The Guardian
တရုတ်သွင်းကုန်များအပေါ် အခွန်တိုးမြှင့်ထားမှုကို တဖြည်းဖြည်း ပြန်လည်လျော့ချသွားရန်ရှိသော်လည်း အကောက်ခွန်ကင်းလွတ်ခွင့်အထိ လျော့ချမည်မဟုတ်ကြောင်း အမေရိကန်သမ္မတဒေါနယ်ထရမ့်က အိမ်ဖြူတော် သတင်းစာရှင်းလင်းရေးပွဲတစ်ခုတွင် ပြောကြားလိုက်သည်။
ထရမ့်၏ အဆိုပါမှတ်ချက်သည် အမေရိကန်ဘဏ္ဍာရေးဝန်ကြီး စေကာ့ ဘက်ဆန့် အင်္ဂါနေ့က ပြောကြားခဲ့သည့် မြင့်မားသော အကောက်ခွန်နှုန်းထားများသည် ရေရှည်တည်တံ့နိုင်ခြင်းမရှိကြောင်းနှင့် ကမ္ဘာ့အကြီးဆုံး စီးပွားရေးနှစ်ခုအကြား ကုန်သွယ်ရေးစစ်ပွဲ “ အရှိန်လျှော့ခြင်း” ဖြစ်လာမည်ဟု မျှော်လင့်ထားကြောင်း ပြောကြားချက်ကို တုံ့ပြန်လိုက်ခြင်းဖြစ်သည်။
ထရမ့်သည် တရုတ်သွင်းကုန်များအပေါ် အခွန် ၁၄၅ ရာခိုင်နှုန်းတိုးမြှင့်ကောက်ခံခဲ့သဖြင့် တရုတ်မှ အမေရိကန်သွင်းကုန်များကို အခွန် ၁၂၅ ရာခိုင်နှုန်း ကောက်ခံခြင်းဖြင့်တုံ့ပြန်ထားခြင်းလည်းဖြစ်သည်။ ထရမ့်သည် အခြားသော ဒါဇင်နှင့်ချီသော နိုင်ငံများ၏သွင်းကုန်များအပေါ်ကိုလဲ အခွန်တိုးမြှင့်ကောက်ခံခဲ့သဖြင့် အမေရိကန် စတော့စျေးကွက်ကို လှုပ်ခတ်စေခဲ့ပြီး အမေရိကန်၏ ကြွေးမြီများတွင် အတိုးနှုန်းမြင့်တက်မှုများ ဖြစ်ပေါ်ခဲ့သည်။ ရင်းနှီးမြုပ်နှံသူများအနေနှင့်လဲ စီးပွားရေး တိုးတက်နှုန်း ကျလာနိုင်ခြင်းနှင့် ငွေကြေးဖေါင်းပွလာနိုင်ခြင်းတို့အပေါ် စိုးရိမ်နေကြသည်။
AP သတင်းဌာနက ရရှိထားသော အစည်းအဝေးမှတ်တမ်းအရ “တရုတ်နဲ့ညှိနှိုင်းရေးက အတော်ခက်ခဲမယ်လို့ ကျွန်တော်ထင်တယ်။နှစ်ဖက်စလုံးက လက်ရှိအခြေအနေအတိုင်း အကြာကြီးဆက်ဖြစ်နေမှာမဟုတ်ဘူးလို့ ယူဆကြတယ်” ဟု ဘက်ဆန့်က ပြောကြားထားသည်။
Bloomberg သတင်းဌာနက ဘက်ဆန့်၏ ထုတ်ဖော်ပြောကြားချက်များကို သတင်းဖော်ပြပြီးနောက် S&P 500 စတော့ဈေးကွက်ညွှန်းကိန်း ၂.၅ ရာခိုင်နှုန်း တက်လာခဲ့သည်။
သို့သော် သမ္မတထရမ့်သည် တရားဝင်အစည်းအဝေးများတွင် ဘက်ဆန့်ပြောခဲ့သည့် “ တရုတ်အပေါ် အခွန်တိုးမြှင့်မှုအခြေအနေ မတည်တံ့နိုင်” ဆိုသည့် အဆိုကို အတည်မပြုခဲ့ပဲ “ တရုတ်နှင့်ပတ်သတ်သောကိစ္စများကောင်းမွန်စွာဆက်လက်လုပ်ကိုင်နေသည်” ဟုပြောကြားခဲ့သည်။
တရုတ်နိုင်ငံမှ အခြားနိုင်ငံများအား တရုတ်၏ အကျိုးစီးပွားကို ထိခိုက်စေနိုင်သည့် အမေရိကန်နှင့် ကုန်သွယ်ရေးသဘောတူညီချက်များ ချုပ်ဆိုခြင်းမှ ရှောင်ကြဉ်ရန် တနင်္လာနေ့တွင် သတိပေးခဲ့သည်။
အိမ်ဖြူတော် ပြောရေးဆိုခွင့်ရှိသူ ကယ်ရိုလင်း လစ်ဗစ်ကမူ ထရမ့်အစိုးရအနေနှင့် ကုန်သွယ်ရေးသဘောတူညီချက်များအတွက် အခြားနိုင်ငံများထံမှ အဆိုပြုလွှာ ၁၈ ခု လက်ခဲရရှိထားကြောင်း ပြောကြားခဲ့သည်။ ၎င်းက “ ပါဝင်သူအားလုံးမှ ကုန်သွယ်ရေးသဘောတူညီချက်ကို ဖြစ်မြောက်စေလိုကြသည်” ဟု ဖြည့်စွက်ပြောကြားခဲ့သည်။
