By Mg Dagon / MPA
စစ်ကောင်စီလက်ထဲ ပြန်ပေးလိုက်ရသည့် ရှမ်းပြည်နယ်(မြောက်ပိုင်း)၊ လားရှိုးမြို့သို့ ဝင်ရောက်လာသည့် စစ်ကောင်စီတပ်ယာဉ်တန်းကို မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)၏ လူကြီးများက ခရီးဦးကြိုဆိုခဲ့ကြောင်း မျက်မြင်တွေ့ရှိခဲ့သည့် မြို့ခံများထံမှ သိရသည်။
ယမန်နေ့ ဧပြီ ၂၁ ရက်က MNDAA တပ်ဖွဲ့ဝင်များ လားရှိုးမြို့မှ အပြီးသတ်ဆုတ်ခွာသွားခဲ့ပြီးနောက် ယနေ့တွင် စစ်ကောင်စီတပ်သည် မော်တော်ယာဉ် ၇၀ ထက်မနည်းပါဝင်သည့် စစ်ယာဉ်တန်းဖြင့် ဝင်ရောက်လာခဲ့ခြင်းဖြစ်သည်ဟု ၎င်းတို့က ပြောသည်။
“မြို့ပြင် မယ်ဟန်ဘက်ကနေ စစ်ကားအစီးရေ ၇၀ ကျော်နဲ့ ဝင်လာပါတယ်။ အဝိုင်းပတ်မှာ ကားအပြည့်နဲ့ ယူနီဖောင်းအပြည့်နဲ့ ဝင်လာတာပါ။ ကိုးကန့်ဘက်က လူကြီးတွေလည်း ကြိုနေကြတယ်” ဟု မျက်မြင်တွေ့ရှိခဲ့သည့် လားရှိုးမြို့ခံ အမျိုးသမီးတစ်ဦးက MPA သို့ပြောသည်။
မျက်စိတစ်ဆုံးအထိရှည်လျားသည့်စစ်ယာဉ်တန်းသည် မယ်ဟန်ရွာဘက်မှနေ၍ လားရှိုးမြို့တွင်းသို့ ဝင်ရောက်သွားပြီးနောက် အချို့စစ်ကောင်စီတပ်ဖွဲ့ဝင်များမှာ လားရှိုးတက္ကသိုလ်ရှေ့တွင် ရောက်ရှိနေကြောင်း မြို့ခံ နောက်တစ်ဦးက ပြောသည်။
“အခု လားရှိုးတက္ကသိုလ် အရှေ့မှာတော့ သူတို့တွေ နေရာယူထားပါတယ်။ စစ်ဒဏ်ကြောင့်ပျက်စီးသွားတဲ့ဒဏ်ကို ပြန်ပြင်ဖို့ထင်တယ်။ တပ်စွဲဖို့လောက်အထိတော့ မဖြစ်နိုင်ပါဘူး။ အင်အားနည်းနည်းပါးပါးပဲဆိုတော့” ဟု ၎င်းတွေ့ရှိခဲ့သည်ကို ပြောသည်။
လတ်တလော လားရှိုးမြို့တွင်း၌ ပုံမှန်အတိုင်း လှုပ်ရှားသွားလာနေကြပြီး အပြောင်းအလဲမရှိကြောင်း ယင်းမြို့ခံများထံမှ သိရသည်။
“ပုံမှန်အတိုင်းပါပဲ။ သွားလာနေကြတယ်။ ဘာမှစိုးရိမ်ထိတ်လန့်နေတာမျိုးတော့မရှိသေးဘူး” ဟု လားရှိုးမြို့ခံအမျိုးသားတစ်ဦးက ပြောသည်။
လတ်တလော လားရှိုးမြို့အတွင်း MNDAA တပ်ဖွဲ့ဝင်များမရှိတော့သော်လည်း ၎င်းတို့၏ ရဲတပ်ဖွဲ့အချို့နှင့် လူကြီးအချို့ကျန်ရှိခဲ့ကြောင်း မြို့ခံများထံမှ သိရသည်။
