By Hsu Yee / MPA
မကွေးတိုင်း ၊ ဆောမြို့နယ်၊ ကျောက်ထုမြို့တွင် စစ်တပ်၏ လေကြောင်းတိုက်ခိုက်မှုကြောင့် ကျေးရွာ ၁၀ ရွာမှ ပြည်သူများ ထွက်ပြေးတိမ်းရှောင်နေရကြောင်း သိရသည်။
မေလကိုးရက်၊ ညနေခြောက်နာရီကျော်တွင် စစ်တပ်က ကျောက်ထု လေယာဉ်ကွင်း၏ တောင်ဘက် ရှိ ရွာများပေါ်သို့ Y-12 လေယာဉ်ပေါ်မှ လေးကြိမ်ဗုံးကြဲချခဲ့ရာ ကျေးရွာ၁၀ရွာမှ ပြည်သူ ၄၀၀၀ ကျော် နေရပ်စွန့်ခွာ ထွက်ပြေးကြရကြောင်း ဒေသတွင်း နွေဦးတော်လှန်ရေးစာမျက်နှာ ယောအလင်းတန်းထံမှသိရသည်။
“ ဘယ်ကျေးရွာဆိုတာထက် ကျောက်ထုလေယာဉ်ကွင်းရဲ့အစပ် တောင်ဘက်နဲ့မြောက်ဘက်တွေကို ပစ်ခတ်တယ်လို့တော့သိရပါတယ်။ကျောက်ထု အမြောက်တပ်နဲ့အနီးဆုံးရွာတွေပါဗျ” ဟု ယောအလင်းတန်းမှ ကိုအောင်ကြီးက MPA သို့ပြောသည်။
စစ်တပ်၏ လေကြောင်းတိုက်ခိုက်မှုကြောင့် မြို့ပေါက်၊ချောင်းကူး၊ယောမြို့၊ရင့်ရဲ၊ကံကြီး၊ကြန်တော၊ ပြင်လယ်၊တောင့်ထက်၊ရေရှင်နှင့်ပေါက်ခေါင်းကျေးရွာတို့မှ ပြည်သူများ တိမ်းရှောင်နေရပြီး အများစုမှာ ဆောမြို့ပေါ်သို့ သွားရောက်စစ်ရှောင်ကြကြောင်း သိရသည်။
ကျောက်ထုနယ်အတွင်း ဖုန်းလိုင်းပြတ်တောက်မှုများနှင့် ဆက်သွယ်ရေးအခက်အခဲများကြောင့် လူနှင့်နေအိမ် ထိခိုက်မှုအခြေအနေကို မသိရသေးပေ။
“ တချို့ရွာတွေဆို စစ်ရှောင်နေကြတာကြာပါပြီ။ကျောက်ထုတပ်(အမြောက်တပ် အမတ -၃၆၈)အနီးအနားကျေးရွာက ပြည်သူတွေကတော့ အရင်ကတည်းက စစ်ရှောင်နေကြတာပါ” ဟု ၎င်းကဆက်လက်ပြောသည်။
မေလ တစ်ရက် နှင့်ခြောက်ရက်တို့တွင်လည်း စစ်ကောင်စီတပ်က ကျောက်ထုနယ်အတွင်း ညအချိန်များ၌ လေကြောင်းတိုက်ခိုက်မှု ပြုလုပ်ခဲ့သေးသည်။
ပြီးခဲ့သည့် ဧပြီမှစတင်ကာ မေလကိုးရက်ညနေပိုင်းအထိ စစ်ကောင်စီတပ်က ကျောက်ထုနယ်အတွင်း လေကြောင်းတိုက်ခိုက်မှု ရှစ်ကြိမ်ပြုလုပ်ခဲ့ကြောင်း ယောအလင်းတန်းထံမှ သိရသည်။
စစ်ကောင်စီက မေလ ခြောက်ရက်မှ ၃၁ရက်အထိ တတိယအကြိမ် အပစ်အခတ်ရပ်စဲကြောင်း ကြေညာပြီးနောက် နိုင်ငံတစ်ဝန်း လေကြောင်းတိုက်ခိုက်မှုနှင့် လက်နက်ကြီးဖြင့်ပစ်ခတ်မှုတို့ လုပ်ဆောင်နေခြင်းဖြစ်သည်။
