By Bala / MPA
ကရင်နီပြည်နယ်ရှိ ဆေးခန်း ၄၅ခုပေါင်းကာ ချစ်ကြည်ရေးဘောလုံးပွဲ ကျင်းပခဲ့ကြောင်း ကရင်နီသူနာပြုများအစည်းအရုံး(KNA)ထံမှ သိရသည်။
ယနေ့(မေ ၁၀ရက်)၊ နံနက် ၉နာရီမှ စတင်ကာ ဒီးမော့ဆိုမြို့နယ်၊အနောက်ခြမ်းတစ်နေရာတွင် ကရင်နီပြည်နယ်ရှိ ဆေးခန်း ၄၅ခုမှ ဆေးခန်း ဆရာ/ဆရာမများနှင့် စေတနာ့ဝန်ထမ်းများ၏ ချစ်ကြည်ရေးဘောလုံးပွဲကို ဦးဆောင်ကျင်းပခဲ့ခြင်းဖြစ်ကြောင်း KNA၏ ရုံးဝန်ထမ်းတစ်ဦးဖြစ်သူ မဂျုးဂျုးက ပြောသည်။
“ဖက်ဒရယ်ကျန်းမာရေးစနစ်အခြေခံကနေစပြီး ကျမတို့စဉ်းစားတယ်။ ဆရာ၊ဆရာမတွေက လူထုတွေနဲ့အဓိက ထိတွေ့တဲ့သူတွေဖြစ်တယ်။ အဲ့ဒါမို့ ဆေးခန်းတစ်ခုနဲ့တစ်ခု ရင်းနှီးမှုရအောင်နဲ့ ရုံးကသူတွေနဲ့လည်း ချိတ်ဆက်မှုရအောင် ကျင်းပရခြင်းဖြစ်တယ်။ ပြီးတော့ အမျိုးသမီးတွေရဲ့ လုပ်နိုင်စွမ်းကိုလဲ ဖော်ပြချင်လို့ပါ”ဟု ၎င်းက ပြောသည်။
ယနေ့ ချစ်ကြည်ရေးဘောလုံးပွဲအတွင်း ပထမဆုအား ဖရူဆိုမြို့နယ်၊ ဆေးခန်းများအသင်းမှ အနိုင်ရရှိခဲ့ပြီး ဒုတိယဆုကို မိုးဗြဲမြို့နယ် ဆေးခန်းများအသင်းမှ အနိုင်ရရှိခဲ့ကြောင်း သိရသည်။
“ကျမတို့ ဖရူဆိုအသင်းအနေနဲ့ ဒီနေ့ သုံးသင်းနဲ့ယှဉ်ပြိုင်ခဲ့ပါတယ်။ နောက်ဆုံးပွဲမှာ သရေကျလို့ အချိန်ပို ငါးမိနစ်စီကန်ရတာပေါ့၊ အသက် ၄၀ကျော်တွေပါပေမဲ့လဲ လူငယ်တွေနဲ့ ယှဉ်ပြိုင်ပြီး ပထမဆုရယူနိုင်ခဲ့ပါတယ်။ ဒီလိုမျိုးတစ်ထောင့်တစ်နေရာက ပါဝင်ခွင့်ရလို့အရမ်းကျေးဇူးတင်ပါတယ်။ ဒီနေ့ဆို ဟန်ဆောင်ပန်ဆောင်မဟုတ်ဘဲ စိတ်ဓာတ်ခွန်အားအပြည့်နဲ့ ဝင်ကန်ခဲ့ရတာမို့ပါ”ဟု အနိုင်ရရှိသွားသည့် ဖရူဆိုအသင်း၏ တာဝန်ရှိသူတစ်ဦးက ပြောသည်။
တော်လှန်ရေးကာလ လေးနှစ်အတွင်း ဆေးပညာရပ်ဆိုင်ရာ ပညာရှင်များ၊ ကျွမ်းကျင်သူများအနေဖြင့် စိတ်ဓာတ်ခွန်အားများစွာလိုအပ်နေသည့်အတွက် ယခုကဲ့သို့ ချစ်ကြည်ရေးဘောလုံးပွဲစဉ်များကျင်းပခြင်းသည် ကောင်းမွန်သည့် လုပ်ရပ်တစ်ခုဖြစ်ကြောင်း ဒုတိယဆုရရှိခဲ့သည့် မိုးဗြဲအသင်းမှ ဆရာမ ကျေးလက်က ပြောသည်။
“ကျမတို့မှာ တစ်လလုံးလုံးဆိုရင်တောင် နားရက်မရှိပါဘူး။ တစ်ခါတလေမှာ လူတစ်ယောက်က အနားယူဖို့အများကြီးလိုပါတယ်။ အခုကလူမလုံလောက်တဲ့ အခါကြတော့ ရှေ့ရော၊ နောက်ရောပြေးရလွှားရတဲ့ခါကြတော့ လူကDepressionဝင်တယ်။ ရှေ့မှာကြတော့ အမြောက်ကျလိုက်၊ ဒရုန်းကျလိုက်နဲ့ဆိုတော့ လူက Trumaတွေရတယ်။ ဒီလိုဘောလုံးပွဲလုပ်ခြင်းအားဖြင့် စိတ်ကလွတ်လပ်သွားတယ်။ အရင်လိုစိတ်မျိုးပြန်ဖြစ်သွားတာပေါ့”ဟု ၎င်းက ပြောသည်။
လက်ရှိတွင် ကရင်နီပြည်အတွင်း စစ်ကောင်စီနှင့် တိုက်ပွဲများဆက်တိုက်ဖြစ်နေပြီး မိုးဗြဲမြို့တွင်လည်း တိုက်ပွဲပြင်းထန်နေသည့်အတွက် ကရင်နီရှိ ကျန်းမာရေးဝန်ထမ်းများအနေဖြင့် စိတ်ပိုင်းဆိုင်ရာ ထိခိုက်မှုများစွာ ကြုံတွေ့နေရကြောင်း သိရသည်။
