The Nation
ထိုင်းနိုင်ငံတွင် မော်တော်ယာဉ်ထုတ်လုပ်သည့် အကြီးစားစက်ရုံများကို တည်ထောင်ထားသော နာမည်ကျော် တရုတ်ကားထုတ်လုပ်ရေး ကုမ္ပဏီ ၃ ခုဖြစ်သည့် MG၊ BYD နှင့် Great Wall Motor (GWM) တို့က အာဆီယံဈေးကွက်ကို အဓိကရည်ရွယ်ပြီး Hybrid နှင့် plug-in Hybrid မော်ဒယ်လ်များ၏ ထုတ်လုပ်မှုကို တိုးချဲ့ရန် စီစဉ်နေကြသည်။
SAIC Motor–CP မှ လုပ်ကိုင်သော MG ကုမ္ပဏီ၏ ချွန်ဘူရီခရိုင်ရှိ စက်ရုံတွင် တစ်နှစ်လျှင် အစီးရေ ၁၀၀,၀၀၀ အထိ အများဆုံးထုတ်လုပ်နိုင်သည့် စက်ရုံတစ်ရုံရှိသည်။
ထိုင်းပင်လယ်ကွေ့ အရှေ့ဘက် ကမ်းရိုးတန်းရှိ ရာယွန်းမြို့မှ GWM ကားကုမ္ပဏီ၏ စက်ရုံသည် တစ်နှစ်လျှင် မော်တော်ယာဉ်အစီးရေ ၈၀,၀၀၀ အထိ ထုတ်လုပ်နိုင်သလို BYD ကလည်း တစ်နှစ်လျှင် အစီးရေ ၁၅၀,၀၀၀ အထိ တိုးမြှင့်ရန် စီစဉ်ထားသည်။ သို့သော် မည်သည့် တရုတ်ကားကုမ္ပဏီကမှ အပြည့်အဝထုတ်လုပ်နိုင်စွမ်း မရှိသေးပေ။
BYD က ထိုင်းနိုင်ငံရှိ ၎င်းတို့၏ ထုတ်လုပ်မှုလုပ်ငန်းများကို တိုးချဲ့နေကြောင်း အတည်ပြုထားသည်။
ယခုနှစ်တွင် BYD ကုမ္ပဏီ၏ ပထမဆုံးမော်ဒယ်လ်ဖြစ်သော BYD SEALION 6 DM-i ကို စတင်တင်ပို့မည်ဖြစ်သည်။ စက်ရုံ၏ ၂၀၂၄ ခုနှစ် တတိယသုံးလပတ် စတင်လည်ပတ်ချိန်မှစ၍ လာမည့် နှစ်နှစ်အတွင်း အပြည့်အဝထုတ်လုပ်နိုင်စွမ်း (တစ်နှစ်လျှင် အစီးရေ ၁၅၀,၀၀၀) အထိ ရောက်ရှိရန် ရည်မှန်းထားသည်။
ထရမ့်အစိုးရက တရုတ်မော်တော်ကားများအပေါ် အခွန်နှုန်းထားများ တိုးမြှင့်ခြင်းကြောင့် တရုတ်မော်တော်ကားထုတ်လုပ်သည့် ကုမ္ပဏီများက မဟာဗျူဟာများကို သိသိသာသာ ပြောင်းလဲစေခဲ့ကာ အာဆီယံဒေသတွင် သက်ရောက်မှုများ ရှိလာခဲ့သည်။
တရုတ်ကုမ္ပဏီများက မြင့်မားသော အခွန်များကို ရှောင်ရှားရန်နှင့် ဦးစားပေးကုန်သွယ်မှု သဘောတူညီချက်များကို ရယူရန်အတွက် အာဆီယံနိုင်ငံများသို့ ထုတ်လုပ်မှုကို ပြောင်းရွှေ့လာနိုင်သည်။
BYD နှင့် SAIC တို့သည် အာဆီယံ၏ လွတ်လပ်သော ကုန်သွယ်မှုသဘောတူညီချက်များ (ဥပမာ- အာဆီယံ-တရုတ် လွတ်လပ်သော ကုန်သွယ်မှုဇုန်နှင့် RCEP ကဲ့သို့) ကို အသုံးချ၍ ထိုင်းနှင့် အင်ဒိုနီးရှားနိုင်ငံတို့တွင် ထုတ်လုပ်မှုစက်ရုံများကို ယခုအခါ တည်ထောင်ထားပြီးလည်း ဖြစ်သည်။
