By Ra Wai / MPA
ရခိုင်ဒေသတစ်ခုလုံးကို အပြီးသတ်သိမ်းပိုက်ရန် လက်တစ်ကမ်းအလိုသို့ ရောက်ရှိနေပြီဖြစ်ကြောင်း ရက္ခိုင့်တပ်တော်AA က သတင်းထုတ်ပြန်သည်။
ရခိုင်ဒေသတစ်ခုလုံး ရခိုင်ပြည်သူများလက်ထဲသို့ အမြန်ဆုံးရောက်ရှိစေရေးနှင့် စစ်ကောင်စီတပ်ဖွဲ့ဝင်များ ကင်းစင်ရေး ရည်မှန်းချက်များအတွက် စစ်တပ် လက်ကျန်စခန်းများကို တစ်ခုပြီးတစ်ခု ထိုးစစ်ဆင်တိုက်ခိုက်လျက်ရှိပြီး အမ်း၊ တောင်ကုတ်၊ ဂွ နှင့် မောင်တောမြို့များ၌ တိုက်ပွဲများ ဆက်လက်ပြင်းထန်လျက်ရှိကြောင်း သိရသည်။
“အရင်ကတည်းက စစ်ဘေးတွေ၊လေဘေးတွေသင့်ခဲ့တဲ့ ကျတော်တို့ ရခိုင်ပြည်သူတွေဟာ အခု တိုက်ပွဲတွေ အရှိန်အဟုန်နဲ့ပြင်းထန်ခဲ့တဲ့အချိန်ကစပြီး ပိုပြီးဘေးသင့်ကြတယ်။စစ်တပ် ပစ်လို့ သေ ကြတယ်။ ကိုယ့်အိမ်ကိုယ်စွန့်ပြီး အငတ်ငတ်အပြတ်ပြတ်နဲ့ မသေရင်ကံကောင်းပေါ့၊ထွက်ပြေးကြရ တယ်။ ဒါပေမဲ့၊ကျတော်တို့ ရက္ခိုင့်တပ်တော် အာရက္ခတပ်တော်က တစ်မြို့ပြီးတစ်မြို့ သိမ်းပြနေ တော့ ကျတော်တို့ ရခိုင်ပြည်သူတွေ ဒုက္ခရောက်နေပေမဲ့ စိတ်ဓာတ်မကျတဲ့အပြင် အကြီးအကျယ် ထောက်ခံတယ်၊ ပံ့ပိုးတယ်၊ကူညီတယ်။ ဒီနေ့ အာရက္ခတပ်တော်ရဲ့ အောင်ပွဲတွေဟာ အာရက္ခတပ်တော်ရဲ့ တိုက်ခိုက်မှုစွမ်းရည်အပြင် ရခိုင်ပြည်သူတွေရဲ့ ထောက်ခံကူညီနေတာကြောင့် လို့ ပြောချင်တယ်” ဟု ရခိုင်အမျိုးသား စာရေးဆရာတစ်ဦးက MPAသို့ပြောသည်။
၂၀၂၃ ခုနှစ်၊ နိုဝင်ဘာ ၁၃ ရက်မှစတင်၍ ဖြစ်ပွားလာခဲ့သော ရခိုင်ဒေသတွင်း တိုက်ပွဲများ မှာ ၂၀၂၄ ခုနှစ်၊ နိုဝင်ဘာ၁၃ ရက်နေ့သို့ရောက်သည့်တိုင်အောင် အရှိန် လျော့ကျ သွားခြင်းမရှိဘဲ နေ့စဉ်နှင့်အမျှ ဆက်လက်ပြင်းထန်လျက်ရှိကြောင်းစစ်ဆင်ရေးတစ်နှစ်မပြည့်မီကာလအတွင်း ပလက်ဝဒေသ၊ ကျောက်တော်၊ မင်းပြား၊ မြောက်ဦး၊ ရသေ့တောင်၊ ဘူးသီးတောင်၊ ပုဏ္ဏားကျွန်း၊ ရမ်းဗြဲ၊ မြေပုံ၊ ပေါက်တော၊ သံတွဲ နှင့် ကျိန္တလီမြို့များရှိ ရန်သူ့စခန်းအားလုံးကို သိမ်းပိုက်ထိန်းချုပ်ထားနိုင်ခဲ့ပြီးဖြစ်ကြောင်း AA ကဆိုသည်။
အမ်းမြို့နယ် အနောက်ပိုင်းတိုင်းစစ်ဌာနချုပ်ရှိ တပ်စခန်းရှစ်ခုကို သိမ်းပိုက်ရရှိထားပြီဖြစ်ပြီး ကျန်ရှိနေသေးသည့် တပ်စခန်း၁၀ခုအား ဆက်လက်သိမ်းပိုက်နိုင်ရေးအတွက် ထိုးစစ်ဆင် တိုက်ခိုက်လျက်ရှိကြောင်း သိရသည်။
လက်ရှိတွင် အနောက်ပိုင်းတိုင်းစစ်ဌာနချုပ် ပတ်ဝန်းကျင်၌ တိုက်ပွဲများ ပြင်းထန်နေကြောင်း လည်း ဆိုသည်။
