By Ra Wai / MPA
မွန်ပြည်နယ်၊ မော်လမြိုင်မြို့ပေါ်ရှိ လောင်းကစားဒိုင်နှင့်မူးယစ်ဆေးရောင်းချသူတို့မှာ ဖမ်းဆီး ခံရခြင်းမရှိစေရန်အတွက် ပြည်ခိုင်ဖြိုးပါတီဝင်ထားကြကြောင်း သိရသည်။
မော်လမြိုင်မြို့ပေါ်တွင် ၂၀၂၂ ခုနှစ်မှစတင်ကာ WYစိတ်ကြွရူးသွပ်ဆေးပြားရောင်းချခြင်းကို တရား ဝင်လုပ်ငန်းသဖွယ် ဗြောင်ကျကျလုပ်ကိုင်နေကြသလို ၂၀၂၄ ခုနှစ်ပွင့်လင်းရာသီမှစ၍ ဇာတ်ပွဲသွင်း၍ လောင်းကစားဝိုင်းခင်းခြင်းကို ဆက်တိုက်ဆိုသလို လုပ်ဆောင်ခဲ့ကြရာ ယင်းတရားမဝင်လုပ်ငန်းများ လုပ်ကိုင်နေကြသည့် အလတ်စားနှင့် အောက်ခြေအဆင့် တို့မှာ အာဏာပိုင်တို့၏ ဖမ်းဆီးမှုမခံရရေး အတွက် ပြည်ခိုင်ဖြိုးပါတီဝင်ကြကြောင်း မွန်ပြည်နယ်အစိုးရအဖွဲ့ရုံးနှင့် နီးစပ်သူထံမှ သိရသည်။
“တကယ့်ခေါင်ပိုင်းကောင်တွေက ဝန်ကြီးချုပ်နဲ့ တိုက်ရိုက်ပတ်သက်တာဆိုတော့ ဘယ်သူမှ မထိရဲ ဘူး။အလယ်အလတ်အဆင့်က မြို့နယ်စီမံအဆင့်နဲ့ ပတ်သက်တယ်။အောက်ခြေအဆင့်က အုပ်ကြီး တွေနဲ့ လုံးတယ်။အဓိကက ရဲတွေ၊စစ်သားတွေ ဖမ်းရင် ရှင်းလို့ရအောင် ကြံ့ဖွတ်(ပြည်ခိုင်ဖြိုး)ထဲ ဝင် ထားကြတာ”ဟု ၎င်းက MPA သို့ပြောသည်။
စစ်ကောင်စီခန့် မွန်ပြည်နယ်ဝန်ကြီးချုပ်အောင်ကြည်သိန်းသည် မွန်ပြည်နယ်ပြည်ခိုင်ဖြိုးပါတီဥက္ကဌ ဖြစ်ပြီး မော်လမြိုင်မြို့နယ်စီမံအုပ်ချုပ်ရေးအဖွဲ့တွင် ပြည်ခိုင်ဖြိုးပါတီဝင် အောင်ကြည်သိန်း၏ တပည့်များက လွှမ်းမိုးထားကာ ပြည်ခိုင်ဖြိုးပါတီဝင်များကိုသာ ရပ်ကျေးအုပ်ချုပ်ရေးမှူးခန့်ထား ကြောင်း သိရသည်။
“မော်လမြိုင်မှာ ရဲလောက်ကို အုပ်ကြီးတွေက ကျွတ်စရာမလိုဘူး။ကြံ့ဖွတ်ကတ်ရှိရင် ရှင်းရတာ မ ခက်ဘူး။အဲဒါကြောင့် တရားမဝင်ကောင်တွေက လိုင်းကြေးလည်းပေးတယ်။ပါတီထဲလည်း ဝင် ထားတယ်”ဟု ၎င်းက ဆက်လက်ပြောသည်။
အောက်ခြေအဆင့် မူးယစ်ဆေးရောင်းသူအများစုမှာ အုပ်ကြီးများကိုသာ လိုင်းကြေးပုံမှန်ပေးပြီး ရဲ များအား ပက်ပင်းတိုးမှသာ လက်ဖက်ရည်ဖိုးမျှ ပေးကြောင်း သိရသည်။
လက်ရှိ မော်လမြိုင်မြို့နယ်စီမံအုပ် ချုပ်ရေးအဖွဲ့ဝင် တင်ချို(မော်လမြိုင်မြို့နယ် ပြည်ခိုင်ဖြိုးပါ တီဥက္ကဌ)မှာ မော်လမြိုင်မြို့ပေါ်တွင် အာဏာကြီးပြီး လာဘ်စားရာ၌လည်း နာမည်ကြီး ကြောင်း သိရသည်။
