By Chun Nrein / MPA
ရန်ကုန်တိုင်း တော်လှန်ရေးအင်အားစု အဖွဲ့ပေါင်း တစ်ရာကျော် စုစည်းပြီး ရန်ကုန်ကြားကာလအစီအမံ ရေးဆွဲရေးကော်မရှင်တစ်ရပ်ကို နှစ်ရက်တာစုံညီ အစည်းအဝေးပြုလုပ်ပြီးနောက် အောင်မြင်စွာဖွဲ့စည်းနိုင်ခဲ့ကြောင်း စုံညီအစည်းအဝေးကျင်းပရေးကော်မတီမှ တာဝန်ရှိသူများက ပြောသည်။
ရန်ကုန်ကြားကာလအစီအမံ ရေးဆွဲရေးကော်မရှင်တစ်ရပ်ဖွဲ့စည်းနိုင်ရန်အတွက် လွန်ခဲ့သော တစ်နှစ်ခွဲအချိန်ကပင်က သဘောတူညီခဲ့ပြီးဖြစ်ပြီး ကော်မရှင်ပေါ်ပေါက်ရေးအတွက် ရက်ပေါင်း ၁၆၀တိတိ ဆောင်ရွက်ခဲ့ခြင်းဖြစ်ကြောင်း စုံညီအစည်းအဝေးကျင်းပရေး ကော်မတီမှ တာဝန်ရှိသူ ဒေါက်တဘိုင်အိုက ပြောသည်။
“စစ်အုပ်စု ကျရှုံးသွားတဲ့အချိန်မှာ ရုတ်တရက် ဖြစ်ပေါ်လာနိုင်တဲ့ အာဏာလေဟာနယ်အတွက် အစားထိုးပြီးတော့ ပြည်သူလူထု ထိခိုက်မှုအနည်းဆုံးနဲ့ ရှိနေတဲ့ နွေဦးတော်လှန်ရေးအင်အားစုတွေကြားမှာ တစ်ယောက်နဲ့ တစ်ယောက် ပဋိပက္ခတွေ နည်းပြီး ညီညီညွတ်ညွတ်၊ မျှမျှတတနဲ့ အစားထိုးနေရာယူနိုင်ဖို့အတွက် ရေးဆွဲတဲ့လုပ်ငန်းစဉ်ဖြစ်ပါတယ်”ဟု ၎င်းက ပြောသည်။
ရန်ကုန်ကြားကာလအစီအမံ ရေးဆွဲရေးကော်မရှင်တစ်ရပ်ကို နှစ်ရက်တာ ပြုလုပ်ခဲ့သည့် ရန်ကုန်ပလက်ဖောင်းမျက်နှာစုံညီအစည်းအဝေးမှ အတည်ပြုလိုက်သည့်အတွက် မကြာခင်မှာ အသက်ဝင်တော့မည်ဖြစ်ကြောင်း သိရသည်။
ရန်ကုန်ကြားကာလအစီအမံ ရေးဆွဲရေးကော်မရှင်ကို လွှတ်တော်ကိုယ်စားလှယ်များ၊ ပါတီများ၊ CDM များ၊ မြေပြင်သပိတ်နှင့် တော်လှန်ရေးအင်အားစုများ၊ သမဂ္ဂများ၊ အမျိုးသမီးကဏ္ဍ၊ လူအနည်းစုနှင့် တတ်သိပညာရှင် စသည့် အခန်းကဏ္ဍ စုံလင်စွာဖြင့် ဖွဲ့စည်းရန် သဘောတူညီမှု ရှိခဲ့သည်ဟု ကြားကာလအစီအမံရေးဆွဲရေး အလုပ်အဖွဲ့ဝင် ဦးထွန်းကြည်က ပြောသည်။
“ရန်ကုန်ကောင်းဖို့အတွက်၊ ရန်ကုန်တည်ငြိမ်ဖို့အတွက်နဲ့ စစ်ရာဇဝတ်ကောင်နဲ့ စစ်ရှုံးကောင်စီက တကယ်လို့များ ရန်ကုန်က ဆုတ်ခွာသွားပြီး စစ်ရှုံးပြီဆိုရင် ပါဝါလေဟာနယ်ဖြစ်တဲ့အချိန်မှ ကြိုးစားတာထက် အခုတည်းက ကြိုပြင်တဲ့အနေနဲ့ ကြားကာလအစီအမံ ရေးဆွဲဖို့ အလုပ်အဖွဲ့ကို တာဝန်ပေးပြီး လုပ်ဆောင်တာဖြစ်တယ်”ဟု ၎င်းက ပြောသည်။
ရန်ကုန်ပလက်ဖောင်း၏ အလုပ်အဖွဲ့ဝင်များ ဖွဲ့စည်းရာတွင်လည်း အမျိုးသမီး ပါဝင်မှုအပြင် ကျားမတန်းတူရေးကိုလည်း ချန်လပ်ထားခြင်းမရှိကြောင်းသိရသည်။
“လက်ရှိ အဖွဲ့အစည်းပေါင်း ၆၀ကျော် ပါဝင်တဲ့ ကော်မရှင်မှာ အမျိုးသမီး ပါဝင်မှုနှုန်းက ၁၇ရာခိုင်နှုန်းအထက်မှာရှိတယ်။ LGBTပါဝင်မှုက သုံးရာခိုင်နှုန်းရှိတယ်။ အမျိုးသမီးတွေရဲ့ စွမ်းရည်တွေကို မြှင့်တင်ပေးဖို့၊ ကာကွယ်ဖို့ ဥပဒေရေးဆွဲရေးတွေမှာ ပါဝင်ဖို့ ပထမခြေလှမ်းအနေနဲ့ ကြိုးစားထားတာတွေ ရှိပါတယ်”ဟု ကြားကာလအစီအမံရေးဆွဲရေး အလုပ်အဖွဲ့ဝင်တစ်ဦးဖြစ်သည့် မဒေဝီက ပြောသည်။
ကော်မရှင်နှင့် လူစာရင်းများလည်း ကြေညာပြီးပြီဖြစ်သောကြောင့် ရန်ကုန်ကြားကာလအစီအမံ ရေးဆွဲရေးကော်မရှင်၏ ပထဆုံး အစည်းအဝေးကို လာမည့်မေလ ၁၁ရက်နေ့တွင် ပြုလုပ်မည်ဖြစ်ကြောင်း သိရသည်။
ကြားကာလ အစီအမံရေးဆွဲရေးကော်မရှင် ပေါ်ပေါက်လာရေးအတွက် အမျိုးသားညီညွတ်ရေးအစိုးရ (NUG) ဝန်ကြီးချုပ်ရုံးမှ တာဝန်ရှိသူများနှင့် ထိုင်း-မြန်မာနယ်စပ်တွင် ကနဦး တွေ့ဆုံဆွေး နွေးမှုများလည်း ရှိခဲ့သည်ဟု သိရသည်။
