စစ်ကိုင်းတိုင်း၊ ကောလင်းမြို့ကို PDFနှင့်မဟာမိတ်ပူးပေါင်းတပ်ဖွဲ့က တိုက်ခိုက်သိမ်းပိုက်လိုက်ပြီ ဖြစ်ကြောင်း NUGကာကွယ်ရေးဝန်ကြီးဌာနက သတင်းထုတ်ပြန်သည်။
ယနေ့(နိုဝင်ဘာ၆ရက်)တွင် အမှတ်(၁) စစ်ဒေသ၊ ကောလင်းခရိုင်ကွပ်ကဲရေး အစီအစဥ်ဖြင့် ပြည်သူ့ ကာကွယ်ရေးတပ်မတော်(PDF)နှင့်မဟာမိတ် ပူးပေါင်း တပ်ဖွဲ့များက ကောလင်းမြို့ကို အောင်မြင်စွာ တိုက်ခိုက် သိမ်းပိုက်နိုင် ခဲ့ကြောင်း သိရသည်။
” မြို့ကို စသိမ်းတာကတော့ နိုဝင်ဘာလ ၆ ရက်နေ့ မနက်ခင်းပါ။ အတိအကျတော့ ပြောဖို့ခက်ပါတယ်။ ကောလင်းခရိုင်အမှတ် (၁)ကွပ်ကဲမှုနဲ့ သွားတာပါ။ လက်ရှိအထိကတော့ အခြေအနေငြိမ်သက်နေပါတယ်။ ရှင်းလင်းရေးစဝင်နေပါပြီ။ဖုန်းလိုင်းတော့ ဖြတ်တောက်ထားဆဲပါ” ဟုဒေသတွင်းတော်လှန်ရေးသတင်းများ ဖော်ပြနေသည့် Kawlin Infoမှ တာဝန်ရှိသူတစ်ဦးကပြောသည်။
ကောလင်းမြို့ရှိ ရန်သူ့တပ်ဖွဲ့ဝင်များ အခြေပြုတပ်စွဲထားသည့် ကောလင်းရဲစခန်း၊ အထွေထွေ အုပ်ချုပ်ရေးရုံး၊ အထက်တန်းကျောင်း၊ မြေစာရင်းရုံးနှင့် မြန်မာ့စီးပွားရေးဘဏ်တို့ကို အောင်မြင်စွာ တိုက်ခိုက်သိမ်းပိုက်ပြီးနောက် ရန်သူ့အုပ်ချုပ်ရေး ယန္တရားရပ်တန့်သွားပြီဖြစ်ကြောင်း NUGကာကွယ်ရေးဝန်ကြီးဌာနက ထုတ်ပြန်သည်။
ကောလင်းမြို့ကို သိမ်းပိုက်နိုင်ခြင်းသည် နွေဦးတော်လှန်ရေးအတွက် အရေးပါသော ခွန်အား တစ်ရပ်ဖြစ်စေကြောင်း မုံရွာအခြေစိုက် တက်ကြွလှုပ်ရှားသူတစ်ဦးကပြောသည်။
“၁၀၂၇စစ်ဆင်ရေးနဲ့ စဖွင့်ခဲ့တဲ့ စခန်းသိမ်း၊မြို့သိမ်းပွဲတွေဟာ အခု စစ်ကိုင်းတိုင်းအတွင်း ပထမဆုံး မြို့သိမ်းပွဲအထိ မဟာဗျူဟာမြောက် အောင်ပွဲတစ်ရပ် ဖြစ်လာခဲ့တယ်။ကျနော်တို့ဘက်က ဆက် တိုက်ဖိထားမယ်ဆိုရင် တစ်မြို့ပြီးတစ်မြို့ ထပ်ပြိုနိုင်တယ်” ဟု ၎င်းကပြောသည်။
ကောလင်းကို သိမ်းပိုက်နိုင်ခြင်းသည် ခရိုင်အဆင့်မြို့ကို ပထမဆုံးအကြိမ် တိုက်ခိုက်သိမ်းပိုက်နိုင်ခဲ့ခြင်းဖြစ်ကြောင်း NUG ကာကွယ်ရေး ဝန်ကြီးဌာနက ဆိုသည်။
နိုဝင်ဘာ၅ရက်၊ညနေအထိ လက်နက် မျိုးစုံ ၅၄လက်နှင့် ခဲယမ်းများ သိမ်းဆည်းရမိပြီး စစ်ဆင်ရေးဆိုင်ရာ အချက်အလက်များကို မကြာခင် အသေးစိတ်ဆက်လက် ထုတ်ပြန်သွားမည်ဟု NUG ကာကွယ်ရေးဝန်ကြီးဌာနက ဆိုသည်။
