By AFP
အနုမြူလက်နက်ပိုင်ဆိုင်ထားသည့် အိန္ဒိယနှင့်ပါကစ္စတန် တို့အကြား နယ်စပ်ထိန်းချုပ်မှုမျဉ်းတစ်လျှောက် လက်နက်ကြီး ပစ်ခတ်တိုက်ခိုက်မှုများကို ဗုဒ္ဓဟူးနေ့က ပြုလုပ်ခဲ့ကြကြောင်းသိရသည်။
အိန္ဒိယဘက်မှ “ Operation Sindoor” ဟုအမည်ပေးထားသော ဒုံးကျည်ပစ်ခတ်မှုများဖြင့် တိုက်ခိုက်ခဲ့ပြီး နှစ်ပေါင်း (၂၀) အတွင်း အပြင်းထန်ဆုံး တိုက်ခိုက်မှုများ ဖြစ်ပွားလျက်ရှိသည်။
လက်နက်ကြီးပစ်ခတ်မှုများအတွင်း အနည်းဆုံး လူ (၄၃) ဦး သေဆုံးခဲ့ပြီး အိန္ဒိယ၏ ဒုံးကျည်နှင့် နယ်စပ်တစ်လျှောက် ပစ်ခတ်မှုများကြောင့် ပြည်သူ (၃၁) ဦး သေဆုံးကြောင်း ပါကစ္စတန်ဘက်မှ
ထုတ်ပြန်ထားသည်။ အိန္ဒိယဘက်မှလည်း ပါကစ္စတန်၏ လက်နက်ကြီးပစ်ခတ်မှုများကြောင့် အနည်းဆုံး (၁၂) ဦး သေဆုံးခဲ့ကြောင်း ဖော်ပြထားသည်။
ဧပြီလအတွင်းက ကက်ရှမီးယားရှိ အိန္ဒိယ ထိန်းချုပ်ရာနယ်မြေ အတွင်း ဖြစ်ပွားခဲ့သော ပစ်ခတ်မှုကို ပါကစ္စတန် အစိုးက အားပေးခဲ့ကြောင်း အိန္ဒိယက စွပ်စွဲပြီး နှစ်ပတ်အကြာတွင် ယခုကဲ့သို့ တိုက်ခိုက်မှုများ စတင်လာခြင်းဖြစ်သည်။ ပါကစ္စတန်အစိုးရကမူ အိန္ဒိယ၏ စွပ်စွဲချက် ကို ငြင်းဆန်ထားသည်။
အိန္ဒိယနှင့် ပါကစ္စတန်တို့သည် (၁၉၄၇)ခုနှစ်၊ ဗြိတိသျှ ကိုလိုနီ အုပ်ချုပ်ရေး အပြီး သီးခြားလွတ်လပ် သော တောင်အာရှ အိမ်နီးချင်းနိုင်ငံများဖြစ်လာခဲ့ပြီး သမိုင်းတစ်လျှောက် နယ်မြေအငြင်းပွားမှု စစ်ပွဲများ များစွာ ဆင်နွှဲခဲ့ဖူးသည်။
အိန္ဒိယစစ်တပ်က “ တရားမျှတမှုကို ဆောင်ကြဥ်းပြီးဖြစ်သည်” ဟုဆိုကာ အကြမ်းဖက်စခန်း (၉) ခုကို ဖျက်ဆီးနိုင်ခဲ့ကြောင်း ထုတ်ပြန်ခဲ့ပြီး အိန္ဒိယအစိုးရကလည်း တိုက်ခိုက်မှုများသည် “ တိကျစေရန် ချိန်ညှိထားပြီးဖြစ်သည့်အပြင် လက်ဦးမှု ရယူလိုသည့် သဘောမရှိကြောင်း” ဖြည့်စွက်ပြောကြားထားသည်။
ပါကစ္စတန်ကာကွယ်ရေးဝန်ကြီးက ခါဝါဂျာ မိုဟာမက် အာဆစ် က အိန္ဒိယ ဝန်ကြီးချုပ် နာရင်ဒရာ မိုဒီ ကို “ ပြည်တွင်းထောက်ခံမှုရရှိစေရန် တိုက်ခိုက်မှုများ စတင်ခြင်းဖြစ်ကြောင်း” စွပ်စွဲခဲ့ပြီး မကြာမီ လက်တုံ့ပြန်မည်ဟု ပြောကြားခဲ့သည်။
ပါကစ္စတန်စစ်တပ်၏ ပြောရေးဆိုခွင့်ရှိသူ ဒုတိယ ဗိုလ်ချုပ်ကြီး အာမက် ရှာရစ်ဖ် ချောင်ဒရီ ကလည်း တစ်ညအတွင်း အိန္ဒိယဂျက် လေယာဉ် (၅) စီးကို နယ်စပ်ဖြတ်ကျော် ပစ်ချနိုင်ခဲ့ကြောင်း ပြောကြားခဲ့သည်။
ထို့ပြင် အမည်မဖော်လိုသူ အိန္ဒိယလုံခြုံရေးအရာရှိတစ်ဦး၏ ပြောကြားချက်အရ တိုက်လေယာဉ် (၃) စီး ပြည်တွင်းတွင် ပျက်ကျခဲ့ကြောင်း သိရသည်။
အိန္ဒိယ၏ အပြင်းထန်ဆုံး တိုက်ခိုက်မှုမှာ ဘဟာဝယ်လ်ပူး မြို့အနီး၊ အစ္စလာမ်ဘာသာရေးသင်တန်းကျောင်းတစ်ခုကို ပစ်မှတ်ထားခဲ့ပြီး ပါကစ္စတန်စစ်တပ်အဆိုအရ လူ (၁၃) ဦး သေဆုံးခဲ့သည်။
ထို့အပြင် လာဟိုးရ်မြို့မှ ကီလိုမီတာ (၃၀) အကွာ၊ မူရစ်ကေး ဒေသရှိ အစိုးရကျန်းမာရေးနှင့်ပညာရေးစင်တာတစ်ခုနှင့် ပါကစ္စတန်ထိန်းချုပ်ရာ ကက်ရှမီးယားနယ်မြေရှိ မူဇာဖာရာဘတ် မြို့ကြီး၏ ဗလီတစ်ခုလည်း ပျက်စီးခဲ့ပြီး ဗလီ အစောင့်တစ်ဦး သေဆုံးခဲ့သည်။
ပါကစ္စတန်စစ်တပ်အဆိုအရ ဗုဒ္ဓဟူးနေ့က ဖြစ်ပွားခဲ့သည့် တိုက်ခိုက်မှုများကြောင့် သေဆုံးသူများတွင် ကလေးငယ် (၄) ဦး ပါဝင်ကြောင်း သိရှိရသည်။
