The Business Standard
ရိုဟင်ဂျာအများစုနေထိုင်သည့် ရခိုင်ပြည်နယ်တွင် လွတ်လပ်သော ပြည်နယ်တစ်ခု တည်ထောင်ပေးရန် ဘင်္ဂလားဒေ့ရှ်နိုင်ငံ၏ အကြီးဆုံး အစ္စလာမ်မစ် နိုင်ငံရေး ပါတီကြီးတစ်ခုဖြစ်သော ဂျာမတ်-အီ-အစ္စလာမီ (Jamaat-e-Islami) အဖွဲ့က တရုတ်ကွန်မြူနစ်ပါတီ (CCP) မှ ဧပြီ ၂၇ က တွေ့ဆုံစဉ် အဆိုပြု တင်ပြထားသည်။
တွေ့ဆုံမှုအပြီး သတင်းထောက်များနှင့် တွေ့ဆုံစဉ် အဖွဲ့၏ ဒုတိယခေါင်းဆောင် ဂျာမတ် နိုင်ယေဘ်-အေ-အမီးရ် ဆီယဒ် အဗ္ဗဒူလာ မိုဟာမက် တာဟေရ်က “ ဘင်္ဂလားဒေ့ရှ်မှာ ရိုဟင်ဂျာ ၁.၂ သန်း ရှိနေပါတယ်။ သူတို့ဟာ လူသား မဆန်တဲ့ ဘဝကို ဖြတ်သန်းနေရပါတယ်။
အစားအသောက်နဲ့ အမိုးအကာပေးရုံနဲ့ ပြဿနာ မပြေလည်ဘူးလို့ တရုတ်ပါတီကိုကျွန်တော်တို့ ပြောခဲ့ပါတယ်” ဟု ပြောကြားခဲ့သည်။
ယင်းပြဿနာကို ဖြေရှင်းရန်နည်းလမ်းမှာ ရိုဟင်ဂျာများအနေဖြင့် ကိုယ်ပိုင်မြေတွင် ပြန်လည်နေထိုင်နိုင်ရန် ဖြစ်ပြီး ရခိုင်တွင် လွတ်လပ်သော ပြည်နယ်သစ်တစ်ခု ထူထောင်နိုင်ရန် အဆိုပြုခဲ့သည်။
” တရုတ်နဲ့ မြန်မာရဲ့ ဆက်ဆံရေးက အင်မတန် ကောင်းမွန်တဲ့အတွက် တရုတ်က အကြီးမားဆုံး အခန်းကဏ္ဍကနေ ပါဝင်ပေးလို့ရပါတယ် ” ဟု ၎င်းက ဆိုသည်။
ပါတီဒုတိယအကြီးအကြတာဟေရ်က တရုတ်ပါတီနှင့် တွေ့ဆုံရာတွင် ဒေသတွင်း လုံခြုံရေးကိစ္စကိုလည်း ဆွေးနွေးခဲ့ကြောင်း ပြောကြားသည်။
“ ဒါဟာ ဒီဒေသမှာ ဘယ်သူ့ကိုမှ ရန်လိုတဲ့ သဘောထား မရှိစေဖို့အတွက်ပါ”
တာဟေရ်က ပါတီအချင်းချင်း တွေ့ဆုံမှုဖြစ်ကြောင်းနှင့် ယခုတွေဆုံမှုသည် CCP နှင့် ဆက်ဆံရေး တိုးမြှင့်ရန် ဂျာမတ်အတွက် အခွင့်အရေးကောင်းတစ်ခုဖြစ်ကြောင်းလည်း ပြောကြားသည်။
ဒေသတွင်း၌ တီစတာရေကာတာ၊ ဒုတိယမြောက် ပက်ဒမာ တံတားနှင့် ရေနက်ဆိပ်ကမ်းတစ်ခု တည်ဆောက်ရေးတို့အတွက် ရင်းနှီးမြှုပ်နှံမှုများ ပြုလုပ်ပေးရန်လည်း တောင်းဆိုခဲ့ကြောင်း ၎င်းက သတင်းထောက်များကို ပြောကြားသည်။
“ ရေနက်ဆိပ်ကမ်းတွေကနေတစ်ဆင့် အပြာရောင်စီးပွားရေးကို မြှင့်တင်သင့်တယ်လို့ ကျွန်တော်တို့ ပြောခဲ့ပါတယ်။ ဘင်္ဂလားဒေ့ရှ်က ကျောင်းသားတွေကိုလည်း ပညာသင်ဆုအကြီးတွေ ပေးဖို့ တောင်းဆိုခဲ့ပါတယ်”
မိမိတို့နယ်မြေအတွင်း ရွေးကောက်ပွဲများ ကျင်းပနိုင်မည့် အခြေအနေများနှင့် ပြုပြင်ပြောင်းလဲရေးကိစ္စများ၊ ပါတီအနေဖြင့် အတိုင်ပင်ခံချုပ်က ချမှတ်ထားသော အချိန်ဇယားကို ထောက်ခံနိုင်ခြင်းရှိ၊ မရှိ စသည်တို့ကို သိလိုကြောင်း CCP က မေးမြန်းခဲ့သည်။
“ တရုတ်ကိုယ်စားလှယ်တွေက တရုတ်အစိုးရဟာ တခြားနိုင်ငံရဲ့ ပြည်တွင်းရေးကို ဝင်ရောက်စွက်ဖက်လေ့မရှိဘူးလို့ ပြောပါတယ်။ အဲဒီမူဝါဒကို ဘင်္ဂလားဒေ့ရှ်မှာလည်း ကျင့်သုံးသွားပါလိမ့်မယ်”
ဆွေးနွေးပွဲတွင် CCP ကိုယ်စားလှယ်အဖွဲ့ကို CCP ဗဟိုကော်မတီ၏ နိုင်ငံတကာရေးရာဌာန၊ အရှေ့တောင်အာရှနှင့် တောင်အာရှရေးရာဗျူရိုမှ ပန်ကျူဘင်က ဦးဆောင်ခဲ့သည်။
ဂျာမတ် ကိုယ်စားလှယ်အဖွဲ့တွင် လက်ထောက်အတွင်းရေးမှူးချုပ်များဖြစ်သော ရာဖီကူလ် အစ္စလာမ် ခန်နှင့် အီဆန်နူလ် မာဘူဘ် ဇိုဘေယာ၊ ပြန်ကြားရေးဌာန အတွင်းရေးမှူး မာတီယူး ရာမန် အာကန်ဒ်နှင့် အမှုဆောင်ကောင်စီ အဖွဲ့ဝင်များဖြစ်သော မိုဟာမက် ဆယ်လင် အူဒင်နှင့် နူရူလ် အစ္စလာမ် ဘူလ်ဘူလ်တို့ ပါဝင်ခဲ့သည်။
