ပဲခူးတိုင်း၊ သာယာဝတီခရိုင်အတွင်းရှိ မြို့နယ်များ၌ စက်သုံးဆီဝယ်ယူရာတွင် သက်ဆိုင်ရာအုပ်ချုပ်ရေး မှူးများကို ငွေပေး၍ ထောက်ခံစာပြုလုပ်နေရကြောင်း ဒေသခံများကဆိုသည်။
စက်သုံးဆီအရောင်းဆိုင်များ၌ လယ်ယာစိုက်ပျိုးရန်စက်သုံးဆီသွားရောက်ဝယ်ယူရာတွင် သက်ဆိုင် ရာအုပ်ချုပ်ရေးမှူး လက်မှတ်ပါရှိမှသာ ရောင်းချပေးသဖြင့် အုပ်ချုပ်ရေးမှူးထောက်ခံစာပြုလုပ်ရပြီး ထို သို့ထောက်ခံစာပြုလုပ်ရာတွင်လည်း အခကြေးငွေပေးဆောင်နေရကြောင်း မိုးညိုမြို့နယ်အတွင်းရှိ တောင်သူတစ်ဦးကဆိုသည်။
“အုပ်ကြီး(အုပ်ချုပ်ရေးမှူး)ထောက်ခံစာမပါရင် ၃ ဂါလံလောက်တောင်ဆိုင်တွေမှာဝယ်လို့မရဘူး။ ထောက်ခံစာပါရင်တော့ အများဆုံး ၁၀ ဂါလံလောက်ရတယ်။ အဲ့ဒီလိုထောက်ခံစာရဖို့အတွက် သူတို့ (အုပ်ချုပ်ရေးမှူး)ကို လက်ဆောင်ပေးရတာမျိုးတို့၊ တစ်ချို့ကျတော့လည်း ၂ သောင်း၊ ၃ သောင်းပေးရ တယ်”ဟု ၎င်းကဆိုသည်။
တောင်သူများအနေဖြင့် လယ်ယာလုပ်ငန်းခွင်အတွင်း အသုံးပြုသည့် စက်သုံးဆီပမာဏမှာ တစ်ရက် လျှင် ဂါလံ ၂၀ ခန့်ကုန်ပြီး စက်သုံးဆီပီပါလိုက် ဝယ်ယူမည်ဆိုပါက မြို့နယ်အုပ်ချုပ်ရေးမှူးထံသို့ သွား ရောက်ကာ ထောက်ခံစာပြုလုပ်ရကြောင်း သာယာဝတီမြို့နယ်အတွင်းရှိ စပါးရိတ်၊ ချွေစက်ပိုင်ရှင်တစ် ဦးကဆိုသည်။
“တစ်နေ့ကို ၁၀ ဂါလံလောက်နဲ့က လုပ်ငန်းလည်ပတ်လို့မရဘူး။ ဆီရှိရင်မောင်းမယ်၊ မရှိရင်ရပ်ထားရ တာ။ ထောက်ခံစာလုပ်ရင် ပိုက်ဆံမပေးတဲ့သူမျိုးတွေ၊ သူတို့(အုပ်ချုပ်ရေးမှူး)အမြင်မကြည်တဲ့သူတွေဆို မလုပ်ပေးဘူး။ ကိုယ့်ပိုက်ဆံနဲ့ကိုယ်ဝယ်တာတောင် သူတို့(အုပ်ချုပ်ရေးမှူး)ထောက်ခံပေးဖို့ လိုက်ဖား ယားပြီးပြောနေရတာ အဆင်မပြေဘူး” ဟု ၎င်းကဆိုသည်။
ယခုကာလသည် ဆောင်းသီးနှံစိုက်ပျိုးသည့်ကာလဖြစ်ပြီး စက်သုံးဆီအခက်အခဲကြောင့် လယ်ယာမြေ များထွန်ယက်ရန် လယ်ထွန်စက်ငှားရမ်းရာတွင် အလွယ်တကူမရရှိသဖြင့် သီးနှံစိုက်ပျိုးမှုနောက်ကျနေ ကြောင်း လက်ပံတန်းမြို့နယ်အတွင်းရှိ တောင်သူအမျိုးသမီးတစ်ဦးကဆိုသည်။
“လယ်သမားတိုင်း အချိန်အခါအမှီစိုက်ချင်ကြတာ။ အခု ထွန်စက်တွေက ငှားမရဘူး။ ဆီကုန်နေတယ် ပြောတာနဲ့၊ ဆီသွားဝယ်နေလို့ ရောက်လာရင်မောင်းပေးမယ်ပြောတာနဲ့၊ ဆီရှိတဲ့စက်တွေကျတော့လည်း သူ့ရက်ချိန်းနဲ့သူပြည့်နေတာ” ဟု ၎င်းကပြောသည်။
သာယာဝတီခရိုင်အတွင်းရှိ စက်သုံးဆီအရောင်းဆိုင်များတွင် နိုဝင်ဘာ ၁၃ ရက်နေ့မှစတင်ပြီး စက်သုံးဆီ များပြတ်လပ်နေသည်ဟုဆိုကာ အနည်းငယ်သာရောင်းချပေးသဖြင့် မှောင်ခိုဈေးကွက်တွင် ဈေးကြီးပေး ၍ ဝယ်ယူနေရကြောင်း ဒေသခံများကဆိုသည်။
