By MPA
ပြည်သူ့ကာကွယ်ရေးတပ်မတော် (PDF) ကို စစ်ရေး၊ စည်းရုံးရေးနှင့် အုပ်ချုပ်ရေးစွမ်းရည် ပြည့်မီသည့် တပ်မတော်အဖြစ် တည်ဆောက်ထားနိုင်ကြောင်း အမျိုးသားညီညွတ်ရေးအစိုးရ (NUG)၊ ပြည်ထောင်စုဝန်ကြီးချုပ် မန်းဝင်းခိုင်သန်းက ယနေ့ (မေ ငါးရက်) တွင် ကျရောက်သည့် PDF ဖွဲ့စည်းခြင်း လေးနှစ်ပြည့် မိန့်ခွန်းတွင် ထည့်သွင်းပြောကြားထားသည်။
” အဲ့ဒီအတွက် အားလုံးကို အထူးဂုဏ်ပြုကြောင်း ပြောကြားလိုတယ်။ စစ်ရေးစွမ်းရည်၊ စည်းရုံးရေးစွမ်းရည်၊ အုပ်ချုပ်ရေးစွမ်းရည် ပြည့်မီတဲ့ တပ်မတော်တစ်ရပ် တည်ဆောက်ထားနိုင်တာကို တွေ့ရလို့ လေးစားဂုဏ်ယူတယ် ” ဟု ၎င်းက ပြောသည်။
ထို့ပြင် တော်လှန်ရေးအောင်ပွဲ နီးသထက်နီးအောင် ကြိုးပမ်းနေကြသည့် ရဲဘော်များအားလုံး စိတ်ဓာတ်ကျဆင်းခြင်းမရှိဘဲ၊ စစ်အာဏာရှင်စနစ် ချုပ်ငြိမ်းကာ နိုင်ငံသူ နိုင်ငံသားအားလုံး လိုလားတောင့်တနေသည့် ဖက်ဒရယ်ဒီမိုကရေစီ နိုင်ငံတည်ထောင်နိုင်ရန်အတွက် ကျန်းမာရွှင်လန်းစွာဖြင့် ဆက်လက်တိုက်ပွဲဝင်နိုင်ရန် ပြည်ထောင်စုဝန်ကြီးချုပ်က ဆုမွန်တောင်းထားသည်။
PDF တည်ထောင်ထားသည့် လေးနှစ်တာကာလအတွင်း ရဲဘော်များ၏ ကိုယ်စွမ်း၊ ဉာဏ်စွမ်း၊ စွန့်လွှတ်ပေးဆပ်မှု၊ ရောင့်ရဲတင်းတိမ်မှုနှင့် အနစ်နာခံမှုများသည် တိုင်းပြည်အတွက် အဖိုးမဖြတ်နိုင်သည့် သမိုင်းမှတ်တမ်းများဖြစ်သည်ဟုလည်း ၎င်းက ဆိုသည်။
တိုင်းပြည်ဘဏ္ဍာငွေကို နှစ်ပေါင်းများစွာ စိတ်ကြိုက်အသုံးပြု တည်ဆော်ကထားသည့် စစ်တပ်ကို လေးနှစ်အတွင်း PDF ရဲဘော်များ၏ ရဲစွမ်းသတ္တိဖြင့် တိုက်ပွဲဝင်ခဲ့ရာ အေင်မြင်မှုအတိုင်းအတာ ရရှိထားပြီလဲဆိုသည်ကို မျက်မြင်ကိုယ်တွေ့ဖြစ်သည်ဟု ပြည်ထောင်စုဝန်ကြီးချုပ်က ပြောသည်။
” ဒီအောင်မြင်မှုတွေမှာ ငါတို့နဲ့အတူ တသွေးတစ်သားထဲ ရပ်တည်တိုက်ပွဲပေးခဲ့ကြတဲ့ မဟာမိတ်တိုင်းရင်းသားတော်လှန်ရေးအဖွဲ့အစည်းတွေနဲ့ ဒေသတွင်း ကာကွယ်ရေးဆိုင်ရာ တပ်တွေကိုလည်း မေ့ထားလို့မရဘူး ” ဟု ၎င်းက ဆိုသည်။
ထို့ပြင် ပြည်တွင်း၊ ပြည်ပ မြန်မာပြည်ဖွား တိုင်းရင်းသား မိသားစုများ၏ ပံ့ပိုးကူညီမှု၊ ထောက်ခံအားဖြည့်မှုများကြောင့် အင်အားကြီးမားသည့် စစ်တပ်ကို အကောင်းဆုံး ဖိအားပေးတိုက်ပွဲဝင်နေနိုင်နေခြင်းဖြစ်သောကြောင့် ပြည်သူများကိုလည်း မေ့ထားရန် မသင့်ကြောင်း ပြည်ထောင်စုဝန်ကြီးချုပ်က ဆိုသည်။
ယင်းအပြင် PDF များ၏ အောင်ပွဲသည် ပြည်သူ့အောင်ပွဲ၊ တော်လှန်ရေးအောင်ပွဲဖြစ်ကြောင်း၊ PDF သည် တစ်တိုင်းပြည်လုံး အတိုင်းအတာဖြင့် ခြုံငုံပြီး စစ်ဆင်ရေးနယ်မြေများကို ဖွဲ့စည်းဆောင်ရွက်ထားပြီဖြစ်သလို စနစ်တကျဖွဲ့စည်းအုပ်ချုပ်များနှင့် ပြည်သူ့တပ်မတော်တစ်ရပ်အဖြစ် အကောင်အထည်ဖော်နေသည်ဟု ၎င်းက ပြောသည်။
