By Mg Dagon / MPA
စစ်အုပ်စု အာဏာသိမ်းမှုကြောင့် ပျက်ယွင်းနေသော နိုင်ငံ့အရေးကို မျက်ကွယ်ပြုထားသည့် စစ်ကောင်စီခေါင်းဆောင် ဗိုလ်ချုပ်မှူးကြီး မင်းအောင်လှိုင်က မြန်မာ့နိုင်ငံရေးသမိုင်းကို နောင်လာနောက်သားများ အမှန်အတိုင်းသိရန်လိုအပ်သည်ဟု ပြောကြားလိုက်သည်။
ယမန်နေ့ ( ဧပြီ ၂၄ ရက် )က ငလျင်ဒဏ်ကြောင့် ထိခိုက်ပျက်စီးမှုများရှိခဲ့သော နေပြည်တော်ရှိ အမျိုးသားစာကြည့်တိုက်ကို လာရောက်ကြည့်ရှုစဉ်အတွင်း ၎င်းက အထက်ပါအတိုင်း ထည့်သွင်းပြောကြားခဲ့ခြင်းဖြစ်သည်။
“စာကြည့်တိုက်အတွင်း နိုင်ငံတော်ရဲ့ နိုင်ငံရေးဖြစ်ပေါ်ပြောင်းလဲမှုသမိုင်းဖြစ်ရပ်မှန်များကို ရေးသားဖော်ပြထားတဲ့ စာကောင်းပေမွန်များကို ထိန်းသိမ်းထားရှိရန်လိုပါတယ်။ မြန်မာ့နိုင်ငံရေးသမိုင်းစဉ်ကို နောင်လာနောက်သားတို့ အမှန်အတိုင်းသိရှိနိုင်ရန်လိုအပ်တဲ့အတွက် မိမိတို့တာဝန်ရှိသူများအနေနဲ့ အစဉ်အဆက်လက်ဆင့်ကမ်းပြီး ထိန်းသိမ်းစောင့်ရှောက်သွားကြရမှာဖြစ်တယ်” ဟု စစ်ကောင်စီ ခေါင်းဆောင်က ပြောသည်။
ထို့အပြင် စာကြည့်တိုက်အတွင်းရှိစာအုပ်များကို စာပေအမျိုးအစားအလိုက် ခွဲခြား၍ ထိန်းသိမ်းထားရှိရန်နှင့် ထိခိုက်ပျက်စီးမှုများကို ပြန်လည်ပြုပြင်ရမည်ဖြစ်ကြောင်း ၎င်းက အမိန့်ပေးသွားသည်။
“ဘယ်လိုအမှန်အတိုင်း လုပ်မလဲတော့မသိဘူး။ ကျမတို့တော့ အမှန်အတိုင်းသိသွားလို့ နိုင်ငံခြားရောက်ဖူးသွားပြီလေ” ဟု စစ်ကောင်စီရန်ကြောင့် ထိုင်းနိုင်ငံသို့ ထွက်ပြေးတိမ်းရှောင်လာရသူ အမျိုးသမီးငယ်တစ်ဦးက ပြောသည်။
မြန်မာ့သမိုင်းစဉ်နှင့်ပတ်သက်၍ မြန်မာဘုရင်များအကြောင်းမှာ ၎င်းတို့၏ဩဇာခံများက ရေးသားခဲ့ခြင်းဖြစ်သည့်အတွက် သမိုင်းကြောင်းမှာ ကောင်းကြောင်းများသာဖြစ်ပြီး စစ်ခေါင်းဆောင်မှာလည်း ထိုအတိုင်း ရေးသားခိုင်းမှသာ ကောင်းမွန်းသော်လည်း မမှန်ကန်သည့်သမိုင်းကြောင်းထွက်လာမည်ဟု ပြည်သူအများက ဝေဖန်ပြောဆိုသည်။
“ဘာတွေပြောနေမှန်းလဲ မသိပါဘူးဗျာ။ မြန်မာ့သမိုင်းကြောင်းမှာတော့ စစ်တပ်က အာဏာတွေသိမ်းပေါင်းများလို့ နိုင်ငံချွတ်ခြုံကျနေတာပဲရှိပါတယ်” ဟု ရန်ကုန်မြို့နေ အမျိုးသားတစ်ဦးက မှတ်ချက်ပေးပြောသည်။
စစ်ကောင်စီခေါင်းဆောင် မင်းအောင်လှိုင်သည် ယမန်နေ့က အမျိုးသားစာကြည့်တိုက်အပြင် နေပြည်တော်ရှိ စစ်အစိုးရခေါင်းဆောင် သန်းရွှေတည်ခဲ့သည့် ဥပ္ပါတသန္တိစေတီတော်ကိုလည်း သွားရောက်ကြည့်ရှုခဲ့သည်ဟု စစ်ကောင်စီလက်အောက်ခံမီဒီယာများက ထုတ်ပြန်သည်။
ထိုစေတီတော်တွင် ထိခိုက်ပျက်စီးခဲ့သည့် ရင်ပြင်တော်နေရာများ၊ မြေထိန်းနံရံနေရာများနှင့် သာသနိကအဆောက်အဦတို့ကို မိုးရာသီမရောက်မီ အမြန်ဆုံးပြုပြင်ရမည်ဖြစ်ကြောင်း စစ်ခေါင်းဆောင်က အမိန့်ပေးသွားသည်။
မြန်မာ့နိုင်ငံရေးသမိုင်းတွင် ၁၉၄၈ ခုနှစ်၊ ဇန်နဝါရီ ၄ ရက်နေ့တွင် လွတ်လပ်ရေးရပြီးနောက် ၁၉၆၂ ခုနှစ်တွင် ပထမဆုံးစစ်အာဏာရှင် နေဝင်းက အာဏာသိမ်းပြီး သမ္မတတက်လုပ်ခဲ့သည်။ ထို့နောက် ဦးသန်းရွှေက ၁၉၉၀ ပြည့်နှစ်တွင် ရွေးကောက်ပွဲနိုင် အမျိုးသားဒီမိုကရေစီအဖွဲ့ချုပ်(NLD)ပါတီကို ဖြုတ်ချပြီး ထပ်မံအာဏာသိမ်းပြီးနောက် နှစ် ၃၀ ခန့် အုပ်ချုပ်ခဲ့သည်။ နောက်ဆုံးအနေဖြင့် ၂၀၂၁ ခုနှစ်တွင် စစ်အာဏာရှင်လက်သစ် မင်းအောင်လှိုင်က ၂၀၂၀ ပြည့်နှစ်ရွေးကောက်ပွဲနိုင် NLD ပါတီကိုပင် ဖြုတ်ချ၍ အာဏာသိမ်းထားသည်မှာ ငါးနှစ်အတွင်းသို့ရောက်နေပြီဖြစ်သည်။
