ဘုတလင်၊ဝက်လူးအိုင်ရွာကို စစ်ကောင်စီတပ် လေကြောင်းမှ ဗုံးကြဲ၊အဘွားတစ်ဦး သေဆုံး သတင်း

ဘုတလင်၊ဝက်လူးအိုင်ရွာကို စစ်ကောင်စီတပ် လေကြောင်းမှ ဗုံးကြဲ၊အဘွားတစ်ဦး သေဆုံး

စစ်ကိုင်းတိုင်း၊ ဘုတလင်မြို့နယ်၊ဝက်လူးအိုင်ရွာကို စစ်ကောင်စီတပ်က လေကြောင်းမှ ဗုံးကြဲတိုက် ခိုက်ခဲ့ရာ အဘွားအိုတစ်ဦး သေဆုံးပြီး ၁ဦး ဒဏ်ရာရခဲ့ကြောင်း သိရသည်။

မတ်လ၂၀ရက်၊ ညနေ၅နာရီခွဲခန့်တွင် လေယာဉ်ဖြင့် ဗုံးကြဲတိုက်ခိုက်ခဲ့ရာ ဝက်လူးအိုင်ရွာမှ ဒေါ်ရွှေထုပ်(၇၆နှစ်)မှာ ပွဲချင်းပြီး သေဆုံးခဲ့ကာ ဒေါ်တာမ(၆၅နှစ်)မှာ တင်ပါးဆုံအနီး ကျည်ထိမှန်ဒဏ်ရာရပြီး ဆေးရုံတင်ထားရကြောင်း ဒေသခံအချို့ထံက သိရသည်။

“ ဂျက်ဖိုက်တာဆိုတော့ လာတဲ့အသံပဲ ကြားလိုက်ရပြီး မမြင်လိုက်ရပါဘူး။ခပ်မြန်မြန်ပဲ ဗုံးကြဲသွားပြီး ပြန်တက်သွားတာပါပဲ” ဟု ဝက်လူးအိုင်ရွာသားတစ်ဦးက MPA သို့ ပြောသည်။

စစ်ကောင်စီတပ်သည် ဂျက်ဖိုက်တာဖြင့် ဗုံး၈လုံး ကြဲချခဲ့ရာ ဝက်လူးအိုင်ကျေးရွာအတွင်းရှိ နွားခြံ ပျက်စီးခဲ့ပြီး နွား ၄ကောင်နှင့် ဝက်များလည်း သေဆုံးခဲ့သေးသည်။

“ အကြောင်းမဲ့ လာပစ်ခတ်သွားတာ။ဘာတိုက်ပွဲမှတော့ မရှိဘူး။လှုပ်ရှားမှုလည်း မရှိပါဘူး။အရပ်သားတွေပဲ နေထိုင်တဲ့ရွာကို တမင်လာပစ်သွားတာပါ” ဟု Helping For Hends တာဝန်ရှိသူ မခင်ဝတီက ဆိုသည်။

လာရောက်ပစ်ခတ်သော ဂျက်ဖိုက်တာမှာ ကလေးမြို့အထိုင်တပ်မှ ဖြစ်ကြောင်း ဒေသခံအချို့က ဆိုကြသည်။