“ကိုးကန့်ဘက်ကလူတွေကတော့ အနည်းအကျဉ်းပဲရှိပါတော့တယ်။ စစ်တပ်က နေရာပြန်ယူနေကြပြီ” ဟု လားရှိုးမြို့တွင်ရောက်ရှိနေသူတစ်ဦးက ပြောသည်။
သို့သော် လားရှိုးမြို့ဆေးရုံကြီးအပါအဝင် အစိုးရဌာနရုံးများမှာမူ MNDAA တပ် စတင်ဆုတ်ခွာသွားခဲ့စဉ်ကအတိုင်း ပိတ်ထားဆဲဖြစ်ကြောင်း သိရသည်။
ယခုကဲ့သို့ စစ်ကောင်စီတပ်ပြန်လည်ဝင်ရောက်လာခြင်းကြောင့် မြို့ခံအချို့ ထိတ်လန့်မှုရှိနေပြီး အချို့လည်း ပုံမှန်အတိုင်းရှိနေကြကာ ကိုးကန့်တပ်စိုးမိုးပြီးနောက် လားရှိုးမြို့တွင် ပြန်လည်ဝင်ရောက်နေထိုင်နေသည့် တော်လှန်ရေးအင်အားစုများအနေဖြင့် ပြန်လည်ထွက်ခွာသွားကြပြီဖြစ်သည်ဟု သိရသည်။
လက်ရှိ လားရှိုးမြို့တွင် MNDAA နှင့် စစ်ကောင်စီတပ် ဆွေးနွေးပွဲကို တရုတ်ဘက်မှ ဦးဆောင်ခဲ့သူ တရုတ်အထူးကိုယ်စားလှယ် မစ္စတာ တိန့်ရွှီကျွင်း ပြီးခဲ့သည့်ရက်ပိုင်းကတည်းက ရောက်ရှိနေပြီး ၎င်းရောက်ရှိခဲ့စဉ်က လားရှိုးမြို့အဝင်/အထွက်ကို ဧပြီလ ၂၀ ရက်နေ့က ခေတ္တပိတ်ခဲ့သေးသည်ဟု မြို့ခံများက ပြောသည်။
ရှမ်းပြည်နယ်(မြောက်ပိုင်း)ရှိ အရှေ့မြောက်တိုင်းစစ်ဌာနချုပ်(ရမခ)ရှိရာ မြို့တော် လားရှိုးကို MNDAA နှင့် မဟာမိတ်တပ်များကို ၁၀၂၇ ဒုတိယလှိုင်းဖြစ်သည့် ဇူလိုင်လ ၂၅ ရက်နေ့တွင် အပြီးသတ်တိုက်ခိုက်သိမ်းပိုက်နိုင်ခဲ့သည်။
ထို့နောက် စစ်ကောင်စီက တရုတ်နှင့်ပူးပေါင်းပြီးနောက် MNDAA အနေဖြင့် တရုတ်ဖိအားဒဏ်နှင့်ရင်ဆိုင်ခဲ့ရပြီးနောက် ပြီးခဲ့သည့်နှစ် ဒီဇင်ဘာလလယ်နှင့် ယခုနှစ် ဇန်နဝါရီလလယ်တို့တွင် တရုတ်နိုင်ငံ၊ ယူနန်ပြည်နယ်၊ ကူမင်းမြို့တွင် နှစ်ကြိမ်တိုင်ဆွေးနွေးခဲ့ကြသည်။
ထိုဆွေးနွေးပွဲများမှတစ်ဆင့် အသက်သွေးချွေးများဖြင့်စုပေါင်းတိုက်ယူခဲ့ရသည့် လားရှိုးမြို့ကို စစ်ကောင်စီတပ်က သေနတ်တစ်ချက်ပင်မဖောက်ဘဲ တရုတ်အကူအညီဖြင့် ယခုအခါ ပြန်လည်ရယူသွားခဲ့ပြီဖြစ်သည်။
