By Poesangle / MPA
ရှမ်းပြည်နယ်မြောက်ပိုင်း၊ လားရှိုးမြို့နှင့် ပတ်သက်ပြီး ပြောရန် အင်အားမရှိတော့ဟု MNDAA ကဖွဲ့စည်းထားသည့် လားရှိုးမြို့ ပြန်လည်ထူထောင်ရေးအဖွဲ့ တာဝန်ခံက MPA သို့ပြောသည်။
လက်ရှိ MNDAA တပ်ဖွဲ့များ လားရှိုးမြို့မှ ဆုတ်ခွာနေမှုနှင့် ပြည်သူများအတွက် ဆောင်ရွက်ထားရှိမှု အခြေအနေများကို MPA က မေးမြန်းရာ၌ ၎င်းက အထက်ပါ အတိုင်းပြန်လည်ဖြေကြားခဲ့ခြင်းဖြစ်သည်။
” ဘာမှ ပြောစရာမရှိပါဘူး။ ပြောဖို့လည်း အားမရှိလို့ပါ ” ဟု လားရှိုးမြို့ပြန်လည်ထူထောင်ရေးတာဝန်ခံက ပြောသည်။
တရုတ်နိုင်ငံအစိုးရ၏ ကြားဝင်ညှိနှိုင်းမှုဖြင့် ကိုးကန့်တပ်(MNDAA) များသည် ယနေ့ (ဧပြီ ၂၁ရက်) နောက်ဆုံးထားပြီး လားရှိုးမြို့မှ ရွှေ့ပြောင်းပေးရခြင်းဖြစ်ကာ ယနေ့ နံနက်အစောပိုင်း၌ ကိုးကန့်အလံတိုင်များကို ၎င်းတို့ကိုယ်တိုင် ပြန်လည်ဖြုတ်သိမ်းခဲ့ကြောင်း ဒေသခံများထံမှ သိရသည်။
“ ဒီနေ့ ထူးတာကတော့ ကိုးကန့်က သူအလံတွေ လိုက်ဖြုတ်တာရှိတယ်။ အစည်းအဝေးကလည်း မနက်ဖြန် ထပ်တွေ့မယ်လို့ ပြောကြတယ်။ မြို့ထဲအသွားအလာတော့ ပုံမှန်ဘဲ၊ ပြီးတော့ စစ်တပ်ကလည်း စစ်ဝတ်စုံနဲ့ ဝင်လာတာမတွေ့သေးဘူး။ ဆွေးနွေးပွဲတက်တဲ့သူတွေလောက်ပဲ ရောက်လာတာ၊ ရဲစခန်းနဲ့ အခြားဌာနဆိုင်ရာတွေလည်း ဖွင့်တာမရှိသေးဘူး။ အခုလောလောဆယ်တော့ ကိုးကန့်တပ်ဖွဲ့တွေရှိပါသေးတယ်” ဟု လားရှိုးမြို့ခံ အမျိုးသားတစ်ဦးက ပြောသည်။
လက်ရှိ ကိုးကန့်တပ်၊ စစ်ကောင်စီနှင့် တရုတ်ကိုယ်စားလှယ်များသည် လားရှိုးမြို့ ဆင်နှစ်ကောင်ဟိုတယ်၌ ရှိကြပြီး ယင်းဟိုတယ် အဝင်းလမ်းကိုပိတ်ဆို့ထားကာ ဧပြီ ၂၂ရက်တွင်လည်း ဆွေးနွေးမှုများ ထပ်မံပြုလုပ်ရန် ရှိနေကြောင်း ဒေသခံများထံမှ သိရသည်။
ထို့ပြင် လားရှိုးမြို့၏ အုပ်ချုပ်ရေးယန္တရားကို မည်သည့်အဖွဲ့က အုပ်ချုပ်မည်နှင့် ပတ်သက်ပြီး သေချာသော အဖြေမထွက်ရှိသေးခြင်းကြောင့် CDM ဝန်ထမ်းအချို့နှင့် ဒေသခံအချို့တို့သည် မိမိလုံခြုံရေးအရ ကြိုတင် တိမ်းရှောင်နေသူများလည်းရှိနေကြောင်း သိရသည်။
