By Ra Wai / MPA
စစ်ကိုင်းတိုင်း၊ ရေဦးမြို့နယ်တွင် လယ်ထဲသွားသည့် အမျိုးသမီးတစ်ဦး စစ်တပ်ကြဲချသည့်ဗုံး ထိမှန်ကာ သေဆုံးသွားကြောင်းသိရသည်။
ယနေ့ (မေလ ငါးရက်) နံနက် ကိုးနာရီခွဲခန့်တွင် ရေဦးမြို့နယ်၊ အင်းပထိုးကျေးရွာသို့ စစ်ကောင်စီ တပ်က ဂျက်ဖိုက်တာတစ်စင်းဖြင့် ဗုံးနှစ်ကြိမ်ကြဲချခဲ့ရာ အသက် ၄၀အရွယ်အမျိုးသမီးတစ်ဦး သေ ဆုံးပြီး အမျိုးသားနှစ်ဦး မစိုးရိမ်ရဒဏ်ရာရရှိခဲ့ကြောင်း ရေဦးမြို့နယ်ပြည်သူ့အုပ်ချုပ်ရေးအဖွဲ့ထံ မှသိရသည်။
” ပေါင် ၂၅၀ နှစ်လုံးလို့ ယူဆရပါတယ်ခင်ဗျာ။ ရွာဘေးက လယ်ကွက်ထဲကို ကျတာပါခင်ဗျာ။ လယ်ကွင်းထဲကို အသွားမှာ ထိတာပါ။ အပေါ့စားဒဏ်ရာရတဲ့သူတွေက လယ်ကွင်းဘေးက အိမ်တွေထဲကို အစ(ဗုံးစ)စင်ရာကနေ ထိတာပါ” ဟု ရေဦးမြို့နယ်ပြည်သူ့အုပ်ချုပ်ရေးအဖွဲ့မှ တာဝန်ရှိသူတစ်ဦးက MPA သို့ပြောသည်။
ဗုံးကြဲတိုက်ခိုက်မှုကြောင့် ဒဏ်ရာရသည့် အမျိုးသားနှစ်ဦးမှာ ပွန်းရှဒဏ်ရာမျှသာ ရရှိပြီး အိမ်ပျက်စီးမှုလည်း မရှိကြောင်း သိရသည်။
” အစမှန်တာ နည်းနည်းပါးပါးကလွဲရင် အကြီးစားထိခိုက်မှု မရှိပါဘူးခင်ဗျာ” ဟု ၎င်းကဆက်လက်ပြောသည်။
ရေဦးမြို့နယ်တွင် တိုက်ပွဲဖြစ်ပွားခြင်းမရှိသည်မှာ ကာလအတန်ကြာပြီဖြစ်သော်လည်း စစ်ကောင်စီတပ်သည် ပြည်သူကို ပစ်မှတ်ထား၍ လေကြောင်းတိုက်ခိုက်မှုများ မကြာခဏပြုလုပ်လျက်ရှိကြောင်း သိရသည်။
ယနေ့ နံနက်ပိုင်းတွင် ကနီမြို့နယ်၊ ချောင်းမရွာအရှေ့ဘက်ကို စစ်ကောင်စီတပ်က ဗုံးကြဲတိုက်ခိုက်ခဲ့ရာ မီးသတ်ရုံထိခိုက်ပျက်စီးပြီး လူထိခိုက်မှုမရှိကြောင်းသိရသည်။
