By MPA
UN World Food Programme (WFP) မှ ထောက်ပံ့ထားသည့် ဘီစကွတ်များကို ရောင်းချပါက အရေးယူမည်ဖြစ်ကြောင်း United Nations Myanmar က ယနေ့ (ဧပြီ ၂၂ရက်) တွင် ထုတ်ပြန်ထားသည်။
WFP မှ ဖြန့်ဝေပေးထားသည့် ဘီစကွတ်များသည် ရိုးရိုးဘီစကွတ်မဟုတ်ဘဲ ငလျင်ဘေး အရေးပေါ်အခြေအနေမျိုးတွင် ချက်ချင်းစားသုံးနိုင်ရန် အတွက် ထုတ်လုပ်ထားသည့် အထူးအဟာရ ဖြည့်အစားစာတစ်မျိုးဖြစ်ကြောင်း ဆိုထားသည်။
အဆိုပါ ဘီစကွတ်သည် အရေးပေါ်အခြေအနေဖြစ်လာသည့်အခါ ပုံမှန်အစားသောက်များကို ချက်ပြုတ်ရန်နှင့် ဝယ်ယူစားသုံးရန် မဖြစ်နိုင်သည့် အခြေအနေများတွင် ချက်ချင်းစားသုံးနိုင်ရန် ရည်ရွယ်ထုတ်လုပ်ထားသည့် အရေးကြီးသော လူသားချင်စာနာမှုအကူအညီတစ်မျိုးဖြစ်သည်ဟုလည်း United Nations Myanmar က ထုတ်ပြန်ထားသည်။
WFP အနေဖြင့် မြန်မာနိုင်ငံတွင် ငလျင်လှုပ်ခတ်ပြီး ၄၈ နာရီအတွင်း ငလျင်ဘေးသင့်ပြည်သူများအတွက် အဟာရဖြည့် ဘီစကွတ်များကို စတင်ပြန်ဝေခဲ့ခြင်းဖြစ်ပြီး အဆိုပါ ဘီစကွတ်များသည် ရောင်းရန်မဟုတ်ကြောင်း၊ ပုံမှန်စားသောက်နိုင်သူများအနေဖြင့် ပိုလျှံနေသည့် ဘီစကွတ်များကို မိမိထက်လိုအပ်နေသူများကို ပြန်လည်မျှဝေပေးရန် United Nations Myanmar က တိုက်တွန်းထားသည်။
နေပြည်တော်တွင် WFP ကထောက်ပံ့ထားသည့် အဟာရဖြည့် ဘီစကွတ်များကို ရောင်းချနေကြောင်း ဆိုရှယ်မီဒီယာများ၌ ရေးသားထားသည်ကို သိရှိထားပြီးဖြစ်သော်လည်း ယင်းရေးသားချက်များနှင့် ပတ်သက်ပြီး သက်သေ တစ်စုံတစ်ရာမတွေ့ရကြောင်း၊ နေပြည်တော်၌ အဟာရဖြည့် ဘီစကွတ်များကို ဧပြီတစ်ရက်နေ့တွင် နောက်ဆုံးထားဖြန့်ဝေခဲ့သည်ဖြစ်ကာ ရောင်းချမှုများ တွေ့ရှိပါက ချက်ချင်းအရေးယူဆောင်ရွက်သွားမည်ဖြစ်ဟု United Nations Myanmar ကအသိပေးထားသည်။
WFP မှ ဖြန့်ဝေပေးသည့် ဘီစကွတ်များသည် စွမ်းအင်၊ ပရိုတင်း၊ ဗီတာမင်နှင့် သတ္တုဓာတ်ကြွယ်၀စွာပါဝင်သည့် စားစရာတစ်ခုဖြစ်ပြီး ကယ်လဆီယမ်၊ မဂ္ဂနီဆီယမ်၊ သံဓာတ်၊ အိုင်အိုဒင်း၊ ဖောလစ်အက်ဆစ်၊ ဗီတာမင် B1၊ B2၊ B6၊ B12 နဲ့ အခြားဓာတ်များလည်း ပါဝင်ကြောင်း သိရသည်။
အဆိုပါ ဘီစကွတ်များကို ခြောက်လအောက်ကလေးငယ်များကို ကျွေး၍မရဘဲ၊ ခြောက်လအထက် ကလေးများကို ကျွေးမည်ဆိုပါကလည်း မိခင်နို့၀အောင် တိုက်ပြီးမှ ကျွေးနိုင်ကြောင်းလည်း သိရသည်။
