By Hsu Yee / MPA
ဘေးသင့်ပြည်သူများကို အကူအညီပေးနိုင်ရေးအတွက် ကုလသမဂ္ဂလက်အောက်ခံအဖွဲ့က S&C အဖွဲ့အား အမေရိကန်ဒေါ်လာတစ်သန်း ထောက်ပံ့ပေးမည်ဖြစ်ကြောင်း သိရသည်။
ကုလသမဂ္ဂ လူသားချင်းစာနာထောက်ထားမှုဆိုင်ရာ အကူအညီများပေးနေသည့် အဖွဲ့တစ်ဖွဲ့က INGO အဖွဲ့များမှတစ်ဆင့် S&C မီးဘေးစစ်ဘေးပညာရေးကူညီစောင့်ရှောက်ရေးအဖွဲ့ထံသို့ ငွေကြေးနှင့် ပစ္စည်း စုစုပေါင်းတန်ဖိုး ကန်ဒေါ်လာတစ်သန်းထောက်ပံ့မည်ဖြစ်ကြောင်း S&C အဖွဲ့ထံမှ သိရ သည်။
“ သဘောတူညီချက်တွေနဲ့ ကျတော်တို့ဘက်က လက်ခံနိုင်မယ့် အနေအထားတွေကို ဆွေးနွေးနေ ပါတယ်။ သဘောတူညီချက်အရ စာချုပ်နှစ်ခု ချုပ်ပြီးပါပြီ။ကျန်တာတွေဆွေးနွေးပြီးရင် UN နဲ့ နှစ်ဖက်သဘောတူညီချက်ရတာနဲ့ ဆက်လုပ်ပါမယ်” ဟု S&C တည်ထောင်သူ ကိုစိုးမိုးအောင်က MPA သို့ပြောသည်။
ယင်းထောက်ပံ့မှုများကို စစ်ဘေး နှင့် ငလျင်ဘေးသင့် ပြည်သူများ၏ ကျန်းမာရေးနှင့် ပညာရေး ကဏ္ဍများတွင် အသုံးပြုသွားမည်ဖြစ်ပြီးတော်လှန်ရေး စိုးမိုးနယ်မြေများအတွက် ရာခိုင်နှုန်း ၇၀ နှင့် စစ်ကောင်စီ စိုးမိုးနယ်မြေအတွင်းရှိ CDM များနှင့် ပြည်သူများအတွက်ရာခိုင်နှုန်း ၃၀ ရာခိုင်နှုန်း အသုံးပြုသွားမည်ဖြစ်ကြောင်း သိရသည်။
“ ဒေသတွေကတော့ ကျတော်တို့ လှူဒါန်းပြီးရင် ထုတ်ပြန်ပေးသွားမှာပါ။ သဘောတူညီချက်အရ နေရာဒေသတွေ အတိအကျပါမှာပါ။စကစ နဲ့ ပေါင်းနေတဲ့ NGO တွေနဲ့ လုပ်ငန်း လုပ်မှာ မဟုတ်ပါ ဘူး ခင်ဗျာ” ဟု ၎င်းက ဆက်လက်ပြောသည်။
ကုလသမဂ္ဂအဖွဲ့များသည် တော်လှန်ရေးဘက် ရပ်တည်နေသော NGO များနှင့် လုပ်ငန်းဆောင် ရွက်ရသည်မှာ အဆင်ပြေသည်ဟုထင်ကြောင်း ၎င်းကဆိုသည်။
” UN တွေ NGO တွေအနေနဲ့က စကစ ရဲ့ ပိတ်ပင်မှုတွေ အများကြီးရှိနေတာမို့ လုပ်ရကိုင်ရတာ အခက်အခဲ တချို့တော့ရှိတာပေါ့” ဟု ၎င်းကပြောသည်။
ကုလလက်အောက်ခံအဖွဲ့သည် ၂၀၂၃ ခုနှစ်အတွင်း နှစ်ကြိမ်နှင့် ၂၀၂၄ ခုနှစ်အတွင်း တစ်ကြိမ် S&C အဖွဲ့ထံသို့ INGOများမှတစ်ဆင့် ပံ့ပိုးခဲ့ပြီး ယင်းပံ့ပိုးမှုများကို ဒီပဲယင်းမြို့နယ်အတွင်းရှိ စစ်ဘေး ၊ သဘာဝဘေး ၊ ကျန်းမာရေးနှင့် ပညာရေးကဏ္ဍများ၌ အသုံးပြုထားကြောင်း သိရသည်။
၂၀၂၅ ခုနှစ်၊ ဧပြီ ပထမပတ်အတွင်းကလည်း ကုလသမဂ္ဂလက်အောက်ခံအဖွဲ့များက ထောက်ပံ့သည့် အမျိုးသမီးအသုံးအဆောင် ပစ္စည်းအိတ်များကို စစ်ကိုင်းမြို့ ၊ ရွာထောင်ရပ်ကွက်ရှိ အမျိုးသမီး ၅၀၀ ခန့်ထံ S&C က လှူဒါန်းခဲ့သေးကြောင်း သိရသည်။
