By Ko Paing / MPA
မွန်ပြည်နယ်၊ သထုံမြို့နယ်၊ ရန်ကုန်-မော်လမြိုင်ကားလမ်းပေါ်ရှိ မိုးကောင်းတံတား ဒုတိယအကြိမ် မိုင်းခွဲခံရပြီး ပြိုကျပျက်စီးသွားကြောင်း သိရသည်။
မိုးကောင်းတံတားသည် သထုံမြို့နယ်၊ကျိုက္ကော်မြို့အထွက် ဘီးလင်းဘက်သို့ သွားသည့် လမ်းမကြီး ပေါ်တွင် တည်ရှိပြီး မေလသုံးရက်ည၊၁၁ နာရီမိနစ် ၂၀ ခန့်၌ မိုင်းခွဲခံရခြင်းဖြစ်ကြောင်း ကျိုက္ကော်မြို့ခံ တစ်ဦးထံက သိရသည်။
“အသံက အရင်တစ်ခါကထက် ပိုကျယ်တယ်။ညတုန်းကတော့ ရောက်တဲ့နေရာ ကားတွေ အကုန်ရပ် ပဲ ဆိုတော့ ကျိုက္ကော်မှာရော ဘီးလင်းဘက်ခြမ်းရော ကားတွေ ပိတ်နေရော”ဟု ၎င်းက MPA သို့ပြောသည်။
ယနေ့(မေလလေးရက်)နံနက်ပိုင်းတွင်မူ ခရိုင်ချင်းဆက် အတွင်းလမ်းမှနေ၍ ကားလေးနှင့် Express ကားများ သွားနေကြကြောင်း သိရသည်။
“ရွှေရောင်ပြကနေဝင်ပြီး ခရိုင်ချင်းဆက်လမ်းအတိုင်း မိုးကောင်းဘုရားကနေ ပြန်ထွက်တယ်။လမ်း ကကျဉ်းတော့ ၁၀ဘီးတို့ ၁၂ဘီးတို့ ကုန်ကားကြီးတွေတော့ သွားဖို့ မလွယ်ဘူး”ဟု ၎င်းက ဆက်လက် ပြောသည်။
မိုးကောင်းတံတားကို ၂၀၂၄ ခုနှစ်၊ ဖေဖေါ်ဝါရီ ၂၈ ရက်တွင် ပထမအကြိမ် မိုင်းခွဲခဲ့သေးသည်။
ယခုမိုင်းခွဲမှုနှင့်ပတ်သက်ပြီး မည်သည့်အဖွဲ့က လုပ်ဆောင်သလဲဆိုသည်ကို ထုတ်ပြန်ခြင်း မရှိသေးပေ။
