By Ko Paing / MPA
အာဆီယံ အကြမ်းဖက်မှုတန်ပြန်တိုက်ဖျက်ရေးလုပ်ငန်းအဖွဲ့တွင် မြန်မာစစ်အုပ်စုကို ပါဝင်ခွင့် ပေးခြင်းသည် လူသတ်ယန္တရားပိုမိုအားကောင်းလာအောင် ကူညီနေခြင်းဖြစ်ကြောင်း Defend Myanmar Democracy က ဝေဖန်လိုက်သည်။
အာဆီယံ အကြမ်းဖက်မှုတန်ပြန်တိုက်ဖျက်ရေးလုပ်ငန်းအဖွဲ့ (ADMM) တွင် စစ်အုပ်စု ပါဝင်ခွင့်ရခြင်းကြောင့် ဒေသဆိုင်ရာ စစ်ဘက်နည်းဗျူဟာများကို လက်လှမ်းမီစေခြင်း၊အကြမ်းဖက် တိုက်ဖျက်ရေးနှင့် ဆိုက်ဘာကာကွယ်ရေးဆိုင်ရာ ဆွေးနွေးမှုများမှ သင်ယူလေ့လာနိုင်ခြင်းနှင့်ရရှိလာသော သတင်းအချက်လက်များအပေါ်အခြေခံကာ စစ်အုပ်စု၏ အကြမ်းဖက်နည်းများကို အဆင့်မြှင့်ပြီး ပြန်လည်အသုံးချလာနိုင်ခြင်းတို့ ဖြစ်လာနိုင်ကြောင်း Defend Myanmar Democracy က ဆိုသည်။
“စစ်အုပ်စုနဲ့ လက်ဆွဲနှုတ်ဆက်မှုတိုင်းဟာ လူသတ်ကောင်ကို အားဆေးကျွေးနေတာပါ”ဟု Defend Myanmar Democracy က ထုတ်ပြန်သည်။
အာဆီယံသည် ရာဇဝတ်သား စစ်အုပ်စုကို သံတမန်ရေးရာ နေရာပေးနေရုံတင်မက ရာဇဝတ်ကောင်များ ပိုမို ထိရောက်စွာ လူသတ်နိုင်အောင် လက်နက်ကိရိယာပါ တပ်ဆင်ပေးနေသည်ကို ရှင်းရှင်း လင်းလင်း သိမြင်ရန်လိုကြောင်းလည်း ဆိုသည်။
“မြန်မာ့အရေးနဲ့ ပတ်သက်ပြီး အာဆီယံရဲ့ လုပ်နိုင်စွမ်းက အာဆီယံမူ၅ရပ်ကို လိုက်နာပါလို့ အော်နေ ရုံထက်ပိုတာဆိုလို့ စစ်ခေါင်းဆောင်တွေကို အာဆီယံထိပ်သီးအစည်းအဝေး ပေးမတက်တာပဲရှိ တယ်။အဲဒါထက်ပိုပြီး ဘာမှမလုပ်နိုင်ဘူး။အာဆီယံအနေနဲ့ မူငါးရပ်ကို မလိုက်နာရင် ဘယ်လိုအရေး ယူမယ်ဆိုတဲ့ အရေးယူမှုယန္တရားမဖော်ဆောင်နိုင်ဘူး”ဟု မဲဆောက်အခြေစိုက် နိုင်ငံရေးတက်ကြွ လှုပ်ရှားသူတစ်ဦးက MPAသို့ပြောသည်။
စစ်အုပ်စုကို ADMM တက်ရောက်ခွင့်မပေးရန်နှင့် စစ်ရာဇဝတ်ကောင်များနှင့် စစ်ဘက်ဆိုင်ရာညှိနှိုင်းဆောင်ရွက်မှုများကို ရပ်ရန်လည်း Defend Myanmar Democracy ကတောင်းဆိုလိုက်သည်။
မလေးရှားဝန်ကြီးချုပ် အန်ဝါအီဘရာဟင်က မြန်မာနိုင်ငံတွင်း ငြိမ်းချမ်းရေးအတွက် တောင်းဆိုမှု များနှင့် ငလျင်ဘေးအပြီး အပစ်အခတ်ရပ်စဲရေး တိုက်တွန်းမှုများ ရှိနေသော်လည်း လက်ရှိအာဆီ ယံဥက္ကဌဖြစ်သည့် မလေးရှားနိုင်ငံက အာဆီယံ၏ အကြမ်းဖက်မှုတန်ပြန်တိုက်ဖျက်ရေး အစီအစဉ် များသို့ မြန်မာစစ်တပ်ကို ဖိတ်ခေါ်ခဲ့ခြင်းသည် စစ်ရာဇဝတ်မှုများတွင် အာဆီယံ အဖွဲ့၏ ကြံရာပါမှုကို ပိုမိုနက်ရှိုင်းစေရုံသာမက မလေးရှားနိုင်ငံက ထုတ်ဖော်ပြောကြား ထားသည့် ကတိကဝတ်များကိုပါ ထိခိုက်စေနိုင်သည်ဟု Justice For Myanmar က ဧပြီ၂၃ရက်၌ ထုတ်ပြန်ထားသည်။
