By Ko Paing / MPA
အိမ်နီးချင်းနိုင်ငံများအနေဖြင့် အဓမ္မစစ်သား စုဆောင်းမှုကြောင့် ထွက်ပြေး တိမ်းရှောင် လာသော လူငယ်များကို လူသားချင်းစာနာသော မူဝါဒကို အခြေခံ၍ စောင့်ရှောက်ပေးရန် NUGအစိုးရက တိုက်တွန်းလိုက်သည်။
အတင်းအကျပ် စစ်မှုထမ်းစေခိုင်းနေခြင်းများသည် အဓမ္မလုပ်အား ခိုင်းစေခြင်းနှင့် လူကုန်ကူးမှု ကျူးလွန်ခြင်း မြောက်ကြောင်း တွေ့ရှိရသည့်အပြင် အသက် ၁၈ နှစ်မှ ၃၅နှစ်အတွင်းရှိ လူငယ်များ ကို စစ်ရေးဗျူဟာတစ်ရပ်အနေဖြင့် ကျင့်သုံး၍ စစ်မှုထမ်းစေခိုင်းနေခြင်းသည် လူသားမျိုးနွယ်စုအ ပေါ်ကျူးလွန်သည့် ရာဇဝတ်မှု (Crimes against humanity) မြောက်သည်ဟု သုံးသပ်နိုင်ကြောင်း ထို့ကြောင့် ကုလသမဂ္ဂ၊ အာဆီယံအဖွဲ့ဝင်နိုင်ငံများနှင့် နိုင်ငံတကာ အသိုင်းအ ဝိုင်းအနေနှင့် စစ်အုပ်စု၏ ယခုလုပ်ရပ်များ အမြန်ဆုံးရပ်တန့်နိုင်ရန်အတွက် ထိရောက်သော စီးပွား ရေး ပိတ်ဆို့မှုနှင့် လေယာဉ်ဆီ အပါအဝင် လက်နက်များ တင်ပို့ ရောင်းချမှုအား ပိတ်ပင်ခြင်းတို့ ချက်ချင်းလုပ်ဆောင်ရန် တိုက်တွန်းကြောင်းလည်း NUGအစိုးရ၊လူ့အခွင့်အရေးဆိုင်ရာဝန်ကြီးဌာနက ယနေ့(ဧပြီ၂၈ရက်)ထုတ်ပြန်သည့် “အဓမ္မစစ်မှုထမ်းစေခြင်း – မြန်မာနိုင်ငံရှိ အတင်းအကျပ် စစ်မှုထမ်းစေခြင်း၏ လက်တွေ့အခြေအနေများ” အစီရင်ခံစာ၌ ဖော်ပြထားသည်။
“ကျတော်တို့ လတ်တလောတွေ့ရှိချက်တွေအရဆို အိမ်နီးချင်းတွေဖြစ်တဲ့ ထိုင်းနဲ့ အိန္ဒိယက အကြောင်းအမျိုးမျိုးကြောင့် သူတို့နိုင်ငံထဲမှာ အဖမ်းခံရတဲ့ မြန်မာတွေကို စစ်ကောင်စီဆီ ပြန်လွှဲ တယ်။အလွှဲခံရတဲ့လူငယ်တွေထဲက ငွေပေးပြီး မရွေးနိုင်တဲ့သူတွေကို စစ်တပ်က စစ်မှုထမ်းထဲ ပို့ နေတယ်။ဆိုလိုတာက ကျတော်တို့ရဲ့ အိမ်နီးချင်းတွေက စစ်မှုထမ်းကြောင့် ထွက်ပြေးလာတဲ့ လူ ငယ်တွေကို ကူညီဖို့မပြောနဲ့ စစ်တပ်အတွက်တောင် အဲဒီလို စစ်သားစုဆောင်းပေးသလို လုပ်နေတာ တွေ့ရတယ်”ဟု မဲဆောက်အခြေစိုက် နိုင်ငံရေးတက်ကြွလှုပ်ရှားသူတစ်ဦးက MPA သို့ပြောသည်။
အတင်းအကျပ် စစ်မှုထမ်းစေခိုင်းခံခဲ့ရသည့် လူငယ်များ၏ ထွက်ဆိုချက်များအရ လူငယ်များသည် နေအိမ်များ၊ လုပ်ငန်းခွင်များနှင့် စစ်ဆေးရေး ဂိတ်များတွင် စစ်အုပ်စု၏ စီမံချက် ချမှတ် ဖမ်းဆီးမှုများ ကို ရင်ဆိုင်ခဲ့ရကြောင်း လူငယ်များနှင့် မိသားစုများကို ခြိမ်းခြောက်၊ အကျပ်ကိုင်၊ အတင်းအကျပ် အကြမ်းဖက်ခေါ်ဆောင်သည့် နည်းလမ်းများကိုသုံး၍ စစ်သားစုဆောင်း လျက်ရှိကြောင်း
ထိုသို့ စုဆောင်းခြင်းခံရသည့် လူငယ်များထဲတွင် အသက်မပြည့်သေးသည့် ကလေး သူငယ်များနှင့် စစ်မှုထမ်းရန် မသင့်လျာ်သော ရုပ်ပိုင်း၊ စိတ်ပိုင်းမသန်စွမ်းသူများပင် ပါဝင်ကြောင်းတွေ့ရှိရသည်ဟု လည်း ဖော်ပြထားသည်။
လူအခွင့်အရေးဆိုင်ရာဝန်ကြီးဌာနက မှတ်တမ်းတင်နိုင်သည့် ထွက်ဆိုချက်များအနက် စစ်မှုထမ်းရန် အကျုံးဝင်သည့် လူငယ်များ၏ အမည်စာရင်းကို ကောက်ယူပြီး မိသားစုဝင်များထံ ငွေညှစ်တောင်းခံသည့် ဖြစ်ရပ်များလည်း တွေ့ရကြောင်း ဆိုသည်။