“ ကိုးကန့်က တရားဝင်ထုတ်ပြန်တာတော့ မရှိသေးဘူး။ ဒါပေမဲ့ စစ်ကောင်စီက အားသာသွားမယ်လို့ထင်တယ်။ ဘာလို့လဲဆိုတော့ တရုတ်လည်းပါနေတယ်တာဆိုတော့လေ၊ ကိုးကန့်သာ ဆုတ်ခွာရမယ်ဆိုရင်တော့ လူထုတွေကို တောင်းပန်သင့်တယ်။ ဝမ်းနည်းကြောင်းလည်း ပြောရမယ်။ သူတို့မထွက်ခွာခင် လူထုအတွက် ဘာတွေလုပ်ဆောင်ပေးထားလည်းတော့ ထုတ်ပြန်သင့်တယ်လို့ မြင်တယ်။ မဟုတ်ရင်တော့ လူထုက အရင်လိုပဲ ပြေးရအုန်းမယ် “ ဟု လားရှိုးမြို့ခံ အမျိုးသမီးတစ်ဦးက ပြောသည်။
လက်ရှိ လားရှိုးမြို့နှင့် ပတ်သက်ပြီး စစ်ကောင်စီနှင့် MNDAA ကပါ တရားဝင်ထုတ်ပြန်ပြောကြားမှုများမရှိခြင်းကြောင့် ဒေသခံများ ပိုမိုစိုးရိမ်နေခြင်းလည်းဖြစ်သည်။
ပြီးခဲ့သည့် ဧပြီ ၁၈ရက်မှ စတင်ကာ စစ်ကောင်စီတပ်များ၊ ဌာနဆိုင်ရာဝန်ထမ်းအချို့သည် လားရှိုးမြို့သို့ ဝင်ရောက်လာခြင်းဖြစ်ပြီး ၎င်းတို့မြို့တွင်းသို့ အေးချမ်းစွာဝင်ရောက်နိုင်ရန်အတွက် MNDAA တပ်များက လုံခြုံရေး ရယူပေးခဲ့ရသည်။
ထို့ပြင် လားရှိုးမြို့အတွင်း ကိုးကန့်တပ်၊ စစ်ကောင်စီနှင့် တရုတ်ကိုယ်စားလှယ်အဖွဲ့တို့ ဆွေးနွေးနေစဉ်ကာလအတွင်း လားရှိုး၊ သီပေါလမ်းပိုင်းနှင့် လားရှိုးမြို့အဝင်အထွက်ကိုလည်း ယာယီပိတ်ထားကြောင်း သိရသည်။
“ လိုင်းပေါ်မှာတော့ အဝင်အထွက်ပိတ်တယ်လို့ တင်ကြတာတွေ့တယ်။ ကျတော် မနေ့က လားရှိုးကနေ လာတာ အထွက်လည်းရတယ်။ အဝင်လည်းရတယ်။ ဒါပေမဲ့ ကိုးကန့်တပ်ကတော့ အတင်းအကျပ်စစ်ဆေးနေတာရှိတယ်။ ပြီးတော့ စစ်ကောင်စီသာ လားရှိုးကို အုပ်ချုပ်မယ်ဆိုရင်တော့ ဒေသခံတွေအပြင် ကားသမားတွေလည်း အခက်တွေ့နိုင်တယ်” ဟု လားရှိုးမြို့သို့ ကုန်စည်ပို့ဆောင်ပေးနေသည့် ကားသမားတစ်ဦးက ပြောသည်။
ယင်းအပြင် ဆွေးနွေးပွဲအားလုံးပြီးမြောက်ပြီးနောက် စစ်ကောင်စီက မြို့ကိုအလုံးစုံထိန်းချုပ်လိုက်ပါက ဒေသခံများသည် လားရှိုးအဓိကလမ်းမကြီးကို အသုံးပြု၍မရတော့ဘဲ ကွင်းလမ်းကိုအသုံးပြုလာရနိုင်ကြောင်း သုံးသပ်မှုများလည်းရှိနေသည်။
လားရှိုးမြို့သိမ်းတိုက်ပွဲအတွင်း ပျက်စီးခဲ့သည့် နေအိမ်များအတွက်ဟုဆိုကာ ဧပြီ ၇ရက်တွင် MNDAA က အိမ်ထောင်စု တစ်စုလျှင် ကျပ်သိန်း ၅၀ ထောက်ပံ့ခဲ့သေးသည်။
ပြီးခဲ့သည့် ၂၀၂၄ခုနှစ်၊ ဩဂုတ် သုံးရက်တွင် ၁၀၂၇ စစ်ဆင်ရေး ဒုတိယလှိုင်းအဖြစ် MNDAA နှင့် တော်လှန်ရေးပူးပေါင်းတပ်များသည် စစ်ကောင်စီ၏ အရှေ့မြောက်တိုင်းစစ်ဌာနချုပ်တည်ရှိရာ လားရှိုးမြို့ကို သိမ်းပိုက်နိုင်ခဲ့ခြင်းလည်းဖြစ်သည်။
