By Mg Dagon / MPA

ထိုင်းနိုင်ငံ၊ ဘန်ကောက်မြို့ရှိ Rosewood ဟိုတယ်တွင် ယမန်နေ့ ဧပြီ ၁၇ ရက်က အာဆီယံအလှည့်ကျ ဥက္ကဌ မလေးရှားနိုင်ငံ ဝန်ကြီးချုပ် အန်ဝါ အီဘရာဟင်နှင့် စစ်ခေါင်းဆောင် မင်းအောင်လှိုင်တို့ တွေ့ဆုံခဲ့မှုကို မလေးရှားဝန်ကြီးချုပ်က မှတ်တမ်းဓာတ်ပုံများကို ၎င်း၏ လူမှုကွန်ရက်စာမျက်နှာများမှတစ်ဆင့် မျှဝေခဲ့ခြင်းမရှိကြောင်း သိရသည်။

သို့သော် အမျိုးသားညီညွတ်ရေးအစိုးရ(NUG) ပြည်ထောင်စုဝန်ကြီးချုပ် မန်းဝင်းခိုင်သန်း နှင့် မလေးရှားနိုင်ငံဝန်ကြီးချုပ် အန်ဝါ အီဘရာဟင်တို့ အွန်လိုင်းက တွေ့ဆုံခဲ့မှုကို မလေးရှားဝန်ကြီးချုပ်က ၎င်း၏ လူမှုကွန်ရက်စာမျက်နှာ၌ ဖြန့်ဝေခဲ့သည်။

ယင်းမှာ အာဏာသိမ်းစစ်ခေါင်းဆောင်ကို မလေးရှားနိုင်ငံက တရားဝင်အသိအမှတ်ပြုလိုခြင်းမရှိ၍ဖြစ်သည်ဟု နိုင်ငံရေးလေ့သုံးသပ်သူများနှင့် ပြည်သူအများက မှတ်ချက်ပေးသည်။

“ဒါက ရှင်းနေတာပါပဲ။ တွေ့တာက တာဝန်အရနဲ့ ငလျင်အကူအညီတွေ တကယ်ဒုက္ခတွေ့နေသူတွေဆီ ရောက်စေချင်တယ်ဆိုတဲ့ သူ့(မလေးရှားဝန်ကြီးချုပ်)ရဲ့ ရည်ရွယ်ချက်အတိုင်းတွေ့တယ်။ မှတ်တမ်းဓာတ်ပုံလေးတစ်ပုံတောင် မတင်တာကတော့ စကစခေါင်းဆောင်ကို နိုင်ငံရေးနည်းအရ အသိအမှတ်မပြုဘူးဆိုတာ သိသာစေပါတယ်” ဟု သတင်းများကိုလေ့လာစောင့်ဖတ်နေသူ ရန်ကုန်မြို့နေ အမျိုးသားတစ်ဦးက ပြောသည်။

အဆိုပါတွေ့ဆုံပွဲသည် ထိုင်းဝန်ကြီးချုပ်ဟောင်း သက်ဆင် ရှင်နာဝပ်ထရာ၏ စီစဉ်ပေးမှုဖြင့် သုံးဦးတွေ့ဆုံခဲ့ခြင်းဖြစ်သည်။

ထိုင်းကိုနှစ်ရက်တာလာရောက်ခဲ့သည့် မလေးရှားဝန်ကြီးချုပ်၏ မော်တော်ယာဉ်တွင် မလေးရှားနိုင်ငံတော်အလံတပ်ဆင်ထားသည်ကိုတွေ့ရသော်လည်း စစ်ခေါင်းဆောင် မင်းအောင်လှိုင်၏ မော်တော်ယာဉ်တွင် မြန်မာ့အလံမတွေ့ရခြင်းမှာလည်း စစ်ခေါင်းဆောင်ကို တရားဝင် အသိအမှတ်မပြုခြင်းဖြစ်နိုင်သည်ဟု အထက်ပါအမျိုးသားက ပြောသည်။

