By Ra Wai / MPA
ငလျင်လှုပ်ခတ်ပြီးနောက် အိမ်ဆောက်ပစ္စည်းဈေးနှုန်းများ ထောင်တက်လာခြင်းကြောင့် ရန်ကုန်မြို့ ရှိ အသေးစားနှင့်အလတ်စား ဆောက်လုပ်ရေးလုပ်ငန်းအများစု ရပ်နားထားကြောင်း သိရသည်။
ငလျင်လှုပ်ပြီးနောက်ပိုင်း ဘိလပ်မြေဈေးတင်ရောင်းသည်ဟုဆိုကာ ဆောက်လုပ်ရေးပစ္စည်း အ ရောင်းဆိုင်၆၂ဆိုင်ကို ဖမ်းဆီး လိုက်ကြောင်း စစ်ကောင်စီက ဧပြီ၂၄ရက်တွင် ထုတ်ပြန်ပြီးနောက် ရန် ကုန်ဘိလပ်မြေဈေးကွက်မှာ အရောင်းရပ်နေသလို အခြားသောအိမ်ဆောက်ပစ္စည်းများမှာလည်း ဈေးတက်နေခြင်းကြောင့် လုပ်ငန်းများ ရပ်နေခြင်းဖြစ်ကြောင်း ရန်ကုန်အခြေစိုက် အသေးစား ဆောက်လုပ်ရေးလုပ်ငန်းရှင်တစ်ဦးထံမှ သိရသည်။
“သင်္ကြန်ပြီးရင် ဆောက်မယ်ဆိုပြီး ကျတော်နဲ့ ချိတ်ထားတဲ့ အိမ်ရှင်နှစ်ဦးက ဈေးတွေတက်နေလို့ မဆောက်နိုင်သေးဘူးလို့ ပြန်ပြောတယ်။နောက်တစ်ဦးကျတော့ သူကဆောက်ချင်ပေမဲ့ ကျတော်က ဈေးတက်နေတာကို မမှန်းနိုင်လို့ ရှုံးမှာစိုးလို့ မဆောက်ရဲဘူး။ကျတော်တို့အလုပ်က မဆောက်ခင်က တည်းက အကုန်တွက်ချက်ပြီး ဘယ်လောက်ကျမယ်ဆိုတာ ပြောပြီး စာချုပ်ချုပ်ပြီးဆောက်ရတာ။ ဆောက်နေရင်းနဲ့ ဈေးတွေထိုးတက်သွားလို့ စာချုပ်ထဲကထက် ပိုပေးပါ သွားပြောလို့မရဘူး။ဈေး တက်လို့ အရှုံးပေါ်ရင် ကန်ထရိုက်က ခံပဲ”ဟု ၎င်းက MPAသို့ပြောသည်။
ရန်ကုန် ဆောက်လုပ်ရေးပစ္စည်းဆိုင်များတွင် ဘိလပ်မြေ အရောင်းရပ်ထားသော်လည်း တစ်အိတ် လျှင် ၃၅,၀၀၀နှင့် ၄၀,၀၀၀ ကြား ဈေးခေါ်နေကြောင်း သံဈေးမှာ ငါးရာခိုင်နှုန်းမှ ၁၀ရာခိုင်နှုန်းအထိ ဈေးတက်သွားသ လို အုတ်ဈေးလည်း တက်နေကြောင်း မြန်မာတွင် အသုံးအများဆုံး PMG အိမ် သုတ်ဈေးမှာ ဈေးကွက်ထဲ ပစ္စည်းပြတ်နေပြီး တရုတ်နှင့်ထိုင်းမှ ဝင်လာသည့် အရည်အသွေးညံ့သော အိမ်သုတ်ဆေးများသာ ရှိကြောင်း သိရသည်။
“နောက်တစ်ချက်က နေပြည်တော်မှာ အပျက်အစီးရှင်းတဲ့အလုပ် တော်တော်ခေါ်နေလို့ ရန်ကုန် လုပ် ငန်းရှင်တွေ နေပြည်တော်ဘက် ခြေဦးလှည့်နေကြတယ်။အပျက်ရှင်းပြီးရင် ပြန်ဆောက်မှာဆိုတော့ ဆောက်လုပ်ရေးဈေးကွက်က နေပြည်တော်ဘက် ရွေ့နေတယ်”ဟု ၎င်းက ဆက်လက်ပြောသည်။
နေပြည်တော် အပျက်အစီးရှင်းသည့်အလုပ်ကို စစ်ကောင်စီနှင့် မပတ်သက်လိုသော လုပ်ငန်းရှင်များ က မလုပ်ကြကြောင်း သိရသည်။
“ကျတော်ကတော့ စစ်ကောင်စီနဲ့ မပတ်သက်ချင်လို့ အလုပ်လာပေးပေမဲ့ မလုပ်ဘူး”ဟု ၎င်းက ဆိုသည်။
စစ်ကောင်စီက ဆောက်လုပ်ရေးပစ္စည်းဆိုင်များကို ဘိလပ်မြေတစ်အိတ်လျှင် ကျပ်၁၇,၀၀၀ဖြင့် ရောင်းခိုင်းနေပြီး သတ်မှတ်ဈေးဖြင့် မရောင်းပါက ဖမ်းဆီးနေဆဲဖြစ်သဖြင့် ဆိုင်များက ၎င်းတို့ စိတ်ချရသည့် ဖောက် သည်များကိုသာ ပြင်ပပေါက်ဈေးအတိုင်း လက်သိပ်ထိုးရောင်းချနေကြောင်း သိရသည်။
