ပုပ်ရဟန်းမင်းကြီး ဖရန်စစ်သည် အသက် ၈၈ နှစ်တွင် ကွယ်လွန်သွားကြောင်း ဗာတီကန်အုပ်ချုပ်ရေးအဖွဲ့မှ အကြီးတန်းအရာရှိတစ်ဦးက ယနေ့ ကြေညာလိုက်သည်။
ကာဒီနယ် ကယ်ဗင် ဖာရယ်လ်က “ ယနေ့ နံနက် ၇ နာရီ ၃၅ မိနစ် (ဒေသစံတော်ချိန်) တွင် ရောမမြို့၏ ဂိုဏ်းချုပ် ပုပ်ရဟန်းမင်း ဖရန်စစ် ကွယ်လွန်သွားပါပြီ” ဟု ပြောကြားခဲ့သည်။
” ဘုရားသခင်နှင့် သူ၏ ကျောင်းတော်၏ အမှုတော်ကို ဆောင်ရွက်ရန်အတွက် သူ၏ ဘဝတစ်သက်တာလုံးကို အပ်နှံခဲ့သည်” “ အထူးသဖြင့် ဆင်းရဲနွမ်းပါးဆုံးနှင့် အစွန်းရောက်ခံရဆုံးသူများအတွက် သစ္စာရှိမှု၊ ရဲရင့်မှုနှင့် တစ်ကမ္ဘာလုံးဆိုင်ရာ ချစ်ခြင်းမေတ္တာတို့ဖြင့် ဧဝံဂေလိတရား၏ တန်ဖိုးများကို နေထိုင်ရန် သူသည် ကျွန်ုပ်တို့ကို သွန်သင်ပြသခဲ့ပါသည်။” “ သခင်ယေရှု၏ စစ်မှန်သော တပည့်တစ်ဦးအဖြစ် သူ၏ စံနမူနာအတွက် အတိုင်းအဆမဲ့ ကျေးဇူးတင်စွာဖြင့် ပုပ်ရဟန်းမင်း ဖရန်စစ်၏ ဝိညာဉ်ကို အနန္တ၊ ကရုဏာတော်နှင့် ပြည့်စုံသော ဘုရားသခင်၏ ချစ်ခြင်းမေတ္တာတော်သို့ အပ်နှံအပ်ပါသည်” ဟု ထုတ်ပြန်ချက်တွင် ဖော်ပြထားသည်။
ပုပ်ရဟန်းမင်းကြီး ဖရန်စစ်သည် Easter Sunday က န်းမာရေးပြန်လည်ကောင်းမွန်လာခြင်းကြောင့် စိန့်ပီတာရင်ပြင်ရှိ ထောင်ပေါင်းများစွာသော လူများကို ကောင်းချီးပေးခဲ့ကာ ရင်ပြင်ကို ကားဖြင့် အံ့အားသင့်ဖွယ်ရာ လှည့်လည်ချိန်တွင် ပျော်ရွှင်စွာအားပေးသံများနှင့် လက်ခုပ်သံများဖြင့် ဆူညံသွားခဲ့သည်။
ဖရန်စစ်သည် ရင်ပြင်၌ အီစတာပွဲတော်ကို ကိုယ်တိုင်ကျင်းပခြင်းမပြုဘဲ စိန့်ပီတာဘုရားရှိခိုးကျောင်း၏ အငြိမ်းစား ဂိုဏ်းအုပ်ကြီး ကာဒီနယ် အန်ဂျလို ကိုမာစထရီကို တာဝန်ပေးအပ်ခဲ့သည်။
သို့သော် ပွဲတော်ပြီးဆုံးပြီးနောက် ဖရန်စစ်သည် ဘုရားရှိခိုးကျောင်းဝင်ပေါက်ရှိ လော်ဂျီယာ လသာဆောင်ပေါ်တွင် မိနစ် ၂၀ ကျော်ကြာ ပေါ်ထွက်လာပြီး လက်တင်ဘာသာဖြင့် တမန်တော်များ၏ ကောင်းချီးကို ပေးခဲ့သည်။
ဘုရားရှိခိုးကျောင်းသို့ သွားရာလမ်းတွင် ဖရန်စစ်သည် ရောမမြို့တွင် မိသားစုနှင့်အတူ အီစတာပွဲတော်တွင် ပါဝင်ဆင်နွှဲနေသည့် အမေရိကန် ဒုတိယသမ္မတ ဂျေဒီ ဗန့်စ်နှင့်လည်း ခဏတာတွေ့ဆုံခဲ့သည်။
ဖရန်စစ်သည် ရက်ပေါင်း ၃၈ ရက်ကြာ ဆေးရုံတက်ပြီးနောက် မတ်လ ၂၃ ရက်နေ့က ဗာတီကန်သို့ ပြန်လည်ရောက်ရှိပြီး အများပြည်သူရှေ့တွင် အနည်းငယ်သာ တွေ့မြင်ခံရသည်။
အီစတာမတိုင်မီ သောကြာနေ့နှင့် စနေနေ့တို့၌ ဝတ်ပြုဆုတောင်းခြင်းများ မလုပ်ဆောင်နိုင်ခဲ့ပေ။
အသက် ၈၈ နှစ်အရွယ် ပုပ်ရဟန်းမင်းသည် ဖေဖော်ဝါရီ ၁၄ ရက်နေ့တွင် အချိန်ကြာမြင့်စွာ လည်ချောင်းနာခြင်းကြောင့် အသက်ရှူရခက်ခဲပြီး လျင်မြန်စွာ အဆုတ်ရောင်ရောဂါ နှစ်ခုအထိ ဖြစ်ပွားကာ ဗိုင်းရပ်စ်၊ဘက်တီးရီးယားနှင့် မှို များကြောင့် အသက်ရှူလမ်းကြောင်းဆိုင်ရာ ကူးစက်ရောဂါခံစားရကြောင်း စစ်ဆေးတွေ့ရှိကာ ဆေးရုံသို့ ပို့ဆောင်ခဲ့ရသည်။