“ဒီနေရာမှာ ပုံမှန်အနေနဲ့ အနီးစပ်ဆုံးပြောရမယ်ဆိုရင် ပြီးခဲ့တဲ့ ဘင်းစ်တပ်အစည်းအဝေးကို စစ်ခေါင်းဆောင်လာခဲ့ချိန်တုန်းကနဲ့ အခြေအနေမတူတော့တာပါ။ ဘင်းစ်တပ်အစည်းအဝေးက စစ်ခေါင်းဆောင်ရဲ့ ကားမှာ မြန်မာ့အလံတပ်ဆင်ထားတာ တွေ့ရပါတယ်။ အခုမတွေ့ရတော့ဘူး” ဟု ၎င်းက ထောက်ပြပြောဆိုသည်။

ထို့အပြင် မလေးရှားဝန်ကြီးချုပ်သည် စစ်ခေါင်းဆောင်နှင့်တွေ့ဆုံခဲ့သည်ပုံရိပ်များကို ၎င်း၏ လူမှုကွန်ရက်များတွင် ဖော်ပြခဲ့ခြင်းမရှိဘဲ ကျန်ခေါင်းဆောင်များ၏ မှတ်တမ်းဓာတ်ပုံများကိုသာ ဝေဝေဆာဆာဖော်ပြခဲ့သည်။

“မလေးရှားဝန်ကြီးချုပ်က စစ်ခေါင်းဆောင်နဲ့ တွေ့ဆုံခဲ့တဲ့ မှတ်တမ်းဓာတ်ပုံတွေကို သူ့ရဲ့လူမှုကွန်ရက်တွေကနေ မမျှဝေခဲ့ဘူး။ ဒါက ဘန်ကောက်တွေ့ဆုံပွဲဟာ နိုင်ငံတော်အဆင့်၊ တရားဝင်တွေ့ဆုံခဲ့တာမျိုးမဟုတ်ဘူးလို့ သက်သေခံနေတာဖြစ်ပါတယ်” ဟု နိုင်ငံရေးလေ့လာသုံးသပ်သူတစ်ဦးက မှတ်ချက်ပေးသည်။

မလေးရှားလွှတ်တော်အမတ်တစ်ဦးဖြစ်သည့် တန်ဟောင်ပင်ကလည်း ၎င်းတို့ဝန်ကြီးချုပ်အနေဖြင့် စစ်ခေါင်းဆောင် မင်းအောင်လှိုင်ကို တွေ့ဆုံခဲ့ခြင်းသည် နိုင်ငံရေးအရ အသိအမှတ်ပြုလိုခြင်းကြောင့်မဟုတ်ဘဲ ငလျင်ဘေးကြောင့် ထိခိုက်ခံစားနေရသူများကို ကူညီနိုင်ရန်အတွက်သာဖြစ်သည်ဟု ယမန်နေ့ ဧပြီ ၁၇ ရက်နေ့တွင် ၎င်းက ထုတ်ပြန်ပြောကြားသည်။

“လူတွေရဲ့ အသက်တွေကို ကယ်ဆယ်ဖို့ လိုအပ်နေတဲ့အခြေအနေမှာ နိုင်ငံရေးအရ ဖြစ်သင့်/မဖြစ်သင့် ဆိုတာတွေနဲ့ တွေဝေမနေသင့်ဘူး” ဟု မလေးရှားအမတ်က ပြောသည်။

မစ္စတာ အန်ဝါ အီဘရာဟင်သည် မစ္စတာ သက်ဆင်နှင့်တွေ့ဆုံမှုမှတ်တမ်းများ၊ ထိုင်းဝန်ကြီးချုပ် ပေတောင်တန် ရှင်နာဝပ်ထရာနှင့် တွေ့ဆုံမှုမှတ်တမ်းဓာတ်ပုံများကို ၎င်း၏လူမှုကွန်ရက်များဖြစ်သည့် Facebook နှင့် X တို့တွင် ဝေဝေဆာဆာပြန်လည်မျှဝေခဲ့သည်ကိုတွေ့ရသည်။

