွေကို KNU တပ်မဟာ (၁) က တာကူညီပေးနေတယ်”ဟု စစ်ရှောင်များအား ကူညီနေသူက ပြောသည်။

ပြီးခဲ့သည့် မေလ ၂ ရက်နေ့တွင်လည်း အကြမ်းဖက်စစ်ကောင်စီများက လေယာဉ် ၂ စီးဖြင့် ဝင်းတာပန် ကျေးရွာအတွင်း ဗုံးကြဲ တိုက်ခိုက်ခဲ့တာကြောင့် ကျေးရွာရှိ နေအိမ် ၃လုံးနှင့် ဘုန်းကြီးကျောင်းတစ်ကျောင်း မီးလောင်ပျက်စီးသွားသည်။

ပြီးခဲ့သည့် ဧပြီလ ၂၃ ရက်မှ ၂၅ ရက်နေ့အထိ KNU တပ်မဟာ (၁) နယ်မြေ၊ သထုံခရိုင် ဘီးလင်းမြို့နယ်အတွင်း အကြမ်းဖက် စစ်ကောင်စီတပ်ဖွဲ့၊ BGF နယ်ခြားစောင့်တပ်နှင့် KNLA ပူးပေါင်းတပ်ဖွဲ့ ဝင်များ စစ်ရေးစတင်တင်းမာလာမှုကြောင့် ကျေးရွာ ၉ ရွာရှိ ပြည်သူများ အိုးအိမ်စွန့်ခွာပြီး ဘေးလွတ်ရာသို့ ထွက်ပြေးတိမ်းရှောင်ခဲ့ကြရသည်။

#မွန်ပြည်နယ် #စစ်ဘေးရှောင် #MPA

Photo – MPA