By Ra Wai / MPA
အဖမ်းအဆီးများကြောင့် ရန်ကုန်မြို့ရှိ ဆောက်လုပ်ရေးပစ္စည်းဆိုင်များတွင် ဘိလပ်မြေအရောင်း လုံးဝရပ်ထားကြောင်း သိရသည်။
ဘိလပ်မြေဈေးတင်ရောင်းသည်ဟုဆိုကာ ဆောက်လုပ်ရေးပစ္စည်းအရောင်းဆိုင် ၆၂ ဆိုင်ကို ဖမ်းဆီးလိုက်ကြောင်း စစ်ကောင်စီက ဧပြီ ၂၄ ရက်တွင် ထုတ်ပြန်ပြီးနောက် ယနေ့ (မေ သုံးရက်) ထိတိုင် ရန်ကုန်ဈေးကွက်၌ အရောင်းရပ်ထားကြကြောင်း ရန်ကုန်မြို့ရှိ အသေးစားဆောက်လုပ်ရေးလုပ်ငန်းရှင် တစ်ဦးထံမှ သိရသည်။
“အမှန်အကန်ကိုဖမ်းနေတယ်။ ဖမ်းပြီးရင်လည်း အမှန်အကန်ကို ငွေညှစ်တယ်။ အဲဒါကြောင့် ဆိုင်တွေက သူတို့ရဲ့ အင်မတန့်၊ အင်မတန် ရင်းနှီးတဲ့ တကယ်စိတ်ချရတဲ့ ဖောက်သည်တွေကိုပဲ လက်သိပ်ထိုး ရောင်းပေးတယ်။ တော်ရုံရင်းတဲ့ဖောက်သည်ဆိုရင်တောင် ဘိလပ်မြေမေးရင် မရှိဘူးပဲ ပြောကြ တယ်” ဟု ၎င်းက MPA သို့ပြောသည်။
စစ်ကောင်စီက ဘိလပ်မြေတစ်အိတ်ကို ကျပ် ၁၇,၀၀၀ ဖြင့် ရောင်းခိုင်းပြီး လက်ရှိဈေးကွက်ပေါက်ဈေး မှာ ကျပ် ၃၅,၀၀၀ ကျော်ရှိကြောင်း သိရသည်။
“ရန်ကုန်မှာ အသုံးများတဲ့ အယ်ဖာတံဆိပ်မရှိတော့ဘူး။ ကြံ့ နဲ့ Max ရှိတယ်။ Crown နည်းနည်းရှိတယ်။ ကျောက်ဆည်မှာ အယ်ဖာစက်ရုံက ငလျင်ထိတယ်လို့ သိရတယ်”ဟု ၎င်းက ဆက်လက်ပြောသည်။
ငလျင်လှုပ်သည့် မတ်လ ၂၈ ရက်တွင် အယ်ဖာဘိလပ်မြေတစ်အိတ်လျှင် ကျပ် ၁၈,၀၀၀ သာရှိကြောင်း သိရသည်။
