By Ko Paing / MPA
ပဲခူးတိုင်း၊ သာယာဝတီခရိုင်၊ မိုးညိုမြို့နယ်အတွင်း စိုက်ပျိုးထားသည့် ဆေးရွက်ကြီးများ ခူးဆွတ်ချိန်တွင် မိုးရွာသွန်းသဖြင့် အရည်အသွေးကျဆင်းကာ ဈေးနှုန်းပါကျသွားကြောင်း သိရသည်။
မတ်လကုန်ပိုင်းမှစတင်ကာ နေ့စဥ်ဆိုသလို မိုးအုံ့ကာ မိုးအနည်းငယ်ရွာသွန်းသဖြင့် ခူးဆွတ်ပြီး ဆေးရွက်ကြီးအချို့ နေလှမ်းရန်ခက်ခဲသလို ခြောက်သွေ့မှုနည်းပါးခြင်းကြောင့် ယခင် ပိဿာ ၁၀၀ ကို ကျပ် ၇၅ သိန်းရရှိရာမှ လက်ရှိတွင် ကျပ်သိန်း ၇၀ သို့ ဈေးနှုန်းကျဆင်းသွားကြောင်း ဒေသခံအချို့ထံမှ သိရသည်။
” ပြောရရင်တော့ ဆေးရွက်ကြီးတွေ နေပူကောင်းကောင်းမရတဲ့သဘော။ အောက်က မြေကလည်း အစိုဓာတ်ကရှိနေတာ။ နေမရတော့ ဆေးတွေက သိပ်မခြောက်တော့ မှိုလိုက်မယ်၊ အရောင်လည်း မလှဘူးပေါ့။ အဲဒါကြောင့် ဈေးချဝယ်တဲ့သဘော” ဟု ဒေသခံဆေးရွက်ကြီး စိုက်သူတစ်ဦးက MPA သို့ ပြောသည်။
ဆေးရွက်ကြီးကို ၂၀၂၄ ခုနှစ်၊ အောက်တိုဘာလကုန်ပိုင်းတွင် စတင်စိုက်ပျိုးခဲ့ခြင်းဖြစ်ပြီး တစ်ဧက လျှင် စိုက်ပျိုးစရိတ်ပျှမ်းမျှ ၁၅ သိန်းခန့်ကုန်ကျကာ ရာသီဥတုကောင်းမွန်ပါက တစ်ဧကလျှင် ဆေးရွက်ကြီး ပိဿာချိန် ၅၀၀ နှင့် ၆၀၀ ကြားထွက်ရှိသည်။
ဆေးရွက်ကြီးစိုက်ပျိုးမှုကို မိုးညိုမြို့နယ် အနောက်ခြမ်း၊ ဧရာဝတီမြစ်ကမ်းတစ်လျှောက်ရှိ လက်ပံခုံ၊ စိန်တိုင်ကျွန်း၊ ဖလံပင်၊ ဖန်ခါးပင်၊ ဆင်မနိုင်စသည့် ကျေးရွာများတွင် အဓိက စိုက်ပျိုးကြသည်။
မတ်လ ၂၆ ရက်က အဆိုပါဒေသတွင် ရုတ်တရက်မိုးရွာသွန်းသည့်အတွက် ဆေးရွက်ကြီး စိုက်ဧက ၃၀,၀၀၀ ခန့်မှ ထွက်ရှိသည့် ခူးဆွတ်ပြီးဆေးရွက်ကြီးနှင့် ခူးဆွတ်ရန်ကျန်နေသည့်ဆေးရွက်ကြီးအချို့ မိုးရေထိကာ ပျက်စီးခဲ့သေးကြောင်း ဒေသခံများထံက သိသည်။
