မန္တလေးတိုင်းဒေသကြီး၊ ပုသိမ်ကြီးမြို့နယ်၊ နန်းဦးလွင်ကျေးရွာ Denko ဆီဆိုင်အတွင်းရှိ Agency အသေး စားဘဏ်ကို PDF ခြောက်ဦးက သေနတ်ပြကာ ငွေကျပ်သိန်း ၆၀၀အား ဓားပြတိုက်သွားဆိုသည့် သတင်း အမှား ဇူလိုင် ၅ ရက်တွင် တယ်လီဂရမ်ချန်နယ်များ၌ ပျံ့နှံ့ခဲ့သည်။
သတင်းအမှားအကြောင်းအရာအား ဇူလိုင် ၅ ရက်၊ နံနက် ၁၁ နာရီကျော်တွင် ပုသိမ်ကြီးမြို့နယ်၊ နန်းဦး ကျေးရွာရှိ Denko ဆီဆိုင်အတွင်းရှိ Agency အသေးစားဘဏ်ကို PDF ခြောက်ဦးက ဆိုင်ကယ် သုံးစီးဖြင့် လာရောက်ခဲ့ကြောင်း၊ သေနတ်အတိုနှစ်လက်ဖြင့် ဘဏ်ဝန်ထမ်းနှစ်ဦးကို ခြိမ်းခြောက်ကာ ဘဏ်အတွင်းရှိ ငွေကျပ် သိန်း ၆၀၀ ယူဆောင်သွား ကြောင်း People Media အမည်ရှိ တယ်လီဂရမ်ချန်နယ်က ဇူလိုင် ၅ ရက်တွင် CCTV မှတ်တမ်းဗီဒီယိုဖိုင်နှင့်တကွ ရေးသားဖြန့်ဝေခဲ့သည်။
အဆိုပါသတင်းအမှားကို Aung Moe Kyaw, Snow Queen, Ye Yint Htet ( #yyh ) အပါအဝင် အခြားတယ်လီဂရမ်ချန်နယ်များက ဆက်လက်ဖြန့်ဝေခဲ့သဖြင့် ပျံ့နှံ့မှုများပြားခဲ့သည်။
တယ်လီဂရမ်တွင် ပျံ့နှံ့နေသော သတင်းအမှားလင့်ခ်များ >>>
https://archive.ph/2pqbx
https://archive.ph/ySpkF
https://archive.ph/JzY2R
https://archive.ph/5jC0H
အဆိုပါသတင်းအကြောင်းအရာကို Positive Angle News Website တွင်လည်း ဓာတ်ပုံနှင့်တကွ ရေးသားဖော်ပြခဲ့သည်။
သတင်းအပြည့်အစုံ >>> https://archive.ph/gjVNf
သတင်းအမှားဖြစ်ကြောင်း စိစစ်ချက်
တယ်လီဂရမ်ချန်နယ်များတွင် ပျံ့နှံ့နေသော CCTV မှတ်တမ်းဗီဒီဘိုဖိုင်အား Invid Video Verification Tool အသုံးပြု စစ်ဆေးပြီး ရရှိလာသော keyframes များကို Google Reverse Image Search ဖြင့် ထပ်မံရှာဖွေကြည့်သည်။
ယင်းသို့ ရှာဖွေရာ Mizzima TV နှင့် Mandalay Free Press-MFP တို့၏ youtube စာမျက်နှာများတွင် သတင်းတင်ထားတာ တွေ့ရသည်။
အဆိုပါ မီဒီယာများတွင် မန္တလေးမြို့ မြို့ပတ်လမ်းနှင့် ၂၆ လမ်းထောင့် အနီးရှိ Denko ဆီဆိုင်အတွင်း ဖွင့်လှစ်ထားသည့် ငွေလွှဲ၊ ငွေထုတ်ဆိုင်ကို ဇူလိုင် ၅ ရက်၊ နံနက် ၁၀ နာရီ ၄၀ မိနစ်ခန့်တွင် လူငယ်ခြောက်ယောက် သေနတ် နှစ်လက်ဖြင့် ဓားပြဝင်တိုက်ခဲ့ပြီး ငွေကျပ် သိန်း ၆၀၀ ကျော် ယူသွားကြောင်း၊ ဓားပြတိုက်ခံရသည့်ဆိုင်၏ ပေ ၃၀ ကျော်အကွာတွင် စစ်ကောင်စီလက်အောက်ခံ စည်ပင်၊ ယာဉ်ထိန်းရဲ၊ ရဲတပ်ဖွဲ့နှင့် ပျူစောထီးများ၏ စစ်ဆေးရေးဂိတ်ရှိကြောင်း ရေးသားထားသည်။
Youtube သတင်းအပြည့်အစုံ >>> https://shorturl.at/VARNI
ဒါ့အပြင် Google တွင် “နန်းဦးလွင်ဆီဆိုင်” ဆိုသည့် Keyword ဖြင့် ရှာဖွေကြည့်သည့်အခါ CJ Platform နှင့် DVB တို့တွင် သတင်းရေးထားသည်ကို တွေ့ရသည်။
CJ Platform နှင့် DVB သတင်းဌာနက ဖော်ပြထားသော သတင်းလင့်ခ် >>>
https://shorturl.at/vweVb
https://shorturl.at/EJiC9
သတင်းအချက်အလက်များအား အဆင့်ဆင့်စိစစ်အတည်ပြုရေးသားနေသော မီဒီယာများတွင် အမည်မသိ အမျိုးသား ခြောက်ဦး သေနတ်နှစ်လက်ဖြင့် ဘဏ်ဓားပြတိုက်သွားကြောင်း တညီတညွတ်ထဲရေးသားထား သည်။ သတင်းဌာနများတွင် မည့်သည့်အဖွဲ့က ဓားပြတိုက်ကြောင်း ဖော်ပြထားခြင်း မရှိကြပေ။
စစ်ကောင်စီလော်ဘီ တယ်လီဂရမ်ချန်နယ်များတွင် PDF အဖွဲ့က ဓားပြတိုက်ဟု စွပ်စွဲထားသည့်အတွက် ပျံ့နှံ့နေသော အကြောင်းအရာသည် သတင်းအမှားဖြစ်ကြောင်း သိနိုင်သည်။
သတင်းအမှားတွင် Denko ဆီဆိုင်ရှိ Agency ဘဏ်အသေးစား ဓားပြတိုက်ခံရမှုဖြစ်စဉ် မှန်ကန် သော်လည်း PDF များ ဓားပြတိုက်ခဲ့သည်ဟု စွပ်စွဲရေးသားထားသောကြောင့် အခြေအနေအခင်း အကျင်းအမှား (False Context) သတင်းအမှားအမျိုးအစားဖြစ်သည်။
