By AFP
နိုင်ငံရေး မတည်ငြိမ်မှုများနှင့် စီးပွားရေး ထိတ်လန့်တုန်လှုပ်မှုများကြောင့် ထောက်ခံမှု ကျဆင်းလာခြင်းကို ဒုတိယအကြိမ် သမ္မတသက်တမ်း၏ ပထမရက်ပေါင်း ၁၀၀ အတွင်း အမေရိကန် သမ္မတ ဒေါ်နယ်ထရမ့် ကြုံတွေ့ခဲ့ရသော်လည်း ၎င်းကို ထောက်ခံသူများ၏ တစ်ခဲနက် ချီးမွမ်းမှုကို ပြန်လည်ရရှိရန် မျှော်လင့်ချက်ဖြင့် ရွေးကောက်ပွဲကာလအတွင်း အောင်မြင်မှုရရှိသည့် လူထုစည်းဝေးပွဲတစ်ခုသို့ ဧပြီ ၂၉ ရက်တွင် တက်ရောက်ခဲ့ကြောင်း AFP သတင်းတွင် ဖော်ပြထားသည်။
ဒုတိယအကြိမ် သမ္မတသက်တမ်း၏ အရေးပါသော မှတ်တိုင်တစ်ခု၏ အထိမ်းအမှတ်အဖြစ် ထရမ့်သည် နိုဝင်ဘာလ ရွေးကောက်ပွဲတွင် အနိုင်ရရန် အရေးပါသည့် နေရာတစ်ခုဖြစ်သည့် မစ်ရှီဂန် ပြည်နယ် ရှိ မဲဆွယ်စည်းရုံးရေးပြုလုပ်ခဲ့သည့် နယ်မြေတစ်ခုသို့ သွားရောက်ခဲ့သည်။
“ သမ္မတ သက်တမ်း ပထမအကြိမ်တုန်းက အလုပ် ၂ ခုရှိခဲ့ပါတယ်။ နိုင်ငံကို ဦးဆောင်ဖို့နဲ့ ရပ်တည် ရှင်သန်ဖို့ပါ။ အဲဒီတုန်းက ကောက်ကျစ်တဲ့သူတွေ တော်တော်ရှိခဲ့တယ်” ဟု ၎င်းက The Atlantic မဂ္ဂဇင်းနှင့် ပြုလုပ်သော အင်တာဗျူးတစ်ခုတွင် ပြောကြားခဲ့သည်။
ပထမသက်တမ်းအတွင်း အရည်အချင်းမရှိသော သို့မဟုတ် သစ္စာမဲ့သော လက်အောက်ငယ်သားများဟု ၎င်းက ယူဆထားသော အကြံပေးများနှင့် ဝန်ကြီးအဖွဲ့ဝင်များကို ထရမ့်က ရည်ညွှန်း ပြောဆိုခဲ့ခြင်းဖြစ်သည်။
” သမ္မတ သက်တမ်း ဒုတိယအကြိမ်မှာတော့ နိုင်ငံနဲ့ ကမ္ဘာကို ဦးဆောင်ဖို့ပါ။ ကျွန်တော် အရမ်းပျော်ပါတယ်” ဟု ထရမ့်ကပြောကြားခဲ့သည်။
ထရမ့်အား မဲပေးခဲ့သူ အများအပြားက ၎င်းအား ဆက်လက် ထောက်ခံလျက်ရှိသည်။
“ သူ ဘာလုပ်နေတယ်ဆိုတာကို သူသိပါတယ်” ဟု နီဗားဒါးပြည်နယ် ရီနိုမြို့ရှိ အသက် ၅၇ နှစ်အရွယ် ဝိုင်ဆိုင်ပိုင်ရှင် ကရင် မိုင်းနာက AFP သို့ ပြောကြားသည်။
သမ္မတရာထူးသို့ ဒုတိယအကြိမ်ပြန်လည်ရောက်ရှိလာပြီးနောက် ဒေါ်နယ်ထရမ့်သည် ဇန်နဝါရီ ၂၀ ရက်မှစ၍ အခွန်ကောက်ခံမှုများ၊ နိုင်ငံခြားရေးမူဝါဒနှင့် နိုင်ငံရေးလက်စားချေမှုများကို လွတ်လပ်စွာ လုပ်ဆောင်ခွင့်ပေးခဲ့သည်။
လူဝင်မှုကြီးကြပ်ရေး၊ သဘာဝပတ်ဝန်းကျင်ဆိုင်ရာ မူဝါဒ၊ ကုန်သွယ်ရေးနှင့် ဖက်ဒရယ်အဖွဲ့အစည်းများကို ပစ်မှတ်ထားသည့် အုပ်ချုပ်ရေးအမိန့် ၁၄၀ ကျော်ကို လက်မှတ်ရေးထိုးခဲ့သော်လည်း ယင်းအမိန့်များစွာကို တရားရုံးများက ပြန်လည်တားမြစ်ခဲ့သည်။
ဝေဖန်သူများက ထရမ့်ကို ဒီမိုကရေစီစံနှုန်းများကို ချိုးဖောက်နေသည်ဟု ဆိုကြသော်လည်း ထောက်ခံသူများက ၎င်း၏ ရဲရင့်မှုကို ချီးကျူးနေကြသည်။
Washington Post နှင့် ABC News သတင်းဌာနများက ပြုလုပ်သည့် စစ်တမ်းကောက်ယူမှုအား ဧပြီ ၂၇ ရက်က ထုတ်ပြန်ခဲ့ရာတွင် နိုင်ငံအား ထရမ့်၏ ဦးဆောင်နေမှုအပေါ် ထောက်ခံမှုနှုန်းသည် ၃၉ ရာခိုင်နှုန်းရှိပြီး ၆၄ ရာခိုင်နှုန်းက ၎င်းသည် အာဏာကို အလွန်အကျွံ အသုံးပြုနေသည် သတ်မှတ်ထားကြပြီး ထောက်ခံမှု သိသိသာသာ ကျဆင်းခဲ့သည်။
ယူကရိန်းစစ်ပွဲကို တစ်ရက်အတွင်း အဆုံးသတ်မည်ဟူသော ရွေးကောက်ပွဲ ကတိကဝတ်များ ရှိခဲ့သော်လည်း ထရမ့်က အချို့ကိစ္စများကို နောက်ပြောင်သည့်သဘောဖြင့်သာ ပြောခဲ့ကြောင်း ဝန်ခံခဲ့သည်။
