ရန်ကုန်တိုင်း၊ မင်္ဂလာဒုံမြို့နယ်၊ အောင်မင်္ဂလာအဝေးပြေး ကားမှတ်တိုင်အနီး၊ ယနေ့(နိုဝင်ဘာ ၁၇ရက်)၊ နေ့လယ် ၁၁နာရီခန့်တွင် YBS 92 တစ်စီးသည် ဘရိတ်ပေါက်ပြီး ကထိန်အလှူခံ မဏ္ဍပ်ကို ဝင်တိုက်ခဲ့မှုကြောင့် အသက် ၆၀ အရွယ် အမျိုးသားတစ်ဦးသေဆုံးခဲ့ကာ၊ နှစ်ဦးဒဏ်ရာရရှိခဲ့ကြောင်း ပုလဲအရန်မီးသတ်တပ်ဖွဲ့ထံမှ သိရသည်။
“ မဏ္ဏပ်က ကားလမ်းဘေးမှာ တစ်ပေ နှစ်ပေ မခြားဘဲကပ်နေတာ၊ မဏ္ဍပ်ဘေးမှာက အောင်မင်္ဂလာအဝေးပြေးကနေ မြို့ထဲသွားတဲ့ ကားဂိတ်ရှိတယ်။ ရောက်တဲ့အချိန် အလှူခံမဏ္ဍပ်ထဲမှာ အမျိုးသားတစ်ဦးက ကားအောက်ထဲမှာသေ နေတာ ၊ ကားရဲ့ ရှော့ဘားပြုတ်ပြီးတော့ အဲ့ဒီအောက်မှာ သေဆုံးခဲ့တဲ့ ဦးလေးက ညှပ်နေတာ” ဟု ပုလဲ အရန်မီးသတ် တပ်ဖွဲ့ မှ တာဝန်ရှိ သူတစ်ဦးက ပြောသည်။
ဘရိတ်ပေါက်ခဲ့သည့် YBS 92သည် အလှူခံမဏ္ဍပ်ကို ဝင်တိုက်ခဲ့သည့်အပြင် တက္ကစီတစ်စီးနှင့် ဖုန်းတိုင်ကိုပါ တိုက်ခဲ့ကြောင်းလည်း အောင်မင်္ဂလာအဝေးပြေးရှိ တက္ကစီယာဉ်မောင်းတစ်ဦးကပြောသည်။
“ တက္ကစီဖင်ကိုလည်းဝင်တိုက်ထားတယ်။ အနားက ဖုန်းတိုင်ပါ တိုက်သွားတာ ဖုန်းတိုင်ကျိုးသွားတယ်။ အဲ့ဒီ YBS က မင်္ဂလာဒုံဘက် ကနေ မြောက်ဥက္ကလာ အလာ အဝေးပြေးကားဂိတ်မှတ်တိုင်နားမှာ ယာဉ်တိုက်မှု ဖြစ်တာ၊ အဲ့ဒီလိုဖြစ် ပြီးတော့ ယာဥ်ကြောပိတ်ဆို့မှုတွေ ဖြစ်တယ်။ YBS ယာဥ်မောင်းလည်း အဖမ်းခံရတယ်” ဟု ၎င်းက ရှင်းပြသည်။
အထက်ပါဖြစ်စဉ်ကြောင့် YBS 92 ယာဉ်ပေါ်တွင် လိုက်ပါလာသည့် ခရီးသည်အချို့လည်း ထိခိုက်ဒဏ်ရာများရရှိခဲ့ ကြောင်း၊ ယာဉ်တိုက်မှုကြောင့် သေဆုံးခဲ့သူနှင့် ဒဏ်ရာရရှိသူနှစ်ဦးကို မြောက်ဥက္ကလာ မေဒါဝီဆေးရုံသို့ ပို့ဆောင်ခဲ့ ကြောင်း ပုလဲအရန်မီးသတ်တပ်ဖွဲ့မှ သိရသည်။
