By Nway / MPA
စစ်အုပ်စုတင်မက အခြားသောလက်နက်ကိုင်အစုအဖွဲ့များကပါ အမျိုးသမီးများအပေါ် လိင်အကြမ်းဖက်မှုများ ကျူးလွန်နေကြောင်း Burmese Women’s Union (BWU) ထံမှ သိရသည်။
၂၀၂၁ခုနှစ် စစ်တပ်အာဏာသိမ်းပြီးနောက် အသက်အန္တရာယ်လုံခြုံရေးကြောင့် အမျိုးသမီးများနှင့် ကလေးငယ်အချို့ နေရပ်စွန့်ခွာ စစ်ဘေးရှောင်နေရကြရပြီး အမျိုးသမီးများအပေါ် စစ်တပ်နှင့် အခြားသော လက်နက်ကိုင်အစုအဖွဲ့များက လက်နက်အားကိုးဖြင့် လိင်အကြမ်းဖက်မှုများ ကျူးလွန်နေကြကြောင်း ကောက်ယူထားသည့် အချက်အလက်မှတ်တမ်းများအရ သိရှိရသည်ဟု Burmese Women’s Union (BWU)၊ တွဲဖက်အတွင်းရေးမှူးတစ်၊ မဝေဝေက ပြောသည်။
“ လက်နက်ကိုင်ထားတဲ့သူတွေက လက်နက်အားကိုးနဲ့ အမျိုးသမီးတွေအပေါ် လိင်ပိုင်းဆိုင်ရာအ ကြမ်းဖက်မှုတွေ၊ မုဒိမ်းမှုတွေကို ကျူးလွန်တာမျိုးတွေကိုလည်း အချက်လက်ကောက်ယူ စုဆောင်း မှတ်တမ်းတင်မှုတွေအရ တွေ့ရှိရတယ် ” ဟု ၎င်းက MPAသို့ ပြောသည်။
အမျိုးသမီးများသည် နေ့စဉ်သာမန်လူမှုဘဝ၌ပင် လိင်ပိုင်းဆိုင်ရာ ထိပါးနှောက်ယှက်မှုများ၊ လိင်ပိုင်းဆိုင်ရာ အမြတ်ထုတ်စော်ကားမှုများနှင့် လိင်ပိုင်းဆိုင်ရာအကြမ်းဖက်မှုများကို ရင်ဆိုင်နေ ရသည့်အတွက် စစ်ပွဲကာလ၊ တိုက်ပွဲကာလအတွင်း၌ မလုံခြုံမှုများ ပိုမိုဆိုးရွားနေကြောင်း သိရသည်။
ပြီးခဲ့သည့် ဧပြီလအတွင်း စစ်ကောင်စီတပ်ကြောင့် နိုင်ငံတစ်ဝန်း အသက် ၁၈နှစ်အောက် အမျိုးသမီး ငယ် ၁၃ဦးအပါအဝင် အမျိုးသမီး ၇၁ဦးသေဆုံးခဲ့ကာ ဒဏ်ရာရရှိသူမှာ အယောက် ၅၀ရှိကြောင်း Burmese Women’s Union (BWU) က ယနေ့ (မေလ ခုနှစ်ရက်) ထုတ်ပြန်သည်။
” အခုဒီ ထုတ်ပြန်ထားတဲ့ အချက်အလက်တွေက မြန်မာ့အမျိုးသမီးသမဂ္ဂက ခိုင်လုံတဲ့ သတင်းမီဒီယာတွေက ဖော်ပြထားတဲ့ တိကျခိုင်လုံတဲ့ အချက်အလက်တွေနဲ့ မြေပြင်ကရရှိတဲ့ အချက်အလက်တွေကို စုဆောင်း မှတ်တမ်းတင်ထားတာဖြစ်တယ်။ လက်ရှိ မြန်မာနိုင်ငံရဲ့ အင်တာနက်အခြေအနေ၊ လျှပ်စစ်မီးရရှိမှုအခြေအနေနဲ့ သတင်းစီးဆင်းမှု အခြေအနေတွေကြောင့် မြေပြင်မှာတော့ ဒီထပ်ပိုများတဲ့ ကိန်းဂဏန်းတွေရှိနိုင်ပါတယ်ရှင့်” ဟု ၎င်းကဆက်လက်ပြောသည်။
ဧပြီလအတွင်းစစ်တပ်၏ လေကြောင်းတိုက်ခိုက်မှုကြောင့် သေဆုံးသူ ၅၉ဦးနှင့် ဒဏ်ရာရှိသူ အယောက် ၄၀၊ လက်နက်ကြီးပစ်ခတ်မှုကြောင့် သေဆုံးသူ ခုနှစ်ဦးနှင့် ဒဏ်ရာရှိသူ ငါးဦး၊ သတ်ဖြတ်ခံရသူ ငါးဦး၊ မြေမြှုပ်မိုင်းကြောင့် ဒဏ်ရာရသူ လေးဦးနှင့် အာရက္ခတပ်ဖွဲ့ဝင်က မုဒိမ်းကျင့်သဖြင့် ဒဏ်ရာရရှိသူတစ်ဦးရှိကြောင်း ထုတ်ပြန်ချက်၌ ဖော်ပြသည်။
ဧပြီလအတွင်း စစ်ကိုင်းတိုင်း၌ သေဆုံးသူအယောက် ၃၀အထိရှိသည်။
စာတည်း-ML
