မန္တလေးမြို့တွင် စစ်ကောင်စီတပ်မှ လုံခြုံရေးအကြောင်းပြချက်ဖြင့် ကား၊ ဆိုင်ကယ်များကို ဖမ်းဆီးစစ်ဆေးမှုများ ပြုလုပ်ရာ၌ ပါဝင်သည့် အပြင်လူများကို တစ်ဦးလျှင် ၁လ ၅သိန်းကျပ်ဖြင့် ခေါ်ယူလျှက်ရှိကြောင်း ဒေသခံများထံမှ စုံစမ်းသိရှိရသည်။
ထိုကဲ့သို့ ကားနှင့် ဆိုင်ကယ်များ ဖမ်းဆီးရာ၌ ပါဝင်သည့် အပြင်လူများကို စစ်ဝတ်စုံများပေးဝတ်ပြီး မန္တလေးမြို့ နေရာအနှံအပြား၌ ဖမ်းဆီးစစ်ဆေးမှုများပြုလုပ်နေခြင်းဖြစ်သည်ဟု ဝင်ရောက်လုပ်ကိုင်ခဲ့သူတစ်ဦးနှင့် နီးစပ်သူက ပြောသည်။
” ကျမက စျေးရောင်းတာပါ၊ တစ်ရက် အပြင်သွားတော့ဖမ်းခံထိတယ်။ ဖမ်းတဲ့လူကိုလည်း မှတ်မိနေတာပေါ့၊ ၂ရက် နေတော့ အဲဒီလူက ဆိုင်မှာစျေး လာဝယ်တယ်။ ဝယ်တော့ ဒီလူငါမြင်ဖူးပါတယ်ဆိုပြီး စဥ်းစားပြီး ဟိုနေက ဖမ်းတဲ့ အထဲမှာပါတယ်မို့လားမေးတော့ အဲဒီလူက အမ ဘယ်သူမှမပြောပါနဲ သူအလုပ်မရှိလို့ ၅သိန်းရလို့ လုပ်တာပါ၊ ဘယ်သူ မှမပြောပါနဲ့ တောင်းပန်ပါတယ်ဆိုပြီ ပြန်သွားတယ်။ ကားဆိုင်ကယ် ဖမ်းနေတဲ့ အထဲမှာ အပြင်လူတွေကို ဝတ်စုံပေး ပြီး ဖမ်းခိုင်းတာ၊ စစ်သားအစစ်က တစ်ဖွဲ့မှ ၅ယောက်ပဲရှိတာ ကျန်တာ ပျုစောထီးတွေပဲလို့ သိရတယ်” ဟု ၎င်းက ပြောသည်။
စစ်တပ်အာဏာသိမ်းပြီးနောက် စစ်ကောင်စီတပ်များသည် မန္တလေးမြို့အတွင်း ကား၊ ဆိုင်ကယ် ဖမ်းဆီးစစ်ဆေးမှုများ ပိုမိုပြုလုပ်ကာ၊ ယခုနောက်ပိုင်း တိုက်ပွဲများကြောင့် ထုတ်နှုတ်အင်အားများကို နေရာအနှံ့အပြားသို့ ပို့ဆောင်ရသည့်အ တွက် အင်အားနည်းပါးလာသောကြောင့် အပြင်လူများကို လစာပေး၍ စစ်ဆေးမှုများ၌ ပါဝင်ခိုင်းနေခြင်းဖြစ်နိုင်သည် ဟု မန္တလေး ဒေသခံများက သုံးသပ်သည်။
” ဟိုတစ်နေ့ကဆို ထုံးဘိုလမ်းခွဲမှာ၊ ဆိုင်ကယ်အစုတ်လေးနဲ့ ပန်းရံလုပ်ပြီး ပြန်လာတဲ့ လူတစ်ယောက်ဆိုရင် လိုင်စင် သက်တမ်း ကုန်နေလို့တဲ့ ၅သောင်းတောင်းတာ၊ ဟိုက တစ်နေ့လုပ်မှတစ်နေ့စားရတာ၊ တစ်နေ့မှ ၇ထောင်လောက် ရတာကို၊ ပြည်သူတွေမှာ ကုန်ဈေးနှုန်းကတက်၊ ပိုက်ဆံရှာတာကမလွယ်ပါဘူးဆို သူတို့က နေ့တိုင်းဖမ်း နေတယ် ငတ်ပြတ်နေကြတာထင်တယ်” ဟု ချမ်းမြသာစည်မြို့နယ်မှ ပြည်သူတစ်ဦးက ပြောသည်။
ထို့အပြင် စစ်ကောင်စီတပ်သည် ယခုလ ဒုတိယပတ်မှ စတင်ကာ မန္တလေးမြို့ရှိ စျေးချိုတော်၊ စာသင်ကျောင်းများ အပါအဝင် နေရာ ၂၀ကျော်၌ အထိုင်ချတပ်စွဲထားကြောင်းလည်း ဒေသခံများထံမှ သိရသည်။
