စစ်ကောင်စီတပ် စစ်ကြောင်းထိုးနေခြင်းကြောင့် မကွေးတိုင်း၊ ဆိပ်ဖြူမြို့ရှိ ရွာ ၁၀ ရွာကျော်က ပြည်သူ ၅၀၀၀ ကျော် စစ်ဘေးရှောင်နေရပြီး ရာသီပေါ်ကြက်သွန်နှုန်ရန်ပင် အခက်တွေ့နေကြောင်း ဆိပ်ဖြူဘာမထီပြည်သူ့ကာကွယ်ရေးတပ် ထံကသိရသည်။
ဖေဖော်ဝါရီ ၂၆ ရက်နေ့မှစတင်ကာ အင်အား ၁၀၀ ပါစစ်ကြောင်းသည်ဆိပ်ဖြူမြို့နယ်၊ ရှားလှရွာတွင် တပ်စွဲထားပြီး အနီးဝန်းကျင်ကျေးရွာများဖြစ်သော ရွာသာကုန်း၊ ကျစ်ပြင်၊ သက်ငယ်ကျင်း၊ ထွန်၊ကျွန်းချောင်းနှင့် ရွာသာကုန်းရွာတို့ကို စစ်ကြောင်း ၃ ကြောင်းခွဲ၍ စစ်ကြောင်းထိုးနေခြင်း ဖြစ်သည်။
“စစ်ကြောင်းက ပုသိမ်-မုံရွာလမ်းပိုင်းကနေပြီး စစ်ကြောင်းထိုးလာတာ ၂၆ရက်နေ့မှာ ရှားလှရွာ မှာစခန်းချ ကင်းပုန်းဝပ်ပြီး အနီးနားရွာတွေကို စစ်ကြောင်းထိုးနေတာ”ဟု ဆိပ်ဖြူဘာမထီပြည်သူ့တပ် မှ တပ်ဖွဲ့ဝင်တစ်ဦး က ပြောသည်။
စစ်ကြောင်းရန်ကြောင့် ဒေသခံများမှာ ကြက်သွန်စိုက်ခင်းများကို ပစ်ထားရပြီး အချိန်လွန်ပါက ပျက်စီးတော့မည်ဖြစ်ကြောင်းသိရသည်။
“ကျနော်တို့နယ်က ကြက်သွန်အများဆုံးစိုက်တာ။ခုအချိန်က ကြက်သွန်နှုတ်ရတော့မယ်အချိန်၊ ခုဆို ဒီတိုင်းပစ်ထားရတယ်။ရွာထဲမှာလည်း မနေရဲ ကြက်သွန်လည်းသွားမနှုတ်ရဲနဲ့ဖြစ်နေတာ။သွားနှုတ်ရင်လည်း အဖမ်းခံရဦးမယ်။အသတ်ပါခံရနိုင်တယ်”ဟု ၎င်းကဆိုသည်။
ဖေဖော်ဝါရီ ၂၆ ရက်နေ့မှစတင်ပြီး ဆိပ်ဖြူ-ဆော လမ်းပိုင်းကို ဒေသကာကွယ်ရေးတပ်ဖွဲ့များက ပိတ်ထားပြီး ယနေ့ မတ်လ ၂ ရက်နေ့မှ ပြန်လည်အသုံးပြုနိုင်ကြောင်း လမ်းပိုင်း အသုံးပြုရာတွင် ကန်စွန်းမ ရွာမှ အိုင့်ကြီးကျေးရွာ ကြား မည်သည့်အကြောင်းနှင့်မျှ ကားများ မရပ်ရန်နှင့်ကား မှန်ချမောင်းရန် ဒေသကာကွယ်ရေးတပ်ဖွဲ့များ ပြည်သူများအားမေတ္တာရပ်ခံ ထားကြောင်းသိရသည်။
