By MPA
အကြမ်းဖက်စစ်တပ်က ဒီဇင်ဘာလ၂၃ရက်နေ့တွင် စစ်ရဟတ်ယာဉ်များဖြင့် ပစ်ခတ်မှုများပြုလုပ်ခဲ့သော စစ်ကိုင်းတိုင်း ကလေးမြို့တောင်ပိုင်းရှိ နတ်ချောင်းကျေးရွာတွင် အရပ်သားသေဆုံးမှုများရှိေနကြောင်းသိရသည်။
ကလေးမြို့တောင်ဘက်ရှိ နတ်ချောင်းကျေးရွာအနီးကို အကြမ်းဖက်စစ်တပ်က ဒီဇင်ဘာ ၂၃ ရက်နေ့ နေ့လယ်ပိုင်းကစတင်ပြီး ရဟတ်ယာဥ်များအသုံးပြုကာ ပစ်ခတ်ခဲ့သည့်အတွက် အရပ်သားများ၅ဦးထက်မနည်းသေဆုံးကြောင်း ကလေးဒေသခံကာကွယ်ရေးအဖွဲ့ဝင်တစ်ဦးကပြောသည်။
“ အရပ်သားသေဆုံးမှုေတွရှိပါတယ်ဗျ ။ စကစတပ်တွေ ခုထိရွာက မဆုတ်သေးတော့ အကုန်မသိရသေးပါ။ အရပ်သားသေဆုံးတာ ၅ ဦးကနေဆယ်ဦးလောက်အထိတော့ သတင်းတွေကြားနေရပါပြီ။” ဟု၎င်းကဆိုသည်။
ဒီဇင်ဘာလ၂၃ရက်နေ့နံနက်ပိုင်းတွင် ကလေးမြို့နယ် နတ်ချောင်းကျေးရွာစာသင်ကျောင်းတွင် တပ်စွဲထားသော အကြမ်းဖက်စစ်တပ်နှင့် ဒေသခံကာကွယ်ရေးအဖွဲ့များဖြစ်သည့် ကလေးပြည်သူ့ကာကွယ်ရေးတပ်ဖွဲ့(PDF-Kalay)၊ ပြည်သူ့ကာကွယ်ရေးအဖွဲ့(ပကဖ)၊ CNDFအဖွဲ့များအကြားထိပ်တိုက် တိုက်ပွဲဖြစ်ပွားခဲ့ပြီးနောက် အကြမ်းဖက်စစ်တပ်အနေဖြင့် လေကြောင်းအသုံးပြုတိုက်ခိုက်ခဲ့ခြင်းဖြစ်သည်။
လေကြောင်းဖြင့် ပစ်ခတ်မှုများပြုလုပ်ပြီးနောက် စစ်တပ်သည် ကျေးရွာအတွင်းမှနေအိမ်များကိုမီးရှို့ဖျက်ဆီးခြင်းများပြုလုပ်ခဲ့ပြီး ကျေးရွာအတွင်း၌တပ်စွဲခဲ့သည်။
လက်ရှိအချိန်တွင် ကယားပြည်နယ်၊ကရင်ပြည်နယ်၊ကချင်ပြည်နယ်၊ချင်းပြည်နယ်စစ်ကိုင်းတိုင်းနှင့်မကွေးတိုင်းတို့တွင် အကြမ်းဖက်စစ်တပ်နှင့် ဒေသခံကာကွယ်ရေးအဖွဲ့များအကြား တိုက်ပွဲများခပ်စိပ်စိပ်ဖြစ်ပွားလျက်ရှိနေပြီး စစ်တပ်အနေဖြင့် လေကြောင်းကိုပါအသုံးပြုပြီးတိုက်ခိုက်လာသည်ကိုတွေ့ရသည်။
Photo-CJ (မနေကညနေပိုင်းတွင်လေကြောင်းဖြင့်ပစ်ခတ်မှုများပြုလုပ်သည်ကိုတွေ့မြင်ရပုံ)
