ရခိုင်ပြည်နယ်အတွင်း မိုခါမုန်တိုင်းအန္တရာယ် ဝင်ရောက်တိုက်ခတ်ပြီးသည့်နောက် ယခုလက်ရှိတွင် ဆက်သွယ်ရေးလိုင်းများ ပြတ်တောက်နေကြောင်း ဒေသခံများထံမှ စုံစမ်းသိရှိရသည်။
လက်ရှိတွင် စစ်ကောင်စီပိုင် မိုင်တဲလ်ဆင်မ်ကတ်များသာ လိုင်းရနေပြီး ကျန်သော ဆက်သွယ်ရေးလိုင်းများမှာ ပြတ်တောက်နေသည်ဟု ဆိုသည်။
“ အခုတော့ မုန်တိုင်းက အေးသွားပြီ။ တစ်ချို့နေရာတွေမှာတော့ မိုင်တဲလ်ကတ်တွေက လိုင်းမိတယ်။ တစ်ချို့နေရာတွေမှာတော့ အော်ရီဒူးတွေက မိတယ်။ MPT တို့ Atom တို့ကတော့ မိကို မမိဘူး။ အဲ့ဒီတော့ ဆက်သွယ်ရေးက အရမ်းခက်ခဲနေတယ်” ဟု ရခိုင်ပြည်နယ်၊ ကျောက်တော်မြို့နယ်ရှိ မေတ္တာဥယျာဉ် ပညာဒါန ပရဟိတကျောင်းမှ တာဝန်ခံ ဦးပဉ္စင်းက ရှင်းပြသည်။
မိုခါမုန်တိုင်းဟာ ယမန်နေ့ မေလ ၁၄ ရက်နေ့၊ တနင်္ဂနွေနေ့က စတင်ကာ ရခိုင်ပြည်နယ်အတွင်းသို့ ဝင်ရောက်ခဲ့ပြီးနောက် ထိခိုက်ပျက်စီးမှုတွေ များစွာ ရှိခဲ့သည်။
“ ရခိုင်မှာတော့ အများကြီး ပျက်စီးသွားတာပေါ့။ စစ်တွေကတော့ ရစရာကို မရှိတော့ဘူး။ အခုလည်း ဦးပဥ္စင်းတို့ရဲ့ ကျောက်တော်ဘက်မှာ အများကြီး ထိခိုက်သွားတယ်။ ထိခိုက်မှု မရှိတဲ့ မြို့က လုံးဝမရှိသလောက်ပါပဲ” ဟု အဆိုပါ ဦးပဉ္စင်းက ဆက်လက်မိန့်ကြားသည်။
လက်ရှိအချိန်တွင် မိုခါမုန်တိုင်းအခြေအနေသည် ရခိုင်ပြည်နယ်အတွင်း အေးသွားပြီဖြစ်ပြီး ကျောက်တော်မြို့ပေါ်တွင် ကူညီကယ်ဆယ်ရေးသမားများက တတ်နိုင်သမျှ ကူညီဆောင်ရွက်ပေးနေကြသည်ဟု ဆိုသည်။ သို့သော် ကျေးရွာများအထိ ထဲထဲဝင်ဝင် မကူညီနိုင်သေးဟု စုံစမ်းသိရှိရသည်။
မုန်တိုင်းအန္တရာယ်ရှောင်နေရသည့် ရခိုင်ပြည်နယ်အတွင်းမှ ဒေသခံများအနေဖြင့် စားနပ်ရိက္ခာနှင့် ဆေးဝါးများ လိုအပ်နေကြောင်း သိရသည်။
မိုခါမုန်တိုင်းကြောင့် မြန်မာနိုင်ငံနေရာအနှံ့အပြားတွင် မိုးသည်းထန်စွာရွာသွန်းမည်ဖြစ်ပြီး မြစ်၀ကျွန်းပေါ်၊ ရခိုင်ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် မိုးသက်လေပြင်းများ ကျရောက်ပြီး လှိုင်းကြီးမည်ဖြစ်ကြောင်းလည်း မိုးလေဝသနှင့် ဇလဗေဒညွှန်ကြားမှု ဦးစီးဌာနက ထုတ်ပြန်ထားသည်။