ထို့အတူ စစ်ကောင်စီဘက်ကလည်း မလေးရှားဝန်ကြီးချုပ်နှင့်တွေ့ဆုံခဲ့မှုကို ၎င်းတို့ထိန်းချုပ်ထားသည့်မီဒီယာများမှတစ်ဆင့် သတင်းဖော်ပြခဲ့သော်လည်း မှတ်တမ်းဓာတ်ပုံနှင့် ဗီဒီယိုများကိုမူ ဖော်ပြခဲ့ခြင်းမရှိပေ။

သို့သော် မစ္စတာ အီဘရာဟင်သည် ယနေ့ ဧပြီ ၁၈ ရက်တွင် အွန်လိုင်းမှတစ်ဆင့် တွေ့ဆုံခဲ့သည့် အမျိုးသားညီညွတ်ရေးအစိုးရ(NUG)၏ ပြည်ထောင်စုဝန်ကြီးချုပ် မန်းဝင်းခိုင်သန်းနှင့် တွေ့ဆုံမှုကိုမူ ၎င်း၏ လူမှုကွန်ရက်စာမျက်နှာများပေါ်တွင် ပြန်လည်ဖော်ပြသွားခဲ့သည်။

“မလေးရှားနိုင်ငံမှာ လူချင်းလည်း တွေ့ဆုံဖို့ အမြဲတံခါးဖွင့်ထားတယ်” ဟု မလေးရှားဝန်ကြီးချုပ်က ပြောသွားသေးသည်။ သို့သော် မလေးဝန်ကြီးချုပ်၏ထုတ်ပြန်ချက်အတွင်း NUG ဝန်ကြီးချုပ်၏ ရာထူးကို ထည့်သွင်းမဖော်ပြထားဘဲ ဦးမန်းဝင်းခိုင်သန်းဟုသာ ပြောထားသည်ကို တွေ့ရသည်။

အလားတူ မလေးဝန်ကြီးချုပ်သည် ပြီးခဲ့သည့်ရက်ပိုင်းက ၎င်းတို့နိုင်ငံသို့ လာရောက်ခဲ့သည့် တရုတ်သမ္မတ ရှီကျင့်ဖျင်နှင့် ဓာတ်ပုံများကိုလည်း ၎င်း၏လူမှုကွန်ရက်စာမျက်နှာများမှတစ်ဆင့် ဝေဝေဆာဆာဖော်ပြခဲ့သည်။

မလေးရှား ဝန်ကြီးချုပ်သည် ထိုင်းနိုင်ငံဝန်ကြီးချုပ် ပေထောင်တန် ရှင်နာဝပ်ထရာက တရားဝင်ဖိတ်ကြားမှုဖြင့် ဘန်ကောက်မြို့သို့ နှစ်ရက်တာ တရားဝင်ခရီးစဉ်အဖြစ် ရောက်ရှိလာခဲ့ရာတွင် ပေထောင်တန်အပါအဝင် သက်ဆင်ရှင်နာဝပ်ထရာတို့ကို မစ္စတာ အီဘရာဟင်က သီးသန့်တွေ့ဆုံဆွေးနွေးများပြုလုပ်ခဲ့သည်။

မလေးရှားဝန်ကြီးချုပ်သည် စစ်ခေါင်းဆောင် မင်းအောင်လှိုင်နှင့်တွေ့ဆုံစဉ် ငလျင်ဘေးပြန်လည်ထူထောင်ရေး၊ လူသားချင်းစာနာမှုအကူအညီများအရေးနှင့် ငြိမ်းချမ်းရေးတို့ကို အဓိကထား ဆွေးနွေးခဲ့ပြီး NUG ဝန်ကြီးချုပ်နှင့်တွေ့ဆုံခဲ့ရာတွင်လည်း အာဆီယံအဖွဲ့ဝင်နိုင်ငံများနှင့် ဆက်ဆံရေးတိုးမြှင့်နိုင်ရေး အပါအဝင် မြန်မာပြည်သူများထံသို့ လူသားချင်းစာနာထောက်ထားမှုဆိုင်ရာအကူအညီများ ထိရောက်စွာ ပေးပို့ဖြန့်ဝေနိုင်ရေးတို့ကို ဆွေးနွေးခဲ့သည်ဟု သိရသည်။