ယူကရိန်းစစ်ပွဲတွင် ရုရှားဘက်မှ တိုက်ခိုက်ရန် ခေါင်းဆောင် ကင်ဂျုံအွန်၏ အမိန့်ဖြင့် တပ်ဖွဲ့ဝင်များ စေလွှတ်ခဲ့ကြောင်းနှင့် ယူကရိန်းသိမ်းပိုက်ထားသော ရုရှားပိုင်နက်ကို ပြန်လည်ထိန်းချုပ်နိုင်ရန် ကူညီခဲ့ကြောင်း မြောက်ကိုရီးယားက ဧပြီ ၂၈ ရက်တွင် ပထမဆုံးအကြိမ် အတည်ပြုလိုက်သည်။

မြောက်ကိုရီးယားက ထောင်နှင့်ချီသော တပ်ဖွဲ့ဝင်များအပြင် ကြီးမားသော အမြောက်ကျည်များနှင့် ဒုံးကျည်များကို ပေးပို့မှုကြောင့် အရေးပါသော စစ်မြေပြင်ဖြစ်သည့် အနောက်ပိုင်း ကာ့ခ်စ်ခ်ဒေသတွင် ရုရှားကို အသာစီးရစေခဲ့ပြီး စီးပွားရေးနှင့် နိုင်ငံရေးအရ အထီးကျန်နေသော အဆိုပါနှစ်နိုင်ငံကို ပိုမိုနီးကပ်စေခဲ့သည်။

အောင်မြင်သော တိုက်ပွဲရလဒ်သည် မြောက်ကိုရီးယားနှင့် ရုရှားတို့၏ ခိုင်မာသော ချစ်ကြည်ရင်းနှီးမှု၏ အမြင့်ဆုံးသော မဟာဗျူဟာမြောက် အဆင့်ကို ပြသခဲ့သည်ဟု မြောက်ကိုရီးယားနိုင်ငံပိုင်သတင်းဌာန KCNA က အာဏာရပါတီ၏ ပြောကြားချက်ကို ကိုးကားဖော်ပြခဲ့သည်။

ယူကရိန်းတပ်ဖွဲ့များသည် ၎င်းတို့သိမ်းပိုက်ထားသော နောက်ဆုံးရုရှားရွာမှ ထွက်ခွာသွားခဲ့သည်ဟု ရုရှားတို့က ပြောကြားခဲ့သော်လည်း ယူကရိကန်းအစိုးရက ယင်းပြောဆိုချက်ကို ငြင်းဆိုခဲ့ကာ ၎င်းတို့၏တပ်ဖွဲ့များသည် ရုရှားပိုင်နက်အတွင်း ဆက်လက်လှုပ်ရှားနေဆဲဖြစ်ကြောင်း ထုတ်ပြန်ထားသည်။

ရုရှားသမ္မတ ဗလာဒီမာပူတင်က မြောက်ကိုရီးယားနှင့် ကင်ဂျုံအွန်အား ကျေးဇူးတင်ကြောင်း ကိုယ်တိုင် ပြောကြားခဲ့သည်။

“ ရုရှားအတွက် ၊ ကျွန်တော်တို့ ဘုံလွတ်လပ်မှုအတွက် လက်နက်ကိုင် ညီအစ်ကိုများနှင့် တန်းတူ ရုရှားတွင် အသက်ပေးခဲ့သော ကိုရီးယားသူရဲကောင်းများကို အမြဲတမ်း ဂုဏ်ပြုပါမည်” ဟု ပူတင်က ခရင်မလင်နန်းတော်မှထုတ်ပြန်သော ကြေညာချက်တွင် ပြောကြားခဲ့သည်။

ကင်ဂျုံအွန်သည် ပြီးခဲ့သည့်နှစ်က ပူတင်နှင့် လက်မှတ်ရေးထိုးခဲ့သော ဘက်စုံမဟာဗျူဟာမြောက် မိတ်ဖက်ဆက်ဆံရေးစာချုပ်အရ မြောက်ကိုရီးယား အလုပ်သမားပါတီ၏ ဗဟိုစစ်ကော်မရှင်က တပ်ဖွဲ့ဝင်များ စေလွှတ်ရန် ဆုံးဖြတ်ခဲ့သည်ဟု ဆိုသည်။

“ တရားမျှတမှုအတွက် တိုက်ပွဲဝင်ခဲ့သူအားလုံးသည် သူရဲကောင်းများနှင့် မိခင်မြေ၏ ဂုဏ်ကို ကိုယ်စားပြုသူများဖြစ်သည်” ဟု ကင်၏ ပြောကြားချက်ကို KCNA က ကိုးကားဖော်ပြခဲ့သည်။

အမေရိကန်နိုင်ငံခြားရေးဌာနက မြောက်ကိုရီးယား၏ ရုရှားသို့ စေလွှတ်မှုကို ရပ်တန့်ရန်နှင့် ရုရှားက ပြန်လည်ပေးအပ်သော မည်သည့်အကူအညီကိုမဆို ရပ်တန့်ရန် တောင်းဆိုခဲ့ပြီး ရုရှားသည် မြောက်ကိုရီးယားစစ်သားများကို လေ့ကျင့်ပေးခြင်းသည် ကုလသမဂ္ဂ လုံခြုံရေးကောင်စီ၏ ဆုံးဖြတ်ချက်များကို ချိုးဖောက်ခဲ့သည်ဟု ထပ်လောင်းပြောကြားခဲ့သည်။

ရုရှား-ယူကရိန်းစစ်ပွဲကို ဆက်လက်ဖြစ်ပွားစေခဲ့သော နိုင်ငံများတွင် တာဝန်ရှိသည် ဟု အမေရိကန် နိုင်ငံခြားရေးဌာန၏ ပြောရေးဆိုခွင့်ရှိသူတစ်ဦးက ရိုက်တာသတင်းဌာနသို့ ပြောကြားခဲ့သည်။

တပ်ဖွဲ့ဝင်များ စေလွှတ်ကြောင်း အတည်ပြုချက်သည် “ ပြစ်မှုဆိုင်ရာ လုပ်ရပ်ကို ဝန်ခံခြင်း” ဖြစ်ကြောင်းနှင့် ၎င်း၏အုပ်ချုပ်မှုကို ထောက်ခံရန် ရည်ရွယ်ချက်ဖြင့် စစ်မြေပြင်သို့ စေလွှတ်သည့် “ လူမဆန်ပြီး အကျင့်ပျက်ခြစားသော” ဆုံးဖြတ်ချက်အတွက် တောင်ကိုရီးယားကလည်း မြောက်ကိုရီးယားကို ရှုတ်ချခဲ့သည်